STORIA DI VIDA
“N mistiba tarbaja pa Jeova”
NO SANA mon pa dispidi un grupusiñu di jintis ku no visitaba pertu di tabanka di Granbori, ku sta dentru di matu garandi na Surinami. No yentra na un kanua, no bai pa riu Tapanaoni. Dipus, no pasa na riu ku tene korenti di yagu forti, ventuiña ku sta fora di mutur maja na pedra. Logu, parti di dianti di kanua yentra na riu, i yagu rukuji na kanua. N staba ku medu. Mesmu si N ta viaẑaba pa manga di anus na kanua suma superintendenti di sirkuitu, N ka sibiba nada!
Antis di N konta ke ku kontisi dipus, pera N konta kuma ku N kumsa sirvisu di tempu kompletu.
N padidu na 1942 na ilia bonitu di Karibi na Kurasau. Ña pape i di Surinami, ma i bai pa ilia pa tarbaju. Manga di anu antis di N padidu, i sedu un di purmerus Tustumuñas di Jeova ku batisadu na Kurasau. a I ta studaba Biblia ku nos kada semana, mesmu si no ka ta mistiba studa utrora. Ocan ku 14 anu, ña pape munda ku nos tudu pa Surinami pa kuida di si mame ku tene idadi.
BON AMIGUS JUDAN
Na Surinami, N kumsa ku junta ku jovens na kongregason ku ta pegaba tesu na sirbi Jeova. E mas mi garandi un bokadu, e staba na sirbi suma pionerus regular. Ora ke na papia aserka di spiriensias ke tene na pregason, se rostu ta mostraba kuma e sedu filis. Dipus di runions ami ku ña amigus, no ta teneba kombersas aserka di asuntus di Biblia, utrora i ta sedu fora ora ku no na jubi strelas. Es amigus judan ntindi ke ku N mistiba na ña vida; N mistiba tarbaja pa Jeova. Pa kila, N batisa ku 16 anu. Dipus, ku 18 anu N kumsa sirvisu di pioneru regular.
N APRINDI LISONS IMPORTANTI
Oca N na sirbi suma pioneru na Paramaribu.
N aprindi manga di lisons suma pioneru, i es judan tudu tempu ku N pasa na sirvisu di tempu kompletu. Pur isemplu, un di purmeru lisons ku N aprindi i di importansia di trena utrus. Oca ku N kumsa sirvisu di pioneru, un misionariu comadu Willem van Seijl mostra interesi na mi. b I nsinan manga di kusas aserka di kuma ku N pudi kuida di responsabilidadis na kongregason. Na ki tempu, N ka teneba nin un ideia di kuma N pirsisaba di manga di trenamentu. Un anu dipus, N disignadu suma pioneru spesial, dipus N kumsa ku kuida di grupus isoladu ku sta dentru di matu garandi na Surinami. N na gardisi ciu pa trenamentu ku ermons dan, oca N pirsisaba del! Disna di la N ta buska sigi se isemplu, N ta toma tempu pa trena utrus.
Sugundu lison ku N aprindi i di kuma, i bon leba un vida simplis i ben organizadu. Na kumsada di kada mis, ami ku ña kumpañer di sirvisu, no ta tenta fasi planu di ke ku no pirsisa del na semanas ku na bin. Dipus, un di nos ta bai pa prasa i kumpra ke ku no pirsisa del. No tenba di usa diritu no diñeru di kada mis, i njita kusas ku no tene pa i pudi ciga te fin di mis. Ora ku no sta na matu, puku jinti o talves ningin ka pudi judanu, si un di kusas ku no tene kaba. N fia di kuma aprindi vivi di manera simplis i ben organizadu judan konsentra na tarbaju di Jeova duranti tudu ña vida.
Terseru lison ku N aprindi i nsina jintis na lingua ke mama. N ta papia Olandes, Inglis, Papiamentu, ku Sranantongu (ku kunsidu tambi suma Sranan), ku sedu linguas ku ta papiadu na Surinami. Ma na matu garandi, N nota di kuma jintis ta reaẑi mas minjor pa bon noba, ora ku no prega elis na lingua ke mama. N nota kuma N tene difikuldadi na papia alguns des linguas, suma Saramakanu, ku ta usa tons altu ku bas. Ma sforsu ku N fasi bali pena. Pa manga di anus, N konsigi nsina bardadi pa manga di jintis pabia N pudi papia lingua ke mama.
