1. Pabia ki pudi sedu difisil pa no obdisi?

 SERA ki utrora bu ta sinti di kuma i difisil obdisi? I asin ku rei Davi sintiba, e ku manda i fala Deus na orason: “Pui dentru di mi vontadi di obdisiu.” (Sal 51:​12, Tradução do Novo Mundo) Davi amaba Jeova. Ma utrora, i ta seduba difisil pa i obdisi, suma ki ta kontisi ku nos. Pabia di ke? Purmeru, i pabia di kuma no yarda tendensia di disobdisi. Sugundu, Satanas ta tentanu tudu ora pa no rebela suma el. (2 Kor 11:3) Terseru, no sta na vivi na un mundu nunde ku manga di jintis gosta di rebela, i kila i “spiritu ku na manda te gosi na jinti ku ta disobdisi Deus.” (Ef 2:2) No dibi di sforsa ciu i ka so pa luta kontra tendensia di pekadu, ma tambi pa risisti preson ku Diabu ku si mundu ta pui riba di nos, pa lebanu disobdisi. No dibi di sforsa pa obdisi Jeova i obdisi kilis ki da otridadi.

2. Ke ku palabras ‘ta obdisi’ signifika? (Tiagu 3:17)

² Lei Tiagu 3:​17, NOBO TESTAMENTO NA CRIOL. Tiagu nspiradu pa skirbi di kuma jintis jiru ‘ta obdisi’. Pensa na ke ku es signifika. No dibi di tene diseẑu ku vontadi di obdisi kilis ku Jeova da sertu otridadi. Ma, Jeova ka misti pa no obdisi un algin ku falanu pa no fasi un kusa, ku sta kontra si mandamentus. — At 4:​18-20.

3. Pa Jeova, pabia ki importanti pa no obdisi kilis ku tene otridadi riba di nos?

³ No pudi tene tendensia di obdisi mas Jeova, di ki obdisi un pekadur. I normal pa i sedu asin, pabia Jeova ta danu sempri bon orientason. (Sal 19:7) Ma no ka pudi fala mesmu kusa di pekaduris ku tene otridadi. Ma nin ku  sin, Jeova da sertu otridadi pa papes, pa guvernus ku ansions. (Dit 6:20; 1 Tes 5:12; 1 Ped 2:​13, 14) Ora ku no obdisi elis, na bardadi no ta sta na obdisi Jeova. No jubi kuma ku no pudi obdisi pekaduris ku Jeova da otridadi, mesmu si utrora no oja kuma i difisil seta i sigi orientason ke danu.

4. Pabia ku manga di mininus ka ta obdisi se pape ku se mame?

⁴ Jovens na vivi na un mundu nunde ku se kolegas tene kustumu di ka “obi se pape ku se mame”. (2 Tim 3:​1, 2) Pabia ku manga delis ka ta obdisi se pape ku se mame? Alguns ta fala di kuma se pape ku se mame ta kritika elis ciu dimas. Fijus ta faladu pa e fasi un kusa ku se pape ku mame ka ta fasi. Utrus ta oja konsiju di se pape ku se mame suma un kusa ku ka sta na moda, ku ka fasi sintidu o ku sedu duru dimas. Si abo i joven, sera ki bu ciga di pensa asin? Manga delis ta oja di kuma i difisil obdisi es mandamentu di Jeova: “Bo obdisi bo papes, pabia i bon pa bo fasi asin, suma ku bo sedu di Siñor.” (Ef 6:1) Ke ku pudi judau obdisi es mandamentu?

5. Pabia ku Jesus sedu minjor isemplu di un joven ku obdisi si pape ku si mame? (Lukas 2:​46-52)

⁵ Bu pudi aprindi obdisi atraves di minjor isemplu di obdiensia, ku sedu di Jesus. (1 Ped 2:​21-24) El i seduba perfeitu, ma si pape ku si mame i imperfeitu. Jesus rispita si pape ku si mame mesmu ora ke yara o utrora e ka ntindil. (Sai 20:12) Jubi ke ku kontisi oca Jesus tene 12 anu. (Lei Lukas 2:​46-52.) Si pape ku si mame ka nota di kuma Jesus fika na Jerusalen. José ku Maria ku tene responsabilidadi di sertifika di kuma tudu se fijus sta ku grupu ku na riba pa kasa dipus di festa di paskua. Oca ku José ku Maria bin oja Jesus, Maria kulpa Jesus pa kudadi ki pui elis nel! Jesus pudiba mostra elis di kuma, i ka el ki kulpadu. Ma en ves di kila, i ruspundi si pape ku si mame di un manera simplis i ku rispitu. José ku Maria “ka ntindi palabra ki fala elis.” Mesmu asin, Jesus “kontinua na obdisi elis”.

