STUDU 3
KANTIKU 124 Sempre Leais
Jeova na judau na tempus difisil
“[Jeova] na da stabilidadi na bu tempu”. — ISA 33:6.
KE KU NO NA BIN APRINDI
Ke ku no pudi fasi pa risibi ajuda di Jeova na tempus difisil.
1-2. Kal situasons difisil ku servus fiel di Jeova pudi pasa?
UN KASABI pudi muda no vida di repenti. Pur isemplu, i diskubridu di kuma un ermon di nomi Luis a tene un kankru ku ka kustuma ojadu. Mediku falal di kuma i tene so puku misis pa vivi. Monika ku si omi staba okupadu na sirbi Jeova juntu. Dipus un dia, Monika diskubri di kuma si omi, ku seduba ansion, ta fasiba pekadu sukundidu pa manga di tempu. Un irma solteru comadu Olivia obrigadu sai di si kasa pabia di un bentu forti ku na binba. Oca ki riba i oja di kuma bentu dana si kasa tudu. Na puku tempu, vida des jintis muda di repenti. Sera ki bu ciga di pasa un situason difisil dimas ku muda bu vida di repenti?
2 Suma servus fiel di Jeova, no ta pasa situasons difisil ku duensas suma tudu jintis. Alen di kila, no dibi di nguenta kilis ku odia povu di Deus ku sta kontra nos o ku ta pirsiginu. Jeova ka ta libranu des situasons difisil, ma i purmiti judanu. (Isa 41:10) Ku si ajuda, no pudi manti no alegria, toma bon disisons i kontinua sedu fiel, mesmu na situasons mas difisil. Nes studu, no na fala di kuatru kusas ku Jeova ta fasi pa judanu duranti situasons difisil na no vida. No na bin jubi tambi ke ku no pirsisa di fasi pa risibi ajuda ku Jeova ta danu.
JEOVA NA GUARDA BU PENSAMENTU KU BU KORSON
3. Ora ku no pasa un kasabi, ke ku pudi sedu difisil pa no fasi?
3 Situason difisil. Ora ku no pasa un kasabi, i pudi sedu difisil pa no pensa diritu i toma bon disisons. Pabia? Pabia no korson pudi sta ku dur garandi. Preokupason pudi incinu kabesa. No pudi sta konfusu i ka sibi ke ku no dibi di fasi. Nota kuma ku dus irmas ku faladuba del na kumsada sinti, oca e staba na pasa situasons difisil. Olivia fala sin: “Dipus di bentu forti dana ña kasa, N ka sibiba ke ku N na fasi, N staba ku manga di preokupason.” Monika fala sin aserka di traison di si omi: “I ka un kusa ku N speraba. I sta suma si un algin findin ku faka na korson. I seduba difisil pa N fasi tarbaju simplis di kada dia. Nunka N pensaba di kuma es na pasa ku mi.” Kuma ku Jeova purmiti judanu ora ku kusas kambanu kabesa?
4. Di akordu ku Filipensis 4:6, 7, ke ku Jeova purmiti fasi pa nos?
4 Ke ku Jeova na fasi. I purmiti danu ke ku Biblia ta coma di “pas di Deus”. (Lei Filipensis 4:6, 7.) Es pas na trata di kalma ku no ta sinti pabia di amisadi intimu ku no tene ku Jeova. Es pas “pasa tudu ntindimentu”. Es ntindimentu mas ke ku no pudi imaẑina. Sera ki bu ciga di ora risu Jeova dipus bu fika ku surpresa, pabia bu sinti kalma garandi? Es sentimentu i “pas di Deus”.
5. Kuma ku pas di Deus ta guarda no pensamentu ku no korson?
5 Filipensis 4:7 fala tambi di kuma pas di Deus na “guarda”, o proteẑi ‘no korson ku no pensamentu’. Palabra oriẑinal ku usadu pa “guarda” i palabra militar ku ta usaduba pa fala di tropas ku ta guarda un sidadi i proteẑil kontra ataki. Jintis ku mora na sidadi nunde ki ten guardas ta durmi susegadu, pabia e ta sibi di kuma tropas na proteẑi elis. Di mesmu manera, ora ku pas di Deus guarda no korson ku no pensamentu, no ta sinti kalma, pabia no ta sibi di kuma no sta suguru. (Sal 4:8) Suma ke ku pasa ku Ana, no pudi kontinua sinti pas mesmu si no situason ka muda logu. (1 Sam 1:16-18) Tambi ora ku no sinti kalma, manga di bias i ta sedu mas fasil pa no pensa diritu i toma bon disisons.