N pasa spiriensias ku pui utrus fika mal. Pur isemplu, N mistiba punta un studanti di Biblia ku ta papia Saramakanu kuma ki staba na sinti, suma i teneba dur di stomagu. Ma na bardadi N puntalba si kontra i preña! Ma ki purgunta pulba pa i fika mal. Apesar di erus suma es, N ta tenta sempri papia lingua di jintis di tiritoriu ku N disignadu.
N SETA UTRUS RESPONSABILIDADIS
Na 1970, N disignadu suma superintendenti di sirkuitu. Ki anu N apresenta un programa ku ta mostra fotos, pa manga di grupus isoladu na matu garandi. Es programa tene tema “Visita à Sede Mundial das Testemunhas de Jeová”. Pa visita es ermons ku irmas, ami ku alguns ermons no ta usa kanua pa ciga la. Na no kanua no ta leba gerador, reserva di gasolina, kanderus, ku ekipamentu pa mostra fotos. Ora ku no ciga no dibi di karga tudu ki material pa matu, nunde ku no na mostra programa. Ma ke ku N mas ta lembra del nes bias, i kuma ku jintis nes zonas isoladu gosta ciu des programas. N staba kontenti di juda utrus aprindi aserka di Jeova ku parti di si organizason ku sta na Tera. Oja kuma ku utrus pertusi di Jeova, fasin sinti kontenti di kuma N fasi si tarbaju.
N MARA KORDA DI TRIS FIU
Ami ku Ethel oca ku no kasa na Setembru di 1971.
Sedu solteru ta pui pa i sedu mas fasil kumpri ña disignason, ma mesmu asin N mistiba kasa. Pa kila, N kumsa ku ora aserka di ki asuntu, pa oja un minjer ku na sirbi ku alegria juntu ku mi, nes disignason difisil di tempu kompletu na matu garandi. Serka di un anu mas tardi, N kumsa ku namora ku Ethel un pionera spesial, ku staba dispostu pa tarbaja duru pa Jeova, mesmu si ka seduba fasil pa rel. Desdi ocal joven Ethel ta dimiraba ciu apostolu Paulu, i mistiba fasi tudu ki pudi na pregason suma el. No kasa na Setembru di 1971 i no kumsa ku sirbi na sirkuitu suma kasal.
Familia di Ethel ka teneba manga di kusas material oca ki na kirsi, pa kila, i adapta ben pa tarbaju di sirkuitu na matu garandi. Pur isemplu, ora ku no na purpara pa visita kongregason na fundu di matu, no ka ta leba manga di kusas. No ta laba ropas, tambi no ta laba kurpu na riu. No kustuma tambi kume kualker kusa ku no ermons sirbinu, suma linguanas, pirañas, o kualker kusa ke montia na matu o ke paña na rius. Ora ki ka ten pratu no ta kuma na fojas di banana. Ora ki ka ten kujer o garfu no ta kume ku mon. Ami ku Ethel no sinti di kuma fasi sakrifisiu juntu ora ku no na tarbaja pa Jeova, judanu torna un korda di tris fiu. (Ekl 4:12) No ka na torkia ki spiriensias ku nada!
Ki storia ku N kontaba na kumsada i oca ku N staba na riba di un bias di un zona isoladu na matu. Ora ku kanua yentra nunde ku korenti di yagu forti, i ta rukuji logu na yagu, ma i ta sai rapidu. Filismenti, no pui salva vida i no ka kai na yagu. Ma yagu entra ciu na kanua. No bota kumida ku staba na kasarolas, i dipus no usa elis pa tira yagu na kanua.
Suma no pirdi no kumida, no kumsa ku piska oca no kontinua bias na riu. Ma
no ka paña nada. Pa kila no ora Jeova, no pidil pa i patinu kumida pa ki dia. Logu dipus ku no ora, un ermon lansa ridia i paña un pis garandi, i anos sinku no kumel ki di noti i no farta.OMI, PAPE I SUPERINTENDENTI DI SIRKUITU
Dipus di sinku anu di tarbaju di sirkuitu, ami ku Ethel no risibi un benson ku no ka spera, no na tene fiju. N kontentiba ku notisia, ma N ka sibiba kuma ku es na afeta no vida. Ami ku Ethel no teneba diseẑu forti di kontinua na sirvisu di tempu kompletu, si pusivel. Na 1976 no fiju Ethniël padidu. No sugundu fiju, Giovanni, padidu dus anu i meiu dipus.