6-7. Ke ku pudi juda jovens obdisi se pape ku se mame?

⁶ Suma joven, sera ki bu ciga ja di oja di kuma i difisil obdisi bu pape ku bu mame ora ke yara o ora ke ka ntindiu? Ke ku pudi judau? Purmeru, pensa na kuma ku Jeova ta sinti si bu obdisi. Biblia fala kuma ora ku bu obdisi bu pape ku bu mame, “Siñor ta kontenti”. (Kol 3:20) Jeova sibi di kuma utrora bu pape ku mame pudi ka ntindiu o e pudi kria regras ki ka fasil obdisi. Mesmu asin, ora ku bu disidi obdisi elis, Jeova ta kontenti.

⁷ Sugundu, pensa na kuma ku bu pape ku mame ta sinti. Ora ku bu obdisi bu pape ku bu mame, bu na pui pa e kontenti i e na konfia na bo. (Dit 23:​22-25) Kila tambi pudi pertusiu mas delis. Un ermon na Beljika comadu Alexandre fala sin: “Oca ku N kumsa fasi sempri ke ku ña pape ku ña mame ta falan, apartir di ki mumentu no relason sedu mas minjor.” b Terseru, pensa na kuma ku obdisi pudi judau gosi i tambi na futuru. Paulu, ku mora na Brazil fala sin: “Aprindi  obdisi ña pape ku ña mame, judan obdisi Jeova ku utrus ku tene otridadi.” Joven, Palabra di Deus dau un motivu garandi di obdisi bu pape ku bu mame. I fala sin: “Pa tudu kuriu diritu; bu tene vida kumpridu na tera.” — Ef 6:​2, 3.

8. Pabia ku manga di jovens ta disidi obdisi se pape ku se mame?

⁸ Manga di jovens oja di kuma kusas ta kuri elis diritu, ora ke obdisi se pape ku se mame. Luiza, ku mora tambi na Brazil, fala kuma na kumsada i seduba difisil pa i ntindi pabia ku si pape ku si mame tujil tene telemovel pa un tempu. I nota kuma maioria di jovens ku tene mesmu idadi ku el, tene telemovel. Ma dipus i bin ntindi di kuma si pape ku si mame staba na proteẑil. I fala i sibi di kuma, ora ki obdisi si pape ku si mame, i ka dibi di sinti suma si pirdi si liberdadi, pabia konsiju ke na dal i ke propi ki pirsisa del. Elizabeth, un irma di Stadus Unidu, ta tene difikuldadi utrora di obdisi si pape ku si mame. I fala sin: “Ora ku N ka ntindi diritu pabia ku ña pape ku ña mame pui un sertu regra, N ta lembra di regras ke puiba ku proteẑin.” Monica, ku mora na Armenia, fala di kuma kusas ta kuri sempri ben ora ki obdisi si pape ku si mame di ki ora ki ka obdisi elis.

9. Ke ku manga di jintis ta pensa aserka di obdisi lei?

⁹ Manga di jintis ta rikuñisi di kuma no pirsisa di guvernus, i di kuma pelu menus no dibi di obdisi alguns leis ku es “otridadi ku sta riba” ta pui. (Rom 13:1) Ma, es mesmu jintis ka ta muitu misti obdisi un lei ke oja di kuma i ka justu o ke oja di kuma i na iziẑi ciu dimas. Pur isemplu, pensa na pagamentu di mpustu. Na un tera di Europa, manga di jintis pensa di kuma “i bon pa ka paga mpustu si bu oja di kuma, ki mpustu i ka justu.” E ku manda sidadons di ki tera ta paga so 65 pursentu di mpustu ke dibi di paga guvernu.

