STUDU 39
Sera ki bu nomi sta na “libru di bibus”?
“Un libru di lembransa skirbidu si dianti aserka di kilis ku rispital”. — MAL 3:16.
KANTIKU 61 Avancem, Testemunhas!
KE KU NO NA BIN FALA DEL *
Pa manga di anus, Jeova sta na buri nomi di jintis na “libru di bibus”. (Jubi paragrafu 1 ku 2)
1. Di akordu ku Malakias 3:16, kal livru ku Jeova sta na skirbi, i ke ki tene?
PA MANGA di anus, Jeova sta na skirbi un livru spesial. Es livru tene nomis di jintis, i kumsa ku nomi di purmeru tustumuña fiel, ku sedu Abel. * (Luk 11:50, 51) Desdi ki tempu, Jeova buri nomis na ki livru, i aos i tene milyons di nomis. Na Biblia, es livru comadu di “libru di lembransa”, “libru di bibus” ku “libru ku tene nomi di jinti ku tene vida.” Nes studu, no na fala del suma “libru di bibus”. — Lei Malakias 3:16; Apok 3:5; 17:8.
2. Nomis di ba kin ku skirbidu na livru di bibus, i ke ku no dibi di fasi pa no nomi skirbidu nes livru?
2 Es livru spesial tene nomis di tudu kilis ku ta adora Jeova ku rispitu garandi, i ku ama si nomi. E na tene oportunidadi di tene vida ku ka ta kaba. Aos no nomi pudi skirbidu na ki livru, si no tene un amisadi intimu ku Jeova basiadu na sakrifisiu di resgati di si Fiju, Jesus Kristu. (Jon 3:16, 36) Anos tudu no misti pa no nomi skirbidu na ki livru, mesmu si no tene speransa di vivi na seu o na Tera.
3-4. (a) Si nes mumentu no nomi skirbidu na livru di bibus, sera ki no na vivi pa sempri? Bu pudi splika. (b) Ke ku no na fala del nes studu, ku kil ku na bin?
3 Sera ki i signifika kuma tudu kilis ku tene se nomi skirbidu na livru di bibus, tene garantia di kuma e na vivi na sempri? No pudi oja resposta des purgunta na palabras ku Jeova konta Moisés na Saida 32:33. Jeova fala: “Kin ku peka kontra mi, es ku N ta riska si nomi na ña libru.” Asin, nomis di kilis ku nes mumentu sta nes livru pudi riskadu o pagadu. I suma si na kumsada Jeova skirbi nomis ku lapis. (Apok 3:5) No dibi di tene sertesa di kuma no nomi na fika nes livru tok i skirbidu pa sempri, suma si skirbidu ku kaneta.
4 Es pudi lebanu fasi alguns purguntas. Pur isemplu, ke ku Biblia fala aserka di kilis ku se nomi skirbidu na livru di bibus, ku kilis ku se nomi ka sta la? Kal tempu ku kilis ku se nomi kontinua nes livru na risibi vida ku ka ta kaba? Ke gora di kilis ku muri sin tene oportunidadi di kunsi Jeova? Sera ki se nomi pudi skirbidu nes livru? Es purguntas na ruspundidu nes studu, ku kil ku na bin.
NOMI DI BA KIN KU STA NA LIVRU?
5-6. (a) Suma ki faladu na Filipensis 4:3, nomi di ba kin ku skirbidu na livru di bibus? (b) Kal tempu ku se nomi na bin skirbidu pa sempri na livru di bibus?
5 Nomi di ba kin ku skirbidu na livru di bibus? Pa ruspundi es purgunta no na bai papia di sinku grupu di jintis. Entri elis, nomi di alguns skirbidu na livru di bibus, ma di utrus ka skirbidu la.
6 Purmeru grupu i di kilis ku kujidu pa bai rena ku Jesus na seu. Sera ki nes mumentu se nomi sta na livru di bibus? Sin. Di akordu ku palabras di apostolu Paulu pa si kumpañeris ki “tarbaja juntu” ku el na Filipus, nomi di unjidus ku kumbidadu pa rena ku Jesus, skirbidu ja na livru di bibus. (Lei Filipensis 4:3.) Ma pa se nomi pudi fika na livru di bibus, e dibi di kontinua sedu fiel. Dipus ke risibi ultimu marka, se nomi na skirbidu pa sempri nes livru. Es pudi sedu antis de muri o antis di garandi tribulason kumsa. — Apok 7:3.