Fasi orason te ora ku bu sinti “pas di Deus” guarda bu korson ku bu pensamentu. (Jubi paragrafu 4 te 6)
6. Ke ku no pudi fasi pa risibi pas di Deus? (Jubi tambi foto ku diseñu.)
6 Ke ku no pirsisa di fasi. Ora ku no sta na pirigu, no ta coma Jeova pa i judanu, suma ku no ta coma un guarda. Di kal manera? Fasi orason te ora ku bu sinti pas di Deus. (Luk 11:9; 1 Tes 5:17) Luis, ku faladuba del na kumsada, splika kuma ku el ku si minjer Ana konsigi lida ku se purblema oca e sibi di kuma, i teneba so puku misis pa vivi. I fala sin: “Na mumentu suma es, i difisil dimas toma disisons aserka di saudi ku utrus asuntus. Ma orason judanu tene pas nes tempu difisil.” Luis ku si minjer fala di kuma e ora risu i manga di bias. E pidi Jeova pa i da elis sintidu susegadu, korson kalmu ku jiresa pa e pudi toma bon disisons. E sinti di kuma Jeova juda elis. Si bu sta na pasa purblema, pega tesu na orason, asin, bu na oja di kuma pas di Jeova na guarda bu korson ku bu pensamentu. — Rom 12:12.
JEOVA NA DAU STABILIDADI
7. Kal sentimentu ku no pudi tene ora ku no sta na pasa un situason difisil?
7 Situason difisil. Ora ku no sta na pasa un situason difisil, no pudi ka sinti, pensa, o aẑi suma ku no kustumaba. Suma ku un barku ta rastadu di un ladu pa utru pa un bentu forti, anos tambi no pudi rastadu di un ladu pa utru pa un sentimentu forti. Ana, ku faladuba del na kumsada fala di kuma, i teneba manga di sentimentus diferenti dipus ku Luis muri. I fala sin: “Ora ku N sinti tristi dimas, N ta kumsa ku sinti pena di ña kabesa. N ta pañaba raiba manera ki muri.” Fora di kila, Ana ta sintiba di kuma i sta el so, i ta staba ku raiba ora ki dibi di toma disisons na asuntus ku Luis ta kuidaba ben del. Utrora, i ta sinti suma si sta na un mar ku tene bentu forti. Kuma ku Jeova ta judanu ora kes tipu di sentimentus kumsa ku toma konta di nos?
8. Suma ki faladu na Isaias 33:6, kal garantia ku Jeova danu?
8 Ke ku Jeova na fasi. I garantinu di kuma i na danu stabilidadi. (Lei Isaias 33:6.) Ora ki ten un bentu forti na mar, barku pudi kumsa ku balansa di un ladu pa utru di manera pirigosu. Pa manti stabilidadi, manga di barkus ta tene kusas ku ta sta bas di yagu na kada un di si ladu. Es kusas pudi juda barku pa ka balansa ciu. Asin, jintis ku sta na barku pudi sta mas suguru i viaẑa diritu. Ma es kusas ku ta stabiliza barku ta tarbaja diritu, ora ku barku sta na bai pa dianti. Di mesmu manera, Jeova na danu stabilidadi ora ku no kontinua sirbil ku fidelidadi na tempus difisil.