N sta na mati batismu na riu Tapanaoni pertu di Godu Olu na lesti di Surinami na 1983.
Na ki tempu, pabia di nesesidadi na Surinami, filial fasi aranẑu pa N kontinua sirbi na sirkuitu nkuantu no na kriaba no fijus. Oca ku no fijus sedu joven, N disignadu pa tarbaja na sirkuitu ku tene puku kongregasons. Normalmenti, es ta pirmitin sirbi alguns semana kada mis suma superintendenti di sirkuitu i tempu ku sobra, N ta sirbi suma pioneru na kongregason nunde ku no disignadu. Ethel ku no fijus ta kumpañan ora ku N na visitaba kongregasons ku sta pertu nunde ku no mora. Ma N ta viaẑaba ami so, ora ku N na visita kongregasons i fasi asembleias na matu.
Na tarbaju di sirkuitu, N ta viaẑa sempri na kanua pa visita kongregasons isoladu.
N tenba di fasi bon programa, pa N pudi kuida di tudu ña responsabilidadis. N ta sertifikaba pa tene studu di familia kada semana. Ora ku N bai visita kongregasons na matu, Ethel ta fasi studu di familia ku no fijus na kasa. Ma sempri ki pusivel, no ta fasi kusas juntu na familia. Tambi ami ku Ethel no ta kujiba sempri bon kusas pa divirti ku no fijus. No ta juga jugus o visita kaus interesanti pertu di kasa. Manga di bias N ta tarda pa durmi pa pudi purpara disignasons teokratiku. Ethel seduba suma minjer jiru ku faladu del na Ditus 31:15. I ta lanta madrugada pa no pudi lei testu di dia na familia i mata-bica juntu, antis di no fijus bai pa skola. N na gardisi ciu pa minjer ku N tene, ku ta fasi sempri sakrifisiu pa judan kuida di tudu responsabilidadis ku Jeova dan!
Suma papes no ta tarbaja duru pa juda no fijus ama Jeova i ama pregason. No misti pa no fijus kuji sirvisu di tempu kompletu suma se okupason, i ka pabia no misti pa e fasil, ma elis ku disidi fasil.
Sempri no ta papia ku elis kuma ku sirvisu di tempu kompletu pudi juda elis tene kontentamentu. Sin njuti difikuldadis, no mas ta fala di kuma ku Jeova juda i bensuanu suma familia. Tambi no ta sertifika pa no fijus tene amisadi ku kilis ku pui Jeova na purmeru lugar na se vida.Jeova danu tudu ku no pirsisa del pa kria un familia. Na bardadi, N ta fasi sempri ke ku N dibi di fasi pa apoia ña familia. Spiriensia ku N pasa na matu garandi suma pioneru spesial solteru, nsinan popa diñeru pa kumpra kusas ku N na bin pirsisa del. Ma mesmu si no fasi no minjor, utrora no ka ta tene tudu kusas ku no pirsisa del. Na ki mumentus, N fia di kuma Jeova judanu. Pur isemplu, di 1986 te 1992 i tenba gera sivil na Surinami. Na ki anus, te mesmu i seduba difisil tene kusas basiku. Mesmu asin Jeova danu ke ku no pirsisa del. — Mat 6:32.
SI N JUBI PA TRAS
Di skerda pa direita: Ami ku ña minjer, Ethel.
No fiju mas garandi, Ethniël, ku si minjer Natalie.
No fiju Giovanni ku si minjer Christal.
Na tudu no vida Jeova judanu sedu filis i sta kontenti. No fijus sedu un benson garandi pa nos, i kria elis pa sirbi Jeova sedu un privileẑiu. No kontenti manera ke kuji tambi sirvisu di tempu kompletu suma se okupason na vida. Ethniël ku Giovanni fasi skolas ku gosi ta comadu Skola pa Ivanjilizaduris di Renu, i gosi e sta na sirbi na filial di Surinami juntu ku se minjeris.
Ami ku Ethel no beju ja gosi, ma no kontinua okupadu na tarbaju di Jeova suma pionerus spesial. Na bardadi, no sta okupadu dimas, tok N ten ku ranja tempu pa aprindi nada! Ma N ka ripindi. Si N jubi pa tras, ku tudu sinseridadi, N sinti di kuma disidi yentra na sirvisu di tempu kompletu ocan joven, seduba un di minjoris disison ku N ciga ja di toma.