10. Pabia ku no dibi di obdisi te mesmu leis ku no ka gosta del?

¹⁰ Biblia mostra di kuma guvernus di pekadur ta tisi sufrimentu, e sta bas di kontrolu di Satanas, tambi i ka na tarda e na kabadu ku el. (Sal 110:​5, 6; Ekl 8:9; Luk 4:​5, 6) I fala tambi di kuma “kin ku sta kontra otridadi i sta kontra kil ku Deus manda.” Jeova pirmiti inda pa guvernus di pekadur manda, pa ordi pudi ten, i ta spera pa no obdisi elis. E ku manda no dibi di ‘da kada kin kil ku no dibi di dal’, es nklui mpustu, rispitu ku obdiensia. (Rom 13:​1-7) No pudi oja di kuma un lei i difisil di obdisi, i ka justu o i na kusta manga di diñeru pa kumpril.  Ma no ta obdisi Jeova, i Jeova falanu pa no obdisi es otridadis nkuantu e ka pidinu pa fasi un kusa ki kontra si mandamentus. — At 5:29.

11-12. Suma ki faladu na Lukas 2:​1-6, ke ku José ku Maria fasi pa obdisi un lei ku seduba difisil, i kal ki rusultadu? (Jubi tambi diseñu ku fotos.)

¹¹ No pudi aprindi di isemplu di José ku Maria ku staba pruntu pa obdisi otridadi mesmu oca ki seduba difisil fasil. (Lei Lukas 2:​1-6.) Obdiensia di José ku Maria testadu, oca ku Maria preña i staba kuas na si ultimu mis. Mperadur Agustu pui lei di kuma tudu jintis na mperiu Romanu dibi di riba pa tera nunde ke padidu pa resensia. José ku Maria dibi di bai te Belen, un bias di 150 kilometru, i e dibi di subi i ria di manga di montañas. Es bias ka na seduba fasil pa relis, spesialmenti pa Maria. Talves e pensa na se suguransa ku suguransa di se bebe ku ka padidu inda. Ke ku na kontisi si bin padi na kamiñu? E dibi di staba preokupadu ku suguransa di bebe, pabia el ku na bin sedu Mesias. Sera ki es kusas da elis rason di ka obdisi lei di guvernu?

¹² José ku Maria ka pirmiti pa nin un des preokupason tuji elis obdisi lei. Jeova bensua se obdiensia. Maria ciga Belen diritu, i padi sin purblema, i te mesmu i juda na kumpri un profesia di Biblia! — Mik 5:2.

13. Kuma ku no obdiensia ta afeta no ermons?

¹³ Ora ku no obdisi otridadis ku sta riba, no ta benefia no kabesa i utrus tambi ta benefisia. Di kal manera? Purmeru, no ta ivita kastigu ku kilis ku ta disobdisi lei ta risibi. (Rom 13:4) No obdiensia pudi afeta kuma ku otridadis ta oja tudu Tustumuñas di Jeova. Pur isemplu, na Nijeria, manga di anus atras, tropas yentra na un Salon di Renu duranti un runion di kongregason. E staba na buska jintis ku na manifesta kontra pagamentu di mpustu. Ma se ŝef  fala tropas pa e sai na Salon, i fala sin: “Tustumuñas di Jeova ta paga sempri mpustu.” Kada bias ku bu obdisi lei, bu pudi kontribui pa bon nomi ku povu di Jeova tene. I un dia, es bon nomi pudi proteẑi bu ermons na fe. — Mat 5:16.

14. Ke ku juda un irma sta pruntu pa ‘obdisi’ otridadis ku sta riba?

¹⁴ Mesmu asin, i ka tudu ora ku no ta misti obdisi otridadis ku sta riba. Un irma ku sta na Stadus Unidu comadu Joanna fala sin: “I seduba difisil pa N obdisi, pabia alguns di ña familia sufri injustisa pabia di otridadis.” Ma Joanna sforsa ciu pa muda si manera di pensa. Purmeru, i para lei informasons ku meius di kumunikason ta skirbi kontra otridadis. (Dit 20:3) Sugundu, i ora pa Jeova judal konfia nel, en ves di konfia na mudansa di un guvernu di pekadur. (Sal 9:​9, 10) Terseru, i lei artigus na no publikasons aserka di sedu neutru. (Jon 17:16) Gosi, Joanna fala di kuma rispita i obdisi otridadi ta dal “un pas ki ka pudi splika.”

