Na ki anu, organizason fasi alguns mudansas ku na juda pa i ten union entri Studantis di Biblia. Sintinela kumsa ku publika splikasons di versikulus ke ta konsidera na se Orasons, Lovor ku Runions pa Tustumuñu di kada semana. Alen di kila, Studantis di Biblia fasi un kalendariu ku tene lista di mesmu versikulus ke na papia del kada semana, suma tambi un inu ku pudi kantadu na studu pesual ku adorason na familia.

Na se runions, Studantis di Biblia ta da “tustumuñu”, ku sedu e ta konta spriensias ke tene na pregason, e ta gardisi Jeova, e ta kanta, i te mesmu e ta ora. Eva Barney ku batisa na 1923 oca ki tene 15 anu, fala sin: “Si bu misti da tustumuñu bu ta lanta bu fala un kusa suma es: ‘N mistiba gardisi Siñor pa tudu bondadi ki mostran.’” Alguns ermons gosta ciu di da tustumuñu. Irma Barney kontinua i fala sin: “Un ermon di idadi comadu Godwin teneba manga di kusas pa gardisi Siñor. Ma ora ki si minjer nota kuma kin ku staba na diriẑi runion sta ŝatiadu ku si omi, i ta toka si omi, kila ta para papia i sinta.”

Kada turma (kongregason) ta fasi Orason, Lovor ku Runion di Tustumuñu spesial, un bias kada mis. Sintinela di 1 di Abril di 1923, fala sin aserka des runion: “Metadi di runion dibi di usadu pa da tustumuñu, ku sedu konta spriensias di pregason i nkoraẑa tarbajaduris. . . . No fia kuma es runions nkoraẑanti na pui ermons pertusi di n̈utru.”

Un tarbajadur di turma (publikadur di kongregason) ku benefisia ciu des runions i Charles Martin di 19 anu di idadi, el i di Vancouver, na Kanada. Mas tardi i fala sin: “l li ku N aprindi pa purmeru bias kuma ku N pudi papia ku jintis na pregason. Manga di bias un algin ta konta spiriensia ki tene na pregason di kasa pa kasa. Es dan manga di ideias di ke ku N pudi fala i kuma ku N pudi vensi manga di obstakulus.”

“Dias di sirvisu” juda tambi pa i ten union na organizason. Sintinela di 1 di Abril di  1923, fala sin: “Asin, anos tudu no na sedu unidu na mesmu tarbaju . . . , dia di sirvisu na sedu tersa-fera, 1 di Maiu di 1923. Dipus, tudu purmeru tersa-fera di kada mis na sedu dia di sirvisu . . . Kada membru di kada turma dibi di partisipa na tarbaju.”

Te mesmu Studantis di Biblia joven partisipa nes tarbaju. Hazel Burford, ku teneba 16 anu na ki tempu, fala sin: “Bulitin ta teneba apresentasons (ku sedu suma mudelu pa kombersas) pa no pudi nkorna. a N ta partisipaba ku zelu na tudu es atividadis juntu ku ña dona macu.” Ma, irma Burford fika surprendidu di ke ku un ermon pensa di si pregason. I fala sin: “Un ermon di idadi nega far di kuma N ka dibi di papia ku jintis. Na ki tempu, alguns ka ntindiba di kuma tudu Studantis di Biblia nkluindu ‘rapasis ku bajudas,’ dibi di partisipa na ngaba no Kriadur.” (Sal 148:​12, 13) Ma irma Burford kontinua. I fasi parti di kilis ku forma na sugundu turma di Skola di Jiliadi, dipus i sirbi suma misionariu na Panama. Ku tempu es ermons bin muda se manera di oja jovens na pregason.

Kongresus juda tambi ermons sedu mas unidu. Na manga des kongresus i ta ten un dia ku ta dedikadu pa sirvisu. Pur isemplu, na kongresu ku fasidu na Winnipeg, na Kanada, tudu kilis ku mati kongresu kumbidadu pa prega na ki sidadi, dia 31 di Marsu. Manga di jintis ta kontaktadu nes dias di pregason, i da bon rusultadu. Dia 5 di Agustu, serka di 7.000 jintis mati utru kongresu na Winnipeg. Na ki tempu, es seduba asistensia mas garandi ku ciga di ten na un kongresu na Kanada.

Kongresu mas importanti ku povu di Jeova fasi na 1923 seduba na Los Angeles, na Kalifornia dia 18 te 26 di Agustu. Na semanas antis di kongresu, jornalis fasi  publisidadi di kongresu i Studantis di Biblia distribui mas di 500 mil tratadus. I tenba kartazis ku anunsia kongresu na transportis publiku i na karus partikular.