Usa feramentas di piskisa pa da bu kabesa stabilidadi. (Jubi paragrafu 8 ku 9)
9. Kuma ku no feramentas di piskisa pudi judanu kontinua sedu ekilibradu? (Jubi tambi foto ku diseñu.)
9 Ke ku no pirsisa di fasi. Ora ku mau sentimentus toma konta di bo, fasi bu minjor pa kontinua ora, mati runions i prega. Na bardadi, talves bu ka na konsigi fasi kusas suma ku bu kustumaba fasi antis. Ma lembra di kuma, Jeova ka ta spera pa no fasi mas di ki kil ku no pudi fasi. (Komparal ku Lukas 21:1-4.) Tambi ranja tempu pa fasi studu pesual i pensa fundu. Pabia? Atraves di si organizason, Jeova danu bon informasons basiadu na Biblia ku pudi judanu manti no stabilidadi. Pa oja informason ku bu pirsisa del, bu pudi usa feramentas di piskisa ku ten na bu lingua suma aplikativu JW Library®, Índice das Publicações da Torre de Vigia, ku Gia di Piskisa pa Tustumuñas di Jeova. Monika ku faladuba del na kumsada fala di kuma, i ta usa feramentas di piskisa pa buska konsijus ora ki kumsa ku tene sentimentus forti. Pur isemplu, i ta skirbi palabra “raiba” pa fasi piskisa. Utrora i ta piskisa palabra “traison” o “fidelidadi.” Dipus i ta leil te ora ki sinti ben. I fala sin: “Ora ku N kumsa fasi piskisa N ta staba preokupadu dimas. Ma, ora ku N kontinua lei, N ta sinti suma si Jeova barsan ku forsa. Ora ku N na lei, N ta nota di kuma Jeova ntindi tudu ña sentimentus, tambi i staba na judan.” Es tipu di ajuda di Jeova pudi tambi judau kontrola bu sentimentus te ora ku bu sinti mas kalmu. — Sal 119:143, 144.
JEOVA NA SUGURAU
10. Kuma ku no pudi sinti dipus di un situason difisil dimas?
10 Situason difisil. Dipus di un situason difisil dimas, i pudi ten dias nunde ku no ta sinti fraku na sintidu fisiku i emosional. No pudi parsi ku un kuridur ku ta kuriba rapidu ma gosi i ta mankusa. I pudi sedu difisil fasi kusas ku no kustumaba fasi ku fasilidadi, o no pudi ka tene diseẑu di fasi kusas ku no gostaba di fasi. Suma Elias, no pudi sinti di kuma i difisil lanta. No ta misti so durmi. (1 Re 19:5-7) Ke ku Jeova purmiti fasi ora ku no sinti fraku?
11. Kal ki utru manera ku Jeova ta judanu? (Salmu 94:18)
11 Ke ku Jeova na fasi. I purmiti suguranu o judanu. (Lei Salmu 94:18.) Suma ku un kuridur ku molostra pirsisa di ajuda pa kontinua kuri, anos tambi no pudi pirsisa di ajuda pa kontinua ativu na sirvisu di Jeova. Ora ku no sta na pasa ki situasons, Jeova danu es garantia: “Ami, SIÑOR bu Deus, N pegau na bu mon direita, N falau: Ka bu medi, pabia N na judau.” (Isa 41:13) Rei Davi risibi es ajuda. Oca i staba na pasa situasons difisil i nfrenta si inimigus, i fala Jeova: “Bu mon direita ta nguentan”. (Sal 18:35) Ma kuma ku Jeova judal?
Seta ajuda di bu familia, amigus ku ansions. (Jubi paragrafu 11 te 13)
12. Ba kin ku Jeova pudi usa pa judanu ora ku no sta fraku?
12 Manga di bias, Jeova ta usa utrus pa e judanu. Pur isemplu, un bias oca Davi sintiba fraku, si amigu Jonatan visital pa dal forsa i pa nkoraẑal. (1 Sam 23:16, 17) Di mesmu manera, Jeova kuji Eliseu pa i da Elias ajuda ki pirsisa del. (1 Re 19:16, 21; 2 Re 2:2) Aos tambi, Jeova pudi usa no familia, amigus o ansions pa judanu. Ma, ora ku no sta tristi dimas, no pudi misti fika lunju di utrus. No ta misti so fika anos son. I normal aẑi des manera. Ke ku no pudi fasi pa risibi ajuda di Jeova?
