STUDU 45
Kuma ku Jeova ta judanu fasi no tarbaju di pregason
“E na sibi kuma un anunsiadur staba na se metadi”. — EZE 2:5.
KANTIKU 67 Eu Vou Pregar!
KE KU NO NA BIN FALA DEL a
1. Ke ku no pudi spera, i kal sertesa ku no pudi tene?
NO PUDI spera di kuma no na tene opusison na no tarbaju di pregason. Es opusison pudi aumenta na futuru. (Dan 11:44; 2 Tim 3:12; Apok 16:21) Mesmu asin, no pudi tene sertesa di kuma Jeova na danu ajuda ku no pirsisa del. Pabia ku no pudi tene es sertesa? Pabia Jeova sempri juda si servus kumpri se disignasons, mesmu si difisil. Pur isemplu, no jubi alguns kusas ku kontisi na vida di Ezekiel ku pregaba judeus ku staba na Babilonia.
2. Ke ku Jeova fala aserka di jintis na tiritoriu di Ezekiel, i ke ku no na bin fala del nes studu? (Ezekiel 2:3-6)
2 Kal tipu di jintis ku staba na tiritoriu ku Ezekiel prega? Jeova fala kuma e “risu kabesa” e “ntemus na korson” i e sedu “disobdienti.” E ta fasi mal suma fidida i e pirigosu suma lakaran. E ku manda Jeova fala Ezekiel manga di bias: “Ka bu medi”! (Lei Ezekiel 2:3-6.) Ezekiel konsigi fasi tarbaju di pregason pabia (1) i Jeova ku mandal, (2) i risibi forsa di spiritu di Deus, i (3) i alimentadu pa palabras di Deus. Kuma ke tris kusas juda Ezekiel? I kuma ke ta judanu aos?
JEOVA KU MANDA EZEKIEL
3. Kal palabras ku fortalisi Ezekiel, i kuma ku Jeova garantil di kuma i na apoial?
3 Jeova fala Ezekiel: “Ami N na mandau”. (Eze 2:3, 4) Es palabras fortalisi Ezekiel. Pabia? Sin duvida, Jeova usa mesmu palabras oca ki kuji Moisés ku Isaias suma si profetas. (Sai 3:10; Isa 6:8) Ezekiel sibiba tambi, kuma ku Jeova juda ki dus profeta vensi disafius ke pasa. Pa kila, oca ku Jeova fala Ezekiel dus bias: “Ami N na mandau”, profeta teneba motivu di konfia na apoiu di Jeova. Mas dianti na livru di Ezekiel no pudi oja es palabras manga di bias: “SIÑOR bin papia ku mi”. (Eze 3:16) Sin duvida, Ezekiel staba konvensidu di kuma Jeova ku mandal. Alen di sedu fiju di saserdoti, tambi i pudi sedu kuma si pape kontal kuma ku duranti manga di tempu, Jeova da si profetas garantia di si apoiu. Jeova fala Isaki, Jakó ku Jeremias: “N sta ku bo.” — Kum 26:24; 28:15; Jer 1:8.
4. Kal palabras nkoraẑanti ku fortalisi Ezekiel?
4 Kuma ku maioria di israelitas reaẑi ku pregason di Ezekiel? Jeova fala: “Pobu di Israel ka na misti obiu, pabia e ka misti obin.” (Eze 3:7) Manera ke nega obi Ezekiel e staba na nega obi Jeova. Es palabras da Ezekiel garantia di kuma, si povu nega obil kila ka signifika kuma i ka fasi si tarbaju suma profeta. Jeova da tambi Ezekiel garantia di kuma, ora ku julgamentu ki konta bin kumpri, jintis “na sibi kuma un anunsiadur staba na se metadi”. (Eze 2:5; 33:33) Sin duvida, es palabras nkoraẑanti da Ezekiel forsa ki pirsis pa fasi si tarbaju di pregason.
JEOVA KU MANDANU
Suma Ezekiel, no pudi nfrenta jintis ku ka na misti obinu i ku sta kontra nos, ma no sibi di kuma Jeova sta ku nos. (Jubi paragrafu 5 ku 6)
5. Di akordu ku Isaias 44:8, di nunde ku no na sai ku forsa?
5 Anos tambi no na tene forsa di sibi kuma Jeova ku mandanu pa prega. I danu balur manera ki comanu di si “tustumuñas”. (Isa 43:10) Es i un privileẑiu garandi! Suma ku Jeova fala Ezekiel: “Ka bu medi,” asin tambi ki falanu: “Ka bo panta.” Ke ku manda no ka dibi medi kilis ku sta kontra nos? Suma Ezekiel, Jeova ku mandanu i no tene si apoiu. — Lei Isaias 44:8.
6. (a) Kuma ku Jeova mostra di kuma i na apoianu? (b) Ke ku ta nkoraẑanu?
6 Jeova mostra di kuma i na apoianu. Pur isemplu, antis di Jeova fala: “Abos bo sedu ña tustumuñas,” i fala: “Ora ku bu na pasa na yagu, N na sta ku bo; ora ku bu na pasa na rius, e ka na fogantau; nin ki na fugu ku bu na pasa, bu ka na kema, nin lingua di fugu ka na sindi na bo.” (Isa 43:2) Ora ku no na prega, utrora no pudi pasa manga di difikuldadis ku no pudi kompara ku inŝenti, i ku purblemas difisil dimas ku no pudi kompra ku fugu. Ma Jeova na judanu kontinua prega. (Isa 41:13) Suma na tempu di Ezekiel, manga di jintis ta nega sukuta mensaẑen ku no ta prega. Ma lembra kuma manera ke nega, ka signifika kuma no ka ta prega diritu. No ta sinti nkoraẑadu pabia no sibi di kuma Jeova ta kontenti ora ku no kontinua prega si mensaẑen ku fidelidadi. Apostolu Paulu fala: “Kada un na risibi si pagamentu konformi si tarbaju.” (1 Kor 3:8; 4:1, 2) Un irma ku tarda na sirvisu di pioneru fala: “N ta kontenti sibi di kuma Jeova ta bensua no sforsus.”
SPIRITU DI DEUS DA EZEKIEL FORSA KI PIRSISA DEL
Ezekiel oja un vison di karu di Jeova ku sta na seu, i kila buri si konfiansa di kuma Jeova na judal kumpri si tarbaju di pregason. (Jubi paragrafu 7)
7. Kuma ku Ezekiel sinti oca ki pensa na vison ki risibi? (Jubi diseñu ku sta na kapa.)
7 Ezekiel oja spiritu puderosu di Deus. Ke ku Ezekiel oja na vison judal ntindi di kuma, spiritu santu staba na juda anjus puderosu i muvimenta rodas garandi di karu ku sta na seu. (Eze 1:20, 21) Kal ku seduba reason di Ezekiel? I skirbi ke ku kontisi. I fala sin: “Oca ku N ojal, N kai ku rostu na con”. Ezekiel dimiraba ciu tok i kai na con. (Eze 1:28) Mas tardi, oca Ezekiel pensa nes vison ku ta dimira, kila dibi di aumenta si konfiansa di kuma, ku ajuda di spiritu di Deus, i na pudi kumpri si tarbaju di pregason.
8-9. (a) Kal ordi ku Jeova da Ezekiel? (b) Kuma ku Jeova buri Ezekiel forsa na si tiritoriu difisil?
8 Jeova da Ezekiel es ordi: “Fiju di omi, lanta bu firma; N na papia ku bo.” Es ordi juntu ku spiritu di Deus da Ezekiel forsa ki pirsisaba del pa lanta di con. Ezekiel fala sin: “Spiritu yentra na mi, i lantandan.” (Eze 2:1, 2) Mas tardi i duranti tudu si pregason, Ezekiel giadu pa “mon” di Deus, ku sedu, spiritu santu di Deus. (Eze 3:22; 8:1; 33:22; 37:1; 40:1) Spiritu di Deus da Ezekiel forsa pa fasi tarbaju ki risibi, ku sedu, prega jintis di si tiritoriu ku “tene kabesa risu ku korson duru.” (Eze 3:7) Jeova fala Ezekiel: “N na fasiu duru, ntemus, pa bu pudi firma kontra elis. N na fasi bu rostu suma diamanti, mas forti di ki ki pedra mas duru di tudu. Ka bu medi elis, nin pa e pantandau ku se rostu”. (Eze 3:8, 9) Na bardadi, Jeova staba na fala Ezekiel: ‘Ka bu disa e jintis ku risu kabesa disanimau. N na dau forsa.’
9 Dipus di kila, spiritu di Deus juda Ezekiel pa prega si tiritoriu. Ezekiel fala sin: “Mon di SIÑOR staba forti riba di mi.” Profeta pasa un semana pa ntindi i aprindi diritu mensaẑen ki dibi di konta utrus, asin pa i pudi prega ku konfiansa. (Eze 3:14, 15) Dipus, Jeova falal pa i bai pa kobon nunde ku ‘spiritu yentra nel.’ (Eze 3:23, 24) Ezekiel staba pruntu pa kumsa si pregason.
SPIRITU DI DEUS TA DANU FORSA KU NO PIRSISA DEL
Suma Ezekiel, kal ajuda ku no pirsisa del pa prega? (Jubi paragrafu 10)
10. Kal ajuda ku no pirsisa del pa prega, i pabia di ke?
10 Kal ajuda ku no pirsisa del pa pudi fasi no tarbaju di pregason? Pa ruspundi es purgunta, no pensa na ke ku kontisi ku Ezekiel. Antis di kumsa si tarbaju di pregason, spiritu di Deus dal forsa ki pirsisa del. Suma Ezekiel, aos tambi no ta konsigi prega so ku ajuda di spiritu di Deus. Pabia di ke? Pabia Satanas lantanda gera kontra nos pa pudi para no tarbaju di pregason. (Apok 12:17) Manga di jintis ta pensa di kuma Satanas tene puder garandi, i no ka pudi ngaña gera kontra el. Ma, atraves di no tarbaju di pregason no sta na ngañal! (Apok 12:9-11) Di kal manera? Ora ku no na prega, no ta mostra di kuma no ka medi ameasa di Satanas. Kada bias ku no prega, Satanas ta pirdi. Ke ku ta torna klaru, ora ku no diskubri di kuma, no pudi kontinua prega mesmu si no inimigus sta kontra nos? I ta sta klaru di kuma, Jeova danu forsa atraves di si spiritu santu i no tene si fabur. — Mat 5:10-12; 1 Ped 4:14.
11. Ke ku spiritu di Deus ta fasi pa nos, i ke ku no pudi fasi pa kontinua risibil?
11 Ke mas ku no aprindi, ora ku no pensa na kuma ku Jeova da Ezekiel forsa ki pirsisa del pa prega? Spiritu di Deus pudi danu forsa ku no pirsisa del pa vensi kualker purblema ku no tene na pregason. (2 Kor 4:7-9) Gosi, ke ku no pudi fasi pa tene sertesa di kuma no na kontinua risibi spiritu di Deus? No pirsisa di ora sempri ku konfiansa di kuma Jeova na obi no orason. Jesus fala sin pa si disipulus: “Bo pidi, . . . bo buska, . . . bo bati porta”. Jeova na ruspundi orason, i na “da Spiritu Santu pa kilis ku pidil.” — Luk 11:9, 13; At 1:14; 2:4.
EZEKIEL ALIMENTADU PA PALABRAS DI DEUS
12. Di akordu ku Ezekiel 2:9–3:3, di nunde ku rolu bin, i ke ki tene?
12 Spiritu di Deus da Ezekiel koraẑen ki pirsisa del pa prega. Ma i ka so kila. Palabras di Deus fortalisi tambi fe di Ezekiel. Na vison, Ezekiel oja un mon ku dal rolu. (Lei Ezekiel 2:9–3:3.) Di nunde ku ki rolu bin? Ke ki tene? Kuma ki alimenta Ezekiel? No jubi. Rolu bin di tronu di Deus. Talves Jeova usa un di ki kuatru anjus ku Ezekiel ojaba na kumsada, pa i dal rolu. (Eze 1:8; 10:7, 20) Rolu tene palabras di Deus, ku sedu, un mensaẑen di julgamentu garandi ku Ezekiel dibi di konta pa israelitas rebeldi ku diportadu. (Eze 2:7) Ki mensaẑen skirbidu na tudu dus ladu di rolu.
13. Ke ku Jeova fala Ezekiel pa i fasi ku rolu, i pabia ki dos?
13 Jeova fala si profeta pa i kume rolu i ‘inci si stomagu ku el’. Ezekiel obdisi i kume ki rolu tudu. Ke ku es parti di vison signifika? Ezekiel pirsisaba di ntindi diritu mensaẑen ki na konta. I tenba di fasi parti del, i suma si afeta si sentimentus mas fundu. Dipus, i kontisi un kusa dimiradu. Ezekiel diskubri di kuma rolu “dos suma mel.” (Eze 3:3) Pabia di ke? Pa Ezekiel, privileẑiu di representa Jeova seduba dos, na utrus palabras, i seduba un spiriensa ku ta da kontentamentu. (Sal 19:8-11) I kontenti manera ku Jeova kujil pa i sirbi suma si profeta.
14. Ke ku juda Ezekiel pa i seta si disignason?
14 Mas tardi, Jeova fala Ezekiel: “Pui sintidu, bu obi tudu ña palabras ku N na falau.” (Eze 3:10) Ku es instrusons, Jeova staba na fala Ezekiel pa i tenta lembra di ke ku skirbidu na rolu i pa i medita nel. Oca Ezekiel fasil, si fe torna mas forti. Es rolu tene tambi un mensaẑen forti pa jintis. (Eze 3:11) Oca Ezekiel ntindi diritu, tambi i fia na mensaẑen di Deus, i staba pruntu pa kumsa prega i kontinua te ora ki kaba si disignason. — Sal 19:14.
NO TA ALIMENTADU PA PALABRAS DI DEUS
15. Ke ku no pirsisa di “pui sintidu” nel pa pudi nguenta?
15 Pa kontinua prega no pirsisa tambi di kontinua alimenta di palabras di Deus. No pirsisa di “pui sintidu” na tudu ke ku Jeova ta falanu. Aos, Jeova ta papia ku nos atraves di si Palabra ku skirbidu, ku sedu Biblia. Kuma ku no pudi tene sertesa di kuma Palabra di Deus na kontinua influensia no pensamentu, no sentimentus ku no motivasons?
16. Ke ku no dibi di fasi ku Palabra di Deus, i kuma ku no pudi pul na no korson?
16 Ora ku no kume kumida i diẑeril no kurpu ta torna mas forti. Di mesmu manera, ora ku no studa Palabra di Deus i medita nel, no fe ta torna mas forti. Es i lison ku Jeova misti pa no aprindi. Jeova misti pa no ‘inci no stomagu’ ku si Palabra, ku sedu, pa no ntindil diritu. No pudi fasil ora ku no na ora, leil i medita nel. Purmeru, no na ora pa purpara no korson pa risibi pensamentu di Deus. Sugundu, no na lei un parti di Biblia. Dipus, no na para pa medita, pa pensa fundu na ke ku no kaba di lei. Kal ku na sedu rusultadu? Mas no medita, mas no na ntindi Palabra di Deus, i kila na torna no fe forti.
17. Ke ku manda i importanti medita na ke ku no ta lei na Biblia?
17 Ke ku manda i importanti lei Biblia i medita nel? Fasil na danu forsa di prega mensaẑen di Renu gosi, i na futuru ku ka na tarda, pa konta jintis mensaẑen forti di julgamentu. Tambi ora ku no medita na bon maneras di sedu di Jeova, no amisadi ku el ta torna mas forti. Suma rusultadu, no na tene un kusa dos, ku sedu, pas na korson ku kontentamentu. — Sal 119:103.
MOTIVADU PA NGUENTA
18. Ke ku jintis di no tiritoriu na bin rikuñisi, i pabia di ke?
18 Ezekiel seduba un profeta, i anos no ka sedu. Ma no sta disididu pa kontinua konta mensaẑen di Jeova ku skirbidu na si Palabra te ora ku Jeova fala tarbaju di pregason kaba. Ora ku tempu di julgamentu ciga, jintis na no tiritoriu ka na tene motivu di fala kuma e ka risibi avisu, o Deus ka mporta ku elis. (Eze 3:19; 18:23) En ves di kila, e na bin rikuñisi di kuma mensaẑen ku no prega bin di Deus.
19. Ke ku na danu forsa pa kontinua prega?
19 Ke ku na danu forsa pa kontinua prega? I ki tris kusas ku da Ezekiel forsa. No kontinua prega pabia no sibi kuma Jeova ku mandanu, spiritu di Deus danu forsa i no alimentadu pa Palabra di Deus. Ku ajuda di Jeova, no motivadu kontinua no tarbaju di pregason “te na fin”. — Mat 24:13.
KANTIKU 65 Confiantes, Nós Vamos Continuar!
a Nes studu, no na fala di tris kusas ku juda profeta Ezekiel fasi si tarbaju di pregason. Ora ku no na analisa kuma ku Jeova juda si profeta, no na fortalisi no konfiansa di kuma, Jeova na judanu fasi no tarbaju di pregason.