LISA * fala sin: “Bondadi di ña ermons ku irmas na fe seduba un kusa ku mas tokan.” I staba na fala di kal ki purmeru kusa ku atrail pa bardadi. I mesmu kusa ku kontisi ku Anne. I fala sin: “Na kumsada, N atraidu pa bardadi pabia Tustumuñas di Jeova sedu bon, i ka pabia di ke ke ta nsina.” Gosi, tudu e dus irmas gosta di lei Biblia i medita nel. Ma, bondadi i un kusa ku marka elis ciu.

Kuma ku no pudi mostra bondadi ku na toka korson di kilis ku sta pertu di nos? No na bai fala di dus manera ku no pudi fasil: Atraves di no palabras i ku no asons. Dipus, no na bin oja kin ku no dibi di mostra bondadi pa rel.

Minjer jiru ku faladu del na Ditus kapitulu 31 tene ‘nsinamentu di bondadi’ na si boka. (Dit 31:26) I disa pa es “nsinamentu” afeta ke ki i na fala i kuma ki na falal. Papes tambi dibi di tene es “nsinamentu” na se boka. Manga di papes ku mames sibi tambi di kuma, palabras duru pudi tene mau rusultadu na se fiju. Si e ta papia ku brutasku, sin interes, se fiju pudi ka sukuta ke ke na fala. Si pape ku mame ta papia ku bondadi, i mas fasil pa se fiju sukuta i obi elis.

Si bu tene fiju o bu ka tene, kuma ku bu pudi aprindi papia ku bondadi? No pudi oja resposta na purmeru parti di Ditus 31:26: “I ta papia ku jiresa”. (Anos ku pul na letra karegadu). Es nvolvi kuji no palabras ku no ton di vos ku jiresa. I bon pa no punta no kabesa: ‘Ke ku N na papia na pui kilis ku na obin paña raiba, o i na juda pa i ten pas?’ (Dit 15:1) Na bardadi, no ta mostra jiresa ora ku no pensa antis di papia.

Un utru ditu fala sin: “I ten utrus ku tene palabra suma ponta di spada”. (Dit 12:18) Ora ku no pensa na kuma ku no palabras ku no ton na pui utrus sinti, kila na lebanu kontrola ke ku no na fala. Ora ku no papia sugundu ‘nsinamentu di bondadi’, no ka na usa palabras ku na pui utrus sinti mal, o papia di un manera duru. (Ef 4:31, 32) No na muda no pensamentus negativu i papia ku bondadi, ku un ton pusitivu, i ku ta anima. Jeova disa un isemplu nes sintidu, oca ki anima si servu Elias ku staba ku medu. Anju ku representa Jeova papia ku “un fala finu, mansu.” (1 Re 19:12) Ma, sedu bon signifika mas di ki so papia ku bondadi. No dibi di aẑi tambi ku bondadi. Di kal manera?

No ta kopia Jeova, ora ku no na papia ku bondadi i aẑi ku bondadi. (Ef 4:32; 5:1, 2) Lisa ku faladuba del, konta kuma ku Tustumuñas di Jeova mostra bondadi pa rel. I fala sin: “Oca ku no familia obrigadu munda di repenti, dus kasal Tustumuñas di Jeova tira tempu di se tarbaju pa judanu ruma kargus. Na ki tempu, N ka ta studaba Biblia!” Es asons di bondadi  leba Lisa na pega tesu na studa bardadis di Palabra di Deus.

Anne ku faladuba del na kumsada, gardisi tambi pa bondadi ku Tustumuñas di Jeova mostra pa rel. I fala sin: “Manera ku N tratadu pa jintis ku ka ta sirbi Jeova, kila pui pa i difisil pa N konfia na jintis.” I kontinua fala: “Oca ku Tustumuñas di Jeova papia ku mi, N ka konfiaba nelis. N punta ña kabesa, ‘pabia ke sta na mostra interes pa mi?’ Ma, kin ku ta studa Biblia ku mi, mostran bondadi di bardadi, kila leban pa N konfia nel.” Kal bon rusultadu ku es tisi? I kontinua fala: “Mas tardi, N kumsa ku konsentra mas na ke ku N sta na aprindi.”

Suma ku bu nota, Lisa ku Anne tokadu ciu pa asons di amor ku bondadi di jintis na kongregason, i kila juda elis pa e misti aprindi bardadi. Es bondadi ku kongregason mostra pa elis, juda elis kumsa ku konfia na Jeova ku si povu.

Alguns jintis kustuma ta usa palabras di bondadi i e ta ri, pabia di manera ke  kriadu i