1. Kuma ku no sibi kuma Jeova misti pertusi di nos?

 JEOVA kumbidanu pa no pertusi del. (Tiagu 4:8) I misti sedu no Deus, no Pape i no Amigu. I ta ruspundi no orasons, tambi i ta judanu ora ku no na pasa purblemas. I ta usa tambi si organizason pa nsinanu i pa proteẑinu. Ma, ke ku no pudi fasi pa pertusi di Jeova?

2. Kuma ku no pudi pertusi di Jeova?

² No pudi pertusi di Jeova atraves di papia kel na orason, lei si Palabra i pensa fundu nel. Si no fasi kila, no na mas amal i no na da balur pa ke ki fasi pa nos. Kila na motivanu obdisil i ngabal, pabia i mersi. (Apok 4:11) Mas no kunsi Jeova, mas no na konfia nel, i na organizason ki ta usa pa judanu.

3. Kuma Diabu ta tenta separanu di Jeova, ma ke ku pudi judanu pa ka no bandona nunka no Deus ku si organizason? (Salmu 31:13, 14)

³ Diabu ta tenta separanu di Jeova, spesialmenti ora ku no na pasa purblemas. Kuma ki ta fasi kila? I ta tenta puku-puku kaba ku no konfiansa na Jeova i na si organizason. Ma no pudi difindi no kabesa kontra si atakis. Si no fe sedu forti, i no konfiansa na Jeova sedu firmi, no ka na bandona no Deus ku si organizason. — Lei Salmu 31:13, 14.

4. Ke ku no na bin fala del nes studu?

⁴ Nes studu, no na fala tris kusas ku pudi bin fora di kongregason; kada un delis pudi rapati no konfiansa na Jeova i na si organizason. Kuma ku e kusas pudi separanu  di Jeova? I ke ku no pudi fasi pa pertusi del?

5. Kuma ku purblemas pudi rapati no konfiansa na Jeova i na si organizason?

⁵ Utrora, no ta pasa purblemas, suma ora ku no familia sta kontra nos o no pirdi no tarbaju. Kuma ku es purblemas pudi rapati no konfiansa na organizason di Jeova i separanu del? Ora ku no na pasa difilkuldadis pa manga di tempu, no pudi pirdi speransa i fika disanimadu. Satanas ta aproveita des situasons pa fasinu pensa di kuma Jeova ka amanu. Diabu ta misti fasinu pensa di kuma, Jeova ku si organizason ki responsavel pa no sufrimentu. I mesmu kusa ku kontisi ku alguns israelitas na Ejitu. Na kumsada e fiaba kuma Jeova ku kuji Moisés ku Aron pa liberta elis di katiberasku na Ejitu. (Sai 4:29-31) Ma mas tardi, oca ku Faraó na kastiga elis, e kulpa Moisés ku Aron pa se purblemas, e fala elis: “Bo pui no na cera mal dianti Faraó ku si ŝefis. Bo da elis spada na mon pa matanu.” (Anos ku pui letras karegadu ku italiku; Sai 5:19-21) E kulpa servus fiel di Deus. I tristi dimas! Si bu sta na nguenta purblemas pa manga di tempu, kuma ku bu pudi manti forti bu konfiansa na Jeova ku si organizason?

6. Ke ku no pudi aprindi di kuma ku profeta Abakuk lida ku purblemas ki pasa? (Abakuk 3:17-19)

⁶ Konta Jeova na orason tudu ku sta na bu korson, i konfia di kuma i na ruspundi bu orason. Profeta Abakuk pasa manga di purblemas. I ciga un tempu, i staba suma si i tene duvida si kontra Jeova ta preokupa ku el. Asin, i konta Jeova na orason tudu ke ki na sinti. I fala: “Kantu tempu ku N ten ku comau antis di bu sukutan? . . . Kuma ku bu pudi seta pekadu?” (Aba 1:2, 3) Jeova ruspundi orason ku si servu fiel fasi di tudu korson. (Aba 2:2, 3) Dipus di Abakuk pensa fundu na kuma ku Jeova salva si povu, i torna tene mas, kontentamentu. I sinti konfiansa di kuma Jeova ta preokupa ku el, tambi i na judal nguenta kualker purblema. (Lei Abakuk 3:17-19.) Ke ku no pudi aprindi des? Ora ku bu na pasa purblemas, ora Jeova i kontal ke ku bu sta na sinti. Dipus, konfia di kuma i na ruspundi bu orason. Si bu fasi kila, bu pudi tene sertesa di kuma Jeova na dau forsa ku bu pirsisa del pa nguenta. I ora ku bu sinti ajuda ki dau, fe ku bu tene nel na sedu mas forti.

