NA LINGUA oriẑinal, palabra traduzidu pa “karu” na Tradução do Novo Mundo pudi sedu diferenti tipus di karu. (At 8:​28, 29, 38) Ma parsi di kuma, omi di Etiopia staba na un karu garandi, en ves di un karusiñu ku ta usaduba na gera o na kurida. Jubi alguns motivus ku pui no ciga es konkluson.

Omi di Etiopia seduba un altu funsionariu ku viaẑaba un distansia garandi. I seduba un “funsionariu altu, nkargadu di tudu rikesa di Kandasi, raiña di Etiopia.” (At 8:27) Antigu Etiopia nklui Sudon di no tempu ku parti sul di Ejitu di no tempu. Talves es omi ka viaẑaba na mesmu karu duranti tudu bias, ma mesmu asin, i dibi di lebaba manga di kusas ki pirsis. Entri karus ku ta usaduba na purmeru sekulu EK pa transporta pasajerus, i tenba karus di kuatru rodas. Un kumentariu di livru di Atus fala sin: “Es tipu di karu ta konsigi karga manga di kargus, jintis ku ta viaẑaba ta sta mas avontadi, tambi talves e ta konsigi viaẑa un distansia garandi.”

Omi di Etiopia staba na lei oca Filipi pertusi del. Biblia fala sin: “Filipi kuri, i obil i na lei libru di anunsiadur Isaias”. (At 8:30) Karus di viaẑen ka ta kumpudu pa kuri rapidu. Suma es karus ta kuri lentu, i ka pirmiti so eunuku lei, ma tambi pa Filipi ku staba ape konsigi paña karu.

Omi di Etiopia “pidi Filipi pa i subi, i sinta juntu ku el.” (anos ku pui letras karegadu ku italiku, At 8:31) Na un karu di kurida, kuriduris ta firma. Ma na karu di bias, i tenba un kau nunde ku eunuku ku Filipi pudiba sinta.

Pabia di palabras nspiradu di Atus kapitulu 8, juntu ku utrus provas ku ojadu na storia, gosi no publikasons ta mostra omi di Etiopia, ku sedu eunuku, na karu mas garandi di ki kil ku ta usaduba na gera o kurida.