13. Ke ku no pirsisa di fasi pa risibi ajuda di Jeova? (Jubi tambi foto ku diseñu.)
13 Ke ku no pirsisa di fasi. Sforsa ciu pa ka isola di utrus. Ora ku no isola di utrus, no pudi kumsa ku pensa so na no kabesa i na no purblemas. Es tipu di pensamentu pudi pui pa ka no toma bon disisons. (Dit 18:1) Na bardadi, i ten mumentus ku anos tudu no ta pirsisa di sta anos so, prinsipalmenti ora ku no sta na pasa un situason difisil dimas. Ma, si no isola di utrus pa manga di tempu, no asons ta mostra di kuma no sta na nega ajuda di utrus ku Jeova sta na usa pa judanu. Pa kila, ora ku bu sta na pasa un situason difisil, seta ajuda di bu familia, amigus ku ansions. Oja elis suma jintis ku Jeova sta na usa pa judau. — Dit 17:17; Isa 32:1, 2.
JEOVA NA KONSOLAU
14. Kal kusas ku pudi punu sinti medu?
14 Situason difisil. No pudi pasa situasons ku pudi punu sinti medu. Na Biblia, servus fiel di Deus fala di tempus oca e staba na sufri i e staba ku medu pabia di se inimigus o pabia di utru purblemas. (Sal 18:4; 55:1, 5) Anos tambi, jintis pudi sta kontra nos na skola, na kau di tarbaju, na familia o guvernu pudi sta kontra nos. No pudi tene medu di muri pabia di un purblema di saudi. Na ki mumentus, no pudi sinti di kuma no ka pudi fasi nada suma un mininusiñu. Kuma ku Jeova ta judanu na mumentus suma esis?
15. Ke ku Jeova na fasi pa nos suma ki faladu na Salmu 94:19?
15 Ke ku Jeova na fasi. I na konsolanu i danu kontentamentu. (Lei Salmu 94:19.) Es Salmu pudi fasinu pensa na un bajudasiñu ku tene medu i ku ka konsigi durmi pabia di turbada. No pudi imaẑina si pape bai nunde el, i lambul tok i durmi. Mesmu ku turbada kontinua, i ta sinti suguru i konsoladu na mon di si pape. Ora ku no sta na pasa situasons ku ta fasinu sinti medu, no pudi pirsisa pa no Pape ku sta na seu lambunu, tok no medu pasa. Kuma ku no pudi risibi es konsolu di Jeova?
Disa pa bu Pape ku sta na seu konsolau atraves di Biblia. (Jubi paragrafu 15 ku 16)
16. Ke ku no pudi fasi pa risibi konsolu di Jeova? (Jubi tambi foto ku diseñu.)
16 Ke ku no pirsisa di fasi. Pasa sempri tempu ku Jeova na fasi orason i lei si Palabra. (Sal 77:1, 12-14) Asin, si bu bin na pasa pa purblema, purmeru kusa ku bu na pensa nel, i buska ajuda di bu Pape ku sta na seu. Konta Jeova medu ku preokupasons ku bu tene. Disal pa i papia ku bo i pa i konsolau atraves di Biblia. (Sal 119:28) Lei sertus partis di Biblia pudi konsolau ora ku bu sta ku medu. Pur isemplu, bu pudi risibi nkoraẑamentu na livrus di Jo, Salmus ku Ditus, suma tambi na palabras di Jesus ku sta na Mateus kapitulu 6. Ora ku bu ora Jeova i lei si Palabra, bu pudi sinti si konsolu.
17. Kal konfiansa ku no pudi tene?
17 No pudi tene konfiansa di kuma Jeova sempri na judanu ora ku no sta na pasa situasons difisil. I ka na ciga nunka di bandonanu. (Sal 23:4; 94:14) Jeova purmiti guardanu, danu stabilidadi, suguranu i konsolanu. Isaias 26:3 fala sin aserka di Jeova: “Kil ku pui sintidu firmi na bo, ku fiansa na bo, abo, SIÑOR, bu ta guardal ketu, ku susegu.” Pa kila, konfia na Jeova i fasi tudu ku bu pudi pa risibi tudu ajuda ki ta da. Si bu fasil, bu na tene forsa te mesmu na tempus difisil.
KUMA KU BU NA RUSPUNDIBA?
-
Na kal mumentu ku no mas na pirsisa di ajuda di Jeova?
-
Kal ki kuatru maneras ku Jeova ta judanu na tempus difisil?
-
Ke ku no pudi fasi pa risibi ajuda di Jeova?
KANTIKU 12 O Nosso Grandioso Deus, Jeová
a Alguns nomi mudadu.