7. Kuma ku Apokalipsi 7:16, 17 judanu ntindi kal tempu ku garandi multidon di utrus karnelis, na tene se nomi skirbidu pa sempri na livru di bibus?
7 Sugundu grupu i garandi multidon di utrus karnelis. Sera ki nes mumentu se nomi skirbidu na livru di bibus? Sin. Sera ki se nomi na kontinua na livru di bibus dipus ke salva di Armajedon? Sin. (Apok 7:14) Jesus fala, esis ku parsi ku karnel na bai “pa vida ku ka ta kaba.” (Mat 25:46) Ma kilis ku salva na Armajedon, ka na risibi logu vida ku ka ta kaba. Se nomi na kontinua na livru di bibus, suma si skirbidu ku lapis. Duranti renadu di mil anu, Jesus “na sedu se bakiadur; i na leba elis pa fontis di yagu ku ta da vida.” Kilis ku obdisi orientason di Kristu, ku sedu fiel pa Jeova i ku pasa na ultimu testi, na tene se nomi skirbidu pa sempri na livru di bibus. — Lei Apokalipsi 7:16, 17.
8. Ba kin ku se nomi ka skirbidu na livru di bibus, i ke ku na kontisi ku elis?
8 Terseru grupu i kabras ku na kabadu kel na Armajedon. Se nomi ka sta na livru di bibus. Jesus fala kuma “e na bai pa kastigu ku ka ta kaba.” (Mat 25:46) Deus nspira Paulu pa falanu di kuma, “e na sufri kastigu di pirdi ntidu.” (2 Tes 1:9; 2 Ped 2:9) Tambi, tudu kilis ku duranti storia di pekaduris peka ku diskarna kontra spiritu santu, ka na tene vida ku ka ta kaba, ma e na kabadu ku el pa sempri. I sta klaru di kuma, e ka na resusitadu. (Mat 12:32; Mar 3:28, 29; Eb 6:4-6) Gosi, no na bai fala di dus grupu di jintis ku na bin lantandadu pa vivi na Tera.
KILIS KU NA BIN LANTANDADU
9. Suma ki faladu na Atus 24:15, kal dus grupu di jintis ku na lantandadu pa vivi na Tera, i kal diferensa ku ten entri elis?
9 Biblia fala di dus grupu di jintis ku na lantandadu ku speransa di bin vivi pa sempri na Tera, ku sedu, jintis “bons” ku jintis “maus.” (Lei Atus 24:15.) Jintis “bons” i kilis ku sirbi Jeova ku fidelidadi oca e staba di vida. Ma, jintis “maus” i kilis ku ka sirbi Jeova antis de muri. Na bardadi, maioria delis ka ta fasiba ke ki bon na ujus di Jeova. Suma ki dus grupu na lantandadu, sera ki no pudi fala kuma, se nomi skirbidu na livru di bibus? Pa ruspundi es purgunta, no na bai fala di kada un delis.
10. Ke ku manda jintis “bons” na lantandadu, i kal privileẑiu ku alguns delis na tene? (Jubi tambi nes Sintinela “Purguntas di kilis ku ta lei no publikasons”, ku na fala di resureison na Tera.)
10 Kuartu grupu, i jintis “bons”. Antis de muri, se nomi skirbidu na livru di bibus. Sera ki se nomi tiradu na ki livru oca ke muri? Nau, pabia e kontinua “bibu” na memoria di Jeova. Jeova “i ka Deus di mortus, ma i di kilis ki bibu. Pa el tudu sta bibu.” (Luk 20:38) Es signifika kuma ora ku jintis bons lantandadu pa vivi na Tera, se nomi na sta na livru di bibus, ma na kumsada i na skirbidu “ku lapis.” (Luk 14:14) Sin duvida, alguns di kilis ku na lantandadu na tene privileẑiu di sirbi suma “ŝefis na tudu parti di tera.” — Sal 45:16.