7. Ke ku un di familia di Shirley tenta konvensil del, i ke ku judal manti si fe na Jeova?

⁷ Kontinua fasi kusas ku na judau pertusi di Jeova. Nota kuma ku kila juda un irma comadu Shirley di Papua Nova Gine, oca ki pasa purblemas. b Familia di Shirley koitadi, utrora i ta difisil pa e konsigi kumida ku na ciga elis. Un di si familia tenta rapati konfiansa ki tene na Jeova. I falal: “Bu fala kuma spiritu santu di Deus ta judau, nunde ki ajuda gora? No familia koitadi inda. Bu na pirdi bu tempu na prega.” Shirley fala: “N punta ña kabesa: ‘Deus ta preokupa ku nos o nau?’ Asin, N ora  logu i N konta Jeova tudu ke ku N na sinti. N ka para lei Biblia ku no publikasons, i N kontinua prega i mati runions.” I ka tarda i kaba pa nota di kuma, Jeova staba na kuida di si familia. Si familia ka pasa fomi, i e staba kontenti. Shirley fala: “N sinti kuma Jeova staba na ruspundi ña orason.” (1 Tim 6:6-8) Si abo tambi bu manti bu atividadis spiritual, bu ka na pirmiti pa purblemas o duvidas separau di Jeova.

8. Ke talves ku pudi kontisi ku ermons ku tene responsabilidadi na organizason di Jeova?

⁸ Atraves di meius di kumunikason ku redi sosial, no inimigus ta spalia mintidas ku falsus informason aserka di ermons ku tene responsabilidadi na organizason di Jeova. (Sal 31:13) Alguns ermons prindidu i e akusadu di krimi. Kristons di purmeru sekulu pasa tambi mesmu situason, oca ku apostolu Paulu akusadu sin roson dipus i prindidu. Kuma ke reaẑi?

9. Kuma ku alguns kristons reaẑi oca ku apostolu Paulu prindidu?

⁹ Alguns kristons di purmeru sekulu para apoia apostolu Paulu oca ki prindidu na Roma. (2 Tim 1:8, 15) Pabia ke para? Sera ki e burguñuba Paulu pabia jintis ta ojal suma un kriminosu? (2 Tim 2:8, 9) O e medi di kuma elis tambi e pudi bin pirsigidu? I ka mporta kal ki se motivu, ma imaẑina kuma ku Paulu sintiba. I pasa manga di purblemas, i te mesmu i pui si vida na pirigu pabia delis. (At 20:18-21; 2 Kor 1:8) Ka no parsi nunka ku kilis ku bandona Paulu na mumentus ki na pirsisaba di ajuda! Ke ku no dibi di lembra del ora ku ermons ku tene responsabilidadi sta na pirsigidu?

10. Ke ku no dibi di lembra del ora ku ermons ku tene responsabilidadi sta na pirsigidu, i pabia di ke?

 ¹⁰ Lembra pabia ku no ta pirsigidu i kin ku sta tras di kila. Sugundu di Timótiu 3:12 fala: “Tudu kil ku misti vivi un vida puru na Kristu Jesus i ten ku sufri pirsigison.” Asin, no ka dibi di dimira si Satanas sta na ataka ermons ku tene responsabilidadi. Si objetivu i kaba ku se fidelidadi, i mitinu medu. — 1 Ped 5:8.

11. Ke ku no pudi aprindi di isemplu di Onesíforu? (2 Timótiu 1:16-18)

¹¹ Kontinua apoia bu ermons i sta sempri na se ladu. (Lei 2 Timótiu 1:16-18.) Un kriston di purmeru sekulu comadu Onesíforu reaẑi di manera diferenti oca ku Paulu prindidu. ‘I ka burguñu suma Paulu sta na kalabus’. En ves di kila, Onesíforu buska Paulu tok i ojal, i buska manera di judal. Oca Onesíforu na fasiba kila i pui si vida na pirigu. Ke ku no pudi aprindi des? No ka dibi di pirmiti pa medu di omis tujinu apoia no ermons ora ke sta na pirsigidu. En ves di kila, no difindi elis i no juda elis. (Dit 17:17) E pirsisa di no amor ku no apoiu.

12. Ke ku no pudi aprindi di no ermons ku irmas na Rusia?

¹² Jubi kuma ku no ermons ku irmas na Rusia juda se ermons ku irmas ku prindidu. Ora ku alguns na julgadu, manga di ermons ku irmas ta bai tribunal pa apoia elis. Ke ku no pudi aprindi des? Ora ke na konta mintida kontra ermons ku tene responsabilidadi, e prindi elis o pirsigi elis, ka bu medi. Ora pa relis, kuida di se familia, i jubi maneras pratiku di apoia elis. — At 12:5; 2 Kor 1:10, 11.

13. Kuma ku gozu pudi rapati no konfiansa na Jeova i na si organizason?

¹³ No familias ki ka Tustumuñas di Jeova, kolegas di tarbaju, o di skola pudi gozanu pabia no ta prega o no ta vivi di akordu ku normas di Jeova. (1 Ped 4:4) Talves e pudi falanu: “N gosta ciu di bo, ma bu riliẑion ciu regra, e ta pega na kusas antigu.” Alguns pudi kritika kuma ku no ta trata jintis ku dizasosiadu, e pudi falanu: “Kuma ku bo pudi fala kuma bo ama n̈utru?” Kombersas suma es pudi kria duvida na no kabesa. Talves no pudi kumsa ku punta no kabesa: ‘Sera ki Jeova sta na iziẑi ciu di mi? Sera ki si organizason ciu regra?’ Si bu sta na pasa e situason, kuma ku bu pudi pertusi di Jeova i di si organizason?