Na sabadu 25 di Agustu, ermon Rutherford fasi un diskursu ku tene tema: “Karnelis ku Kabras”. Nes diskursu i identifika “karnelis” di manera klaru suma jintis justu ku na bin vivi na paraísu li na Tera. I lei tambi resoluson: “Un Avisu.” Es resoluson kondena riliẑions ku ta fala e sedu kristons, i nsentiva jintis di korson sinseru pa e separa di “Garandi Babilonia”. (Apok 18:​2, 4) Mas tardi, Studantis di Biblia zelosu na tudu parti di mundu, distribui milyons di kopia des resoluson.

Na ultimu dia di kongresu, mas di 30 mil jintis na asistensia obi leitura publiku (ku sedu diskursu) di ermon Rutherford: “Tudu nasons sta na avansa pa Armajedon, ma milyons di jintis ku sta bibu gos ka na muri mas.” Suma e na spera risibi manga di jintis, Studantis di Biblia luga nobu stadiu ku kumsa kumpudu na Los Angeles. Pa tudu jintis konsigi obi, ermons usa sistema di autoflanti di stadiu, ku seduba un teknoloẑia nobu na ki tempu. Manga di jintis obi programa atraves di radiu.

Na anu 1923, tarbaju di pregason spalia pa Afrika, Europa, India ku Amerika di Sul. Na India, ermon A. J. Joseph kuida di pruduson di publikasons na lingua Hindi, Tamil, Telugu ku Urdu, apesar di staba na kuida di si minjer ku si seis fiju.

Na Sera Lioa, Studantis di Biblia Alfred Joseph ku Leonard Blackman skirbi pa sedi mundial na Brooklyn, Nova York, e pidi ajuda. Dia 14 di Abril di 1923, e risibi resposta. Alfred fala sin: “Un sabadu di noti, N risibi un telefonema ku N ka speraba.” I obi un vos forti ku falal: “I abo ku skirbiba pa Watch Tower Society bu pidi pregaduris?” Alfred ruspundil: “Sin i ami.” I seduba vos di William R. Brown. I falal: “E mandan.” Ki dia propi ki bin di Karibi ku si minjer, Antonia, i ku si dus fijus femia, Louise ku Lucy. I ka tarda, ermons oja ermon Brown ku si familia.

Alfred kontinua i fala: “Oca ku sol mansi, ami ku Leonard no staba na studa Biblia  suma ku no ta fasi kada semana, i di repenti no oja un algin altu ku firma na porta. I seduba ermon Brown. El i seduba zelosu pa bardadi tok i mistiba kumsa da jintis publikasons na utru dia.” Na menus di un mis, ermon Brown da tudu publikasons ki binba kel. I ka tarda, i risibi mas di 5 mil livrus, i dentru di puku tempu i bin pirsisadu mas di livrus. Ermon Brown ka kunsiduba suma bindudur di livru. Duranti tudu si vida suma un servu zelosu di Jeova, i ta usaba sempri Biblia na si diskursus, e ku manda i dadu nomi di Biblia Brown.

Na Almaña, ermons disidi muda skritoriu di filial ku staba na Barmen, pabia i pikininuba. Tambi e obiba kuma i ka na tarda, tropas fransis na nvadi ki sidadi. Studantis di Biblia oja un prediu ku staba na Magdeburg ku parsiba sedu bon pa se tarbaju di mprimi publikasons. Dia 19 di Juñu ermons kaba ruma materialis di mprimi ku utru kusas e muda pa nobu Betel na Magdeburg. Ki dia propi ku sedi mundial informadu kuma mudansa kaba fasidu, notisias na jornal konta di kuma Fransa toma sidadi di Barmen. Ermons oja mudansa suma prova di benson ku proteson di Jeova.

Na Brazil, George Young, ku viaja ciu pa spalia bon noba, stabilisi un nobu filial i kumsa publika Sintinela na purtugis. So na puku misis i disa mas di 7 mil publikasons. Oca ki ciga Brazil i da Sarah Ferguson un oportunidadi garandi. Sarah kumsa ku lei Sintinela desdi 1899, ma nunka i tene oportunidadi di mostra si dedikason atraves di batismu. Alguns misis dipus, irma Ferguson ku si kuatru fijus konsigi da es pasu importanti, ku sedu batismu.

Na fin di anu, Sintinela di 15 di Dizembru di 1923 konta kuma ku mudansas na runions, na pregason ku kongresus afeta Studantis di Biblia. I fala sin: “I fasil oja di kuma turmas . . . sta ben na sintidu spiritual . . . No purpara pa fasi mas tarbaju i no kontinua sirbi Deus ku zelu i kontentamentu duranti anu di 1924.”

1924 seduba tambi un anu interesanti pa Studantis di Biblia. Ermons na Betel staba na tarbaja duranti misis, na un terenu ku sta na un ilia pertu di sedi mundial na Brooklyn. Predius ku kumpuduba na ki nobu kau kaba na kumsada di 1924, i juda na uni ermons i spalia bon noba di manera ku nunka i cigaba di fasidu antis.