11. Ke ku jintis “maus” pirsisa di aprindi pa se nomi pudi skirbidu na livru di bibus?
11 Pa kabanta, no na bai fala di kintu grupu, ku sedu, jintis “maus.” Talves suma e ka kunsi leis di Jeova, e ka leba un bon vida antis de muri. Pa kila, se nomi ka skirbidu na livru di bibus. Ma, Deus na lantanda elis, asin e na pudi tene oportunidadi di tene se nomi skirbidu na livru di bibus. Es jintis “maus” na pirsisa di ajuda garandi. Antis de muri, alguns delis fasi kusas mau dimas. Asin, e na pirsisa di nsinadu kuma ke pudi vivi di akordu ku normas justu di Jeova. Pa pudi nsina elis kuma ke pudi fasi kila, Renu di Deus na organiza un tarbaju garandi di nsinu ku nunka ciga di fasidu na Tera.
12. (a) Ba kin ku na nsina jintis maus? (b) Ke ku na kontisi ku kilis ku nega aplika ke ke aprindi?
12 Ba kin ku na nsina jintis maus? I garandi multidon ku jintis bons ku na lantandadu. Pa jintis maus pudi tene se nomi skirbidu na livru di bibus, e pirsisa di tene amisadi ku Jeova i dedika se vida pa rel. Jesus Kristu ku unjidus na jubi diritu kuma ku jintis maus na reaẑi ku nsinamentu ke dadu. (Apok 20:4) Kualker algin ku nega reaẑi ben ku ajuda ki dadu, i ka na pirmitidu pa i kontinua vivi, mesmu si tene 100 anu. (Isa 65:20) Jeova ku Jesus pudi lei korson di jintis, i e ka na pirmiti pa ningin fasi kualker stragu na nobu mundu. — Isa 11:9; 60:18; 65:25; Jon 2:25.
RESUREISON PA VIDA I PA JULGAMENTU
13-14. (a) Kuma ku no ntindiba palabras di Jesus ku sta na Jon 5:29? (b) Ke ku no pudi nota na palabras di Jesus?
13 Jesus fala tambi di kilis ku na bin lantandadu na Tera. Pur isemplu, i fala sin: “I na ciga ora ku tudu mortus ku nteradu na obi si vos; e na sai na koba. Kilis ku fasi ben e na lanta pa vida; kilis ku fasi mal e na lanta pa kondenason.” (Anos ku pui italiku, Jon 5:28, 29) Ke ku Jesus misti fala?
14 No ntindiba di kuma, palabras di Jesus na fala di kusas ku kilis ku resusitadu na fasi dipus de lantandadu; ku sedu, alguns na lantandadu pa vida, e na fasi bon kusas, nkuantu ku utrus na lantandadu pa vida, e na fasi mau kusas. Ma, nota kuma Jesus ka fala, kilis ku sai di koba na bin fasi ben o e na bin fasi mal. I usa verbu na pasadu. I fala di kilis ku “fasi ben” ku kilis ku “fasi mal”. Es ta mostra di kuma kusas ke fasi i antis de muri. Es fasi sintidu, i ka bardadi? Pabia ningin ka na disadu fasi mau kusas na nobu mundu. Jintis mau fasiba e mau kusas antis de muri. Kal ntindimentu ku no tene gosi di palabras di Jesus aserka di “lanta pa vida”, ku “lanta pa kondenason” o julgamentu?
15. Ba kin ku na “lanta pa vida”, i pabia di ke?
15 Jintis bon ku fasi bon kusas antis de muri, na “lanta pa vida”, pabia se nomi skirbiduba ja na livru di bibus. Es signifika kuma resureison di “kilis ku fasi ben” ku faladu del na Jon 5:29, i mesmu ku resureison di jintis “bons” ku faladu del na Atus 24:15. Es ntindimentu sta di akordu ku palabras ku sta na Romanus 6:7 ku fala sin: “Kil ku muri i sta ja libri di pekadu.” Asin, ora ke jintis bon muri, Jeova ta purda se pekadu, ma i ta lembra di tudu bon kusas ke fasi oca e staba di vida. (Eb 6:10) Ma, es jintis bon ku lantandadu, pirsisa di kontinua sedu fiel pa se nomi mantidu na livru di bibus.
16. Ke ku signifika “lanta pa kondenason” o julgamentu?
16 Ke gora di kilis ku fasi mau kusas antis de muri? Apesar di kuma se pekadu purdadu oca e muri, e ka sirbi Jeova ku fidelidadi oca e staba di vida. Se nomi ka skirbidu na livru di bibus. Asin, resureison di “kilis ku fasi mal”, i mesmu ku resureison di jintis “maus” ku faladu del na Atus 24:15. Se resureison na sedu “pa kondenason” o julgamentu. * Es signifika kuma Jesus na jubi diritu jintis mau. (Luk 22:30) Dipus di algun tempu, Jesus na sibi si se nomi mersi sta na livru di bibus. So si es jintis mau muda se mau komportamentu, i dedika se vida pa Jeova ku se nomi na skirbidu na livru di bibus.
17-18. Ke ku tudu kilis ku na lantandadu pa vida na Tera pirsisa di fasi, i di akordu ku Apokalipsi 20: 12, 13 ke ku “kusas ke fasi” na rifiri?
17 Mesmu se seduba bons o maus, kilis ku lantandadu na pirsisa di obdisi leis ku sta na nobu livrus, ku na yabridu duranti mil anu. Apostolu Jon splika ke ki oja na vison: “N oja mortus, garandis ku pikininus, sikidu dianti di tronu. Librus yabridu. I yabri mas utru libru, kil ku tene nomi di bibus. Mortus julgadu pa kusas ku skirbidu na ki librus, konformi kusas ke fasi.” — Apok 20:12, 13.
18 Kilis ku resusitadu na julgadu pa kal “kusas ke fasi”? Sera ki i na sedu kusas ke fasi antis de muri? Nau! Lembra kuma, pekadus ke fasiba purdadu oca ke muri. Pa kila, “kusas ke fasi” ka pudi sedu kusas ke fasiba antis de muri. En ves di kila, kusas ke fasi dibi di rifiri reason ke na tene ku trenamentu ke risibi na nobu mundu. Te mesmu omis fiel suma Noe, Samuel, Davi ku Daniel ten di aprindi aserka di Jesus Kristu i mostra fe na si sakrifisiu. Si es omis tene manga di kusas pa aprindi, jintis mau tene inda mas kusas pa aprindi!
19. Ke ku na kontisi ku kilis ku nega es oportunidadi garandi?
19 Ke ku na kontisi ku kilis ku nega es oportunidadi garandi? Apokalipsi 20:15 fala sin: “Tudu kil ku si nomi ka ojadu skritu na libru ku tene nomi di bibus, i botadu na lagua di fugu.” E na kabadu ku el di un bias pa sempri. Pa kila, i importanti pa no tene sertesa di kuma, no nomi skirbidu na livru di bibus i pa i kontinua sta la!
Un ermon sta na partisipa na programa garandi di nsinu ku na bin fasidu duranti Renansa di Mil Anu. (Jubi paragrafu 20)
20. Kal tarbaju nteresanti ku na fasidu na Renansa di Mil Anu? (Jubi diseñu ku sta na kapa.)
20 Renansa di Mil Anu na sedu nteresanti dimas! I na nklui un programa garandi di nsinu ku nunka ciga di fasidu na Tera. Ma tambi i na sedu tempu ku komportamentu di jintis bon ku jintis mau na jubidu diritu. (Isa 26:9; At 17:31) Kuma ku es programa di nsinu na fasidu? Studu ku na bin na judanu ntindi i da balur pa es aranẑu nteresanti.
KANTIKU 147 A Vida Eterna – Que Bela Promessa!
^ Es studu na fala di un mudansa na no ntindimentu di palabras di Jesus ku sta na Jon 5:28, 29, aserka di kilis ku “na lanta pa vida” ku kilis ku “na lanta pa kondenason”. Na lingua oriẑinal es palabra pudi tambi signifika “lanta pa julgamentu.” No na aprindi ke ku es dus resureison signifika, i ba kin ku na fasi parti di kada un delis.
^ Es livru kumsa skirbidu “disna ku mundu kumpudu”, ku sedu, mundu di jintis ku tene oportunidadi di benefisia di sakrifisiu di resgati di Jesus. (Mat 25:34; Apok 17:8) Parsi kuma nomi di Abel i purmeru ku skirbidu na livru di bibus.
^ Antis, no ta splikaba di kuma palabra julgamentu ku usadu li, signifika julgamentu negativu o disison di kondenason. Na bardadi, palabra julgamentu pudi signifika es. Ma, nes kontestu, parsi kuma Jesus usa palabra julgamentu ku tene signifikadu mas garandi. I na rifiri jubi un algin diritu o testal, suma ku un disionariu di Biblia na gregu fala, i pa “jubi diritu komportamentu di un algin.”