15. Pabia ki pudi sedu difisil obdisi orientason ku bin di organizason di Jeova?

¹⁵ Jeova fala pa no ‘obdisi no pastoris’ na kongregason. (Eb 13:17) Jesus no Lider i perfeitu, ma kilis ki ta usa pa toma diantera na Tera e ka sedu perfeitu. I pudi sedu difisil obdisi elis, spesialmenti si e falanu pa fasi un kusa ku no ka misti fasi. Un bias, apostolu Pedru ka mistiba obdisi. Oca ku un anju falal pa i kume limarias ku Lei di Moisés fala di kuma i ka puru, Pedru nega tris bias kuma i ka na kume! (At 10:​9-16) Pabia ki nega? Pa rel es nobu orientason ki risibi ka fasi sintidu. Pabia i kustuma fasi kusas di utru manera. Si Pedru oja di kuma i difisil obdisi orientason di un anju perfeitu, bu pudi imaẑina kuma ki na sedu inda mas difisil pa no obdisi orientason di omis imperfeitu!

16. Apostolu Paulu pudiba oja di kuma orientason ki risibi ka fasi sintidu, mesmu asin ke gora ki fasi? (Atus 21:​23, 24, 26)

¹⁶ Apostolu Paulu staba pruntu pa ‘obdisi’ mesmu oca ki risibi un orientason ki pudiba pensa di kuma i ka fasi sintidu. Kristons judeus obi notisias di kuma Paulu staba na nsina jintis “pa e bandona lei di Moisés” i pa ka e rispital. (At 21:21) Ansions kriston na Jerusalen fala Paulu pa i leba kuatru omis i bai fasi sirmonia di purifikason na templu, pa mostra di kuma i rispita lei. Ma Paulu sibi kuma kristons ka sta ja mas bas di Lei di Moisés. Tambi i ka fasi nada di mal. Mesmu asin, Paulu ka pirdi tempu. I “leba ki omis. Sol mansi, i fasi sirmonia di purifikason ku elis”. (Lei Atus 21:​23, 24, 26.) Obdiensia di Paulu juda pa i ten union. — Rom 14:​19, 21.

17. Ke ku bu pudi aprindi di isemplu di Stephanie?

¹⁷ Un irma comadu Stephanie teneba difikuldadi di seta un disison ku filial toma. El ku si omi e kontentiba di sirbi na un grupu di lingua stranjeru. Dipus filial disidi kaba ku ki grupu, i disigna elis pa kongregason ku ta papia se lingua, nunde ke staba nel. Stephanie fala sin: “N pañaba raiba maI. N ka staba konvensidu di kuma i ten nesesidadi na no lingua.” Nin ku sin, i disidi apoia es nobu orientason. I fala sin: “Ku tempu, N bin oja balur des disison, no bin sedu papes spiritual di manga di jintis na kongregason  ku se familia i ka Tustumuñas di Jeova. N kumsa studa ku un irma ku kumsa retoma si atividadis spiritual, pabia i seduba inativu. I gosi N tene mas tempu pa studu pesual.” I fala mas: “N tene un konsiensia limpu, pabia N sibi di kuma N fasi ña minjor pa sedu obdienti.”

18. Kal benefisiu ku no na tene di sedu obdienti?

¹⁸ No pudi aprindi sedu obdienti. Jesus “nsina [o aprindi] obdisi” i ka so na bon kondisons, ma na “sufrimentu” ki pasa. (Eb 5:8) Suma Jesus, manga di bias no ta aprindi obdisi na situasons difisil. Pur isemplu, na kumsada di COVID-19 no dadu orientason di para fasi runion na Salons di Renu, i para inda prega di kasa pa kasa. Sera ki seduba difisil pa bu obdisi? Nin ku sin bu obdisi. Bu obdiensia proteẑiu, i uniu ku bu ermons na fe, tambi i kontenta Jeova. Gosi, anos tudu no sta mas purparadu pa obdisi kualker instrusons ku no pudi risibi na garandi tribulason. No vida dipindi di no obdiensia! — Jo 36:11.

19. Pabia ku bu misti sedu obdienti?

¹⁹ Nes studu no aprindi di kuma obdiensia ta tisi manga di bensons. Ma no disidi obdisi Jeova pabia di amor ku no tene pa rel, i tambi no misti kontental. (1 Jon 5:3) Nunka no ka pudi paga Jeova tudu ke ki fasi pa nos. (Sal 116:12) Ma no pudi obdisil i obdisi kilis ku tene otridadi riba di nos. Si no obdisi no ta mostra di kuma no sedu jiru. I si no sedu jiru, no na pui pa Jeova kontenti. — Dit 27:11.