14. Kuma ku no dibi di reaẑi ora ku no na gozadu pa utrus, pabia no sta na vivi di akordu ku ke ku Jeova fala i sertu? (Salmu 119:50-52)

¹⁴ Sta disididu pa kontinua fasi ke ku Jeova fala i sertu. Jo i un omi ku vivi sugundu ke ku Jeova fala i sertu apesar di gozadu pa utrus. Un omi ku finji sedu amigu di Jo tenta konvensil di kuma, Deus ka mporta si Jo fasi ke ki i fala i sertu o nau. (Jo 4:17, 18; 22:3) Ma Jo nega fia ne mintida. I sibi kuma ke ki Jeova fala i sertu o i eradu i kila ki bon, i staba disididu pa sigil. I ka pirmiti utrus kaba ku si fidelidadi. (Jo 27:5, 6) Ke ku no pudi aprindi des? Ka bu disa gozu lebau na duvida di ke ku Jeova fala i sertu. Pensa na bu propi  spiriensia. Talves bu ciga ja di oja manga di bias di kuma, bu vida minjoria pabia bu fasi ke ku Jeova fala i sertu. Sta disididu pa apoia organizason ku ta difindi ke ku Jeova fala i sertu. Si bu fasi kila, nin un tipu di gozu, i ka mporta di nunde ki bin, i ka na pudi separau di Jeova. — Lei Salmu 119:50-52    .

15. Pabia ku familia di Brizit ta gozalba?

¹⁵ Pensa na isemplu di Brizit, un irma na India. Si familia ta gozalba pabia di si fe. Puku tempu dipus di si batismu na 1997, si omi ki ka Tustumuña di Jeova pirdi si tarbaju. Asin si omi disidi, pa e bai ku se fijus, e bai mora ku si papes ku na vivi na utru sidadi. Ma situason na seduba mas difisil pa Brizit. Suma si omi ka tene tarbaju, i dibi di tarbaja tempu kompletu pa apoia si familia. Alen di kila, kongregason mas pertu staba serka di 350 kilometru. Infilismenti, familia di si omi staba kontra el, pabia di si fe. Situason bin torna difisil dimas tok familia di Brizit bin tenba ku munda mas. Dipus, si omi muri di repenti. Mas tardi un di si fijus femia di 12 anu muri di kankru. Pior di tudu, familia di Brizit kulpal pa tudu e kusas ku kontisi. E falal kuma si ka seduba Tustumuña di Jeova, nin un di ki kusas ka na kontisi. Mesmu asin, i kontinua konfia na Jeova i pertusi di si organizason.

16. Kuma ku Brizit bensuadu manera ki ka bandona Jeova ku si organizason?

¹⁶ Suma Brizit mora lunju di si kongregason, un superintendenti di sirkuitu nsentival pa i ba ta prega na si zona i pa i ba ta fasi runions na si kau. Na kumsada, i oja ba kuma i difisil. Ma i sigi orientason ki dadu. I konta utrus bon noba, i ta fasi runions na si kau, tambi i tira tempu pa fasi adorason na familia ku si fijus femia. Kal ki rusultadu? Brizit konsigi kumsa i diriẑi manga  di studus bibliku, i manga di si studantis batisa. Na 2005 i kumsa sirbi suma pionera regular. I bensuadu pabia di si konfiansa na Jeova ku si fidelidadi pa si organizason. Si fijus femia sta na sirbi Jeova ku fidelidadi, i gosi i ten dus kongregasons na si zona! Brizit sta konvensidu di kuma, Jeova ku dal forsa di nguenta purblemas ki pasa ku gozu di si familia.

17. Ke ku no dibi di sta disididu pa fasi?

¹⁷ Satanas misti pa no fia di kuma, Jeova na bandonanu ora ku no na pasa purblemas, i di kuma apoia organizason di Jeova na torna no vida mas difisil. Satanas misti pa no medi ora ke na konta mintida kontra ermons ku tene responsabilidadi, ora ke na pirsigi elis o ora ke fica elis na prison. I atraves di gozu, i misti rapati no konfiansa na ke ku Jeova fala i sertu i na si organizason. Ma no sta atentu kontra si planus i no ka na nganadu. (2 Kor 2:11) Sta disididu pa nega mintidas di Satanas, i manti fiel pa Jeova ku si organizason. Lembra di kuma, Jeova nunka ka na bandonau. (Sal 28:7) Pa kila, ka bu disa nada separau di Jeova! — Rom 8:35-39.

18. Ke ku no na bin fala del na studu ku na bin?

¹⁸ Nes studu, no oja purblemas ku no pudi pasa ku ta bin fora di kongregason. Ma, no konfiansa na Jeova i na si organizason pudi testadu tambi pa purblemas ku ta bin dentru di kongregason. Kuma ku no pudi sai ben na lida ku es purblemas? Es ku no na bin fala del na studu ku na bin.