1-2. (a) Kal purguntas ku no na fala del? (b) Ke ku ta mostra di kuma Jeova tene vontadi garandi di judanu?

 JEOVA pudi judanu nguenta no purblemas i tene kontentamentu na sirbil. Di kal maneras ki ta judanu? Kuma ku no pudi benefisia mas di ajuda ku Jeova ta da? Es purguntas na ruspundidu nes studu. Ma, antis di no jubi respostas, no na fala inda des purgunta: Sera ki Jeova tene vontadi garandi di judanu?

² Palabra ku apostolu Paulu usa na si karta pa Ebreus pudi judanu oja resposta. Paulu fala sin: “Siñor i ña Judadur; N ka na medi. Ke ku algin pudi fasin?” (Anos ku pui letras karegadu ku italiku; Eb 13:6) Un obra di referensia bibliku fala kuma nes versikulu, palabra “Judadur” na trata di un algin ku na kuri pa juda utru algin ku sta na pupa pa pidi ajuda. Imaẑina Jeova sta na kuri pa juda un algin ku sta na sufri. Sin duvida, bu na konkorda di kuma es ta mostra vontadi garandi ku Jeova tene pa judanu. Ku Jeova na no ladu, no pudi nguenta no purblemas ku alegria.

3. Kal tris kusas ku Jeova ta fasi pa judanu nguenta no purblemas ku alegria?

³ Di kal maneras ku Jeova ta judanu nguenta no purblemas ku alegria? Pa ruspundi es, no na bai lei un parti di livru  di Isaias. Pabia? Pabia, manga di profesias ku Jeova konta Isaias pa i skirbi ta aplika pa si adoraduris aos. Tambi, manga di bias, ora ku Isaias na fala di Jeova, i ta usa palabras ku no pudi ntindi rapidu. Isaias kapitulu 30 tene alguns isemplus. Nes kapitulu, Isaias usa komparasons bonitu pa mostra kuma ku Jeova ta juda si povu. I fala di kuma Jeova ta judanu (1) ora ki na sukuta diritu i ruspundi no orasons, (2) ora ki na danu orientason, i (3) ora ki na danu bensons gosi i na futuru. No na bai fala des tris maneras ku Jeova ta judanu.

4. (a) Ke ku Jeova fala aserka di judeus na tempu di Isaias, i ke ki disa pa i kontisi ku elis? (b) Kal speransa ku Jeova da pa kilis ku sedu fiel? (Isaias 30:18, 19)

⁴ Na kumsada di Isaias kapitulu 30, Jeova coma judeus di “fijus rebeldi,” ku “buri pekadu riba di pekadu.” I kontinua fala sin: “Es i pobu rebeldi, . . . ku ka ta misti sukuta lei di SIÑOR”. (Isa 30:1, 9) Suma povu nega sukuta, Isaias konta di kuma Jeova na disa elis sufri. (Isa 30:5, 17; Jer 25:8-11) Kila ku kontisi oca babilonius leba elis suma prisonerus. Ma, i ten alguns judeus ku sedu fiel, i Isaias konta elis mensaẑen di speransa. I konta elis di kuma un dia Jeova na ribanta elis pa se tera. (Lei Isaias 30:18, 19.) I kila propi ku kontisi. Jeova liberta elis di Babilonia. Ma, i pasa manga di anus antis di Jeova liberta elis. Frasi ‘Jeova misti mostra si miserikordia pa bos’ ta mostra di kuma i na pasa algun tempu antis di judeus fiel libertadu. Na bardadi, israelitas pasa 70 anu suma prisonerus na Babilonia antis di alguns delis disadu riba pa Jerusalen. (Isa 10:21; Jer 29:10) Oca israelitas seduba prisonerus na Babilonia, e cora pabia e staba tristi dimas, ma oca e riba pa se tera e cora pabia e staba kontenti dimas.

5. Kal garantia ku Isaias 30:19 danu?

⁵ Aos no pudi nkoraẑadu ku es palabras: “Ora ku bu na coma SIÑOR, . . . i na sinti pena di bo”. (Anos ku pui letras karegadu ku italiku; Isa 30:19) Isaias garantinu di kuma Jeova na sukutanu diritu ora ku no cora pa pidil, tambi i na ruspundi kinti-kinti no orasons. Isaias fala mas: “I na obi bu vos . . . i kudiu.” Es palabras ku ta anima lembrantanu di kuma, no Pape tene vontadi garandi di juda kilis ku pidil. Sibi des ta judanu nguenta ku alegria.

6. Kuma ku palabras di Isaias ta mostra di kuma Jeova ta sukuta orason di kada un di si servus?

⁶ Kal utru kusa kes versikulu ta nsinanu aserka di no orasons? Jeova ta sukuta diritu orason di kada un di nos. Pabia ku no pudi fala kila? Apesar di kuma mensaẑen ku sta na Isaias kapitulu 30 diriẑidu pa tudu nason, na versikulu 19 Jeova usa pronomi “bu” ki singular, ku ta mostra di kuma mensaẑen diriẑidu pa un algin. Isaias fala sin: “Bu ka na cora mas”; “i na obi bu vos”; “i kudiu.” Suma Jeova i un Pape amorosu, i ka na fala si fiju macu o femia ku sta disanimadu: “Bu dibi di sedu forti suma bu ermon o bu irma.” En ves di kila, i ta preokupa ku kada un di nos, tambi i ta sukuta diritu no orasons. — Sal 116:1; Isa 57:15.

7. Kuma ku Isaias ku Jesus mostra di kuma i importanti pa no kontinua ora?

⁷ Ora ku no papia ku Jeova na orason i no kontal no preokupason, purmeru, i pudi danu forsa ku no pirsisa del pa  nguenta situason ku no sta na pasa. Si no purblemas ka kaba logu suma ku no mistiba, no pirsisa di pidi Jeova manga di bias, pa i danu forsa di nguenta. I nsentivanu pa no fasil. I es ku mostradu na palabras di Isaias: ‘Ka bo da Jeova tempu pa i diskansa’. (Isa 62:7) Ke ku es misti fala? No dibi di insisti na no orasons, suma si kontra no ka da Jeova tempu pa i diskansa. Palabras di Isaias lembrantanu komparasons di Jesus aserka di orason ku sta na Lukas 11:8-10, 13. La Jesus nkoraẑanu pa no sedu “sekenti” na orason i ‘kontinua pidi’ pa tene spiritu santu. No pudi tambi pidi Jeova orientason ku no pirsisa del pa toma bon disisons.    

8. Kuma ku palabras ku sta na Isaias 30:20, 21 kumpri na tempu antigu?

⁸ Lei Isaias 30:20, 21. Oca ku tropas di Babilonia nvadi Jerusalen pa un anu i meiu, povu pasa pa sufrimentu garandi, i kila bin sedu suma pon ku yagu. Ma, di akordu ku versikulu 20 ku 21, Jeova purmiti judeus di kuma, se ripindi i e muda se komportamentu, i na salva elis. Oca i na fala di Jeova suma se “pursoris” b, ku sedu, se “Nsinadur mas Garandi”, Isaias purmiti povu di kuma, Jeova na nsina elis kuma ke pudi adoral di manera ki na seta. Es palabras kumpri oca ku judeus libertadu di Babilonia. Jeova mostra sedu Nsinadur mas Garandi pa relis, i bas di si orientason, si povu sai ben na adoral mas, di un manera puru. No sta kontenti dimas pabia Jeova i no Nsinadur mas Garandi aos.

9. Di kal manera ku no ta risibi orientason di Jeova aos?

⁹ Na si komparason ki kontinua fasi, Isaias fala kuma no sedu suma alunus ku sta na nsinadu pa Jeova di dus maneras. Purmeru, Isaias fala: “Bu pursoris ka na sukundi mas di bo; bu uju na oja elis.” Nes komparason, Isaias fala kuma Pursor firma dianti di si alunus. Aos no tene privileẑiu garandi di nsinadu pa Deus. Kuma ku Jeova ta nsinanu? I ta fasil atraves di si organizason. No ta gardisi ciu pa orientasons klaru ku no ta risibi di organizason di Jeova! Instrusons ku no ta risibi na no runions di kongregason,  asembleias ku kongresus, tambi atraves di publikasons, programas di JW Broadcasting i di manga di utrus maneras, ta judanu na mumentus difisil pa no nguenta ku alegria.

10. Di kal manera ku no ta obi ‘vos ku sta no tras’?

¹⁰ Isaias mostra sugundu manera ku Jeova ta nsinanu. I fala sin: “Bu na obi vos di kil ku sta bu tras”. Profeta Isaias sta na fala di Jeova suma un pursor atentu ku sta na yanda tras di si alunus, i na gia elis i konta elis kal kamiñu ke dibi di bai. Aos no ta obi vos di Deus no tras. Di kal manera? Palabras nspiradu di Deus skirbidu na Biblia manga di tempu atras. Asin, ora ku no na lei Biblia i ta sta suma no na obi vos di Deus no tras. — Isa 51:4.

11. Ke ku no pirsisa di fasi pa nguenta ku alegria, i pabia di ke?

¹¹ Kuma ku no pudi benefisia di tudu orientason ku Jeova ta da atraves di si organizason i ku si Palabra? Nota di kuma Isaias fala di dus kusa. Purmeru, “es ki kamiñu”. Sugundu, “yanda nel.” (Isa 30:21) I ka basta so kunsi “kamiñu.” No pirsisa tambi di “yanda nel.” Atraves di si Palabra juntu ku splikasons di si organizason, Jeova ta nsinanu ke ki misti pa no fasi. Tambi no ta nsinadu kuma ku no pudi aplika kusas ku no aprindi. Pa nguenta ku alegria na no sirvisu pa Jeova, no pirsisa di fasi es dus kusas. So asin ku no pudi risibi benson di Jeova.

12. Di akordu ku Isaias 30:23-26, kuma ku Jeova ta bensua si povu?

¹² Lei Isaias 30:23-26. Kuma ku es profesia kumpri na judeus ku riba pa tera di Israel dipus de libertadu di Babilonia? Jeova da elis manga di kusas pa juda elis vivi i kontinua sirbil. Jeova da si povu manga di kusas di kume. Ma mas importanti, i da elis tudu ke pirsisa del pa e pertusi del, i kumsa adoral mas di un bon manera. Na ki tempu, povu di Deus nunka ciga di risibi manga di bon kusas di Deus. Versikulu 26 mostra di kuma Jeova da elis mas lus, ku sedu, i juda elis ntindi si Palabra. (Isa 60:2) Bensons di Jeova juda si servus kontinua sirbil ku alegria i ku forsa, pabia di “kontentamentu di korson”. — Isa 65:14.

13. Kuma ku profesia aserka di ribanta adorason puru kumpri na no tempu?

¹³ Sera ki profesia aserka di ribanta adorason puru aplika pa nos aos? Sin duvida! Di kal manera? Disna di 1919 EK,  milyons di jintis libertadu di katiberasku di Garandi Babilonia, ku sedu, tudu grupu di riliẑions falsu. E lebadu pa un lugar mas minjor di ki Tera di Purmesa na Israel. E lebadu pa paraísu spiritual. (Isa 51:3; 66:8) Ke ki paraísu spiritual?

14. Ke ki paraísu spiritual, i ba kin ku sta na vivi la aos? (Jubi Palabra ku Splikadu.)

¹⁴ Disna di 1919 EK, unjidus sta kontenti di vivi na paraísu spiritual. c Konformi tempu na pasa, kilis ku tene speransa di vivi na Tera, ku sedu, “utru karnel,” yentra tambi nes tera spiritual, i e tene manga di bensons di Jeova. — Jon 10:16; Isa 25:6; 65:13.

15. Nunde ku paraísu spiritual sta nel?

¹⁵ Nunde ku tera o paraísu spiritual sta nel aos? No pudi oja adoraduris di Jeova na tudu parti di mundu. Pa kila, paraísu spiritual sta na tudu kau ke sta. Asin, i ka mporta nunde ku no mora na Tera, no pudi fasi parti di paraísu spiritual, si no sedu ativu na apoia adorason di bardadi. 

16. Kuma ku no pudi kontinua oja bonitasku di paraísu spiritual?

¹⁶ Entri kusas ku no dibi di fasi pa kontinua na paraísu spiritual, i di apresia ciu kongregason kriston na mundu ntidu. Kuma ku no pudi fasi kila? Ora ku no konsentra na bonitasku, i ka na imperfeisons di no ermons ku irmas. (Jon 17:20, 21) Pabia ki es i importanti dimas? Pensa nes komparason. No ta spera oja diferenti tipus di arvuris na un parki o jardin bonitu. Di mesmu manera, na no kongregasons aos, i ten diferenti tipus di jintis ku sedu suma arvuris. (Isa 44:4; 61:3) No pirsisa di tene sertesa di kuma no kontinua konsentra na bonitasku di “matu,” i ka na imperfeisons di kada “arvuris” ku sta pertu di nos. No ka dibi di disa pa no propi imperfeisons ku di utrus ermons na kongregason, distrainu di bonitasku di kongregason kriston ku sta unidu na mundu ntidu.

17. Ke ku kada un di nos pudi fasi pa kontribui pa union di kongregason?

 ¹⁷ Ke ku kada un di nos pudi fasi pa manti kongregason unidu? No pudi sedu kilis ku ta pui pas na metadi di jintis. (Mat 5:9; Rom 12:18) Kada bias ku no ta toma diantera na fasi pas ku utrus na kongregason, no ta sta na aumenta bonitasku di paraísu spiritual. No dibi di lembra di kuma, Jeova tisi kada un di nos ku sta na paraísu spiritual pa adorason puru. (Jon 6:44) Imaẑina kuma ku Jeova ta sta kontenti ora ki ojanu na fasi sforsu garandi pa aumenta pas ku union, na metadi di si servus ku tene balur pa rel! — Isa 26:3; Aẑeu 2:7.

18. Na ke ku no dibi di medita sempri nel, i pabia?

¹⁸ Kuma ku no pudi benefisia ciu di bensons ku no ta risibi suma servus di Deus? No pirsisa di pensa ciu na ke ku no studa na Palabra di Deus i na no publikasons basiadu na Biblia. Es tipu di studu ku meditason, na judanu tene maneras di sedu di un kriston ku na lebanu mostra amor pa no “ermons”, i ‘ama n̈utru di tudu no korson’ na kongregason. (Rom 12:10) Ora ku no medita na bensons ku no tene gosi, no ta torna no amisadi ku Jeova mas forti. Ora ku no pensa aserka di bon kusas ku Jeova purmiti danu na futuru, no ta manti no speransa di sirbil pa sempri mas forti. Tudu es na judanu sirbi Jeova ku mas alegria desdi gosi.

19. (a) Di akordu ku Isaias 30:18, kal sertesa ku no dibi di tene? (b) Ke ku pudi judanu nguenta ku alegria?

¹⁹ Jeova “na lanta” pa nos ora ki kaba ku es mundu mau. (Isa 30:18) No tene sertesa di kuma, Jeova i “Deus justu”, i ka na disa pa mundu di Satanas kontinua mas di ki kil ki pirsis. (Isa 25:9) No na pera ku pasensa ki dia ku Jeova na libertanu. Na mesmu tempu, no sta disididu pa kontinua da balur pa privileẑiu di orason, studa i aplika Palabra di Deus i medita na no bensons. Ora ku no fasil, Jeova na judanu nguenta ku alegria na no adorason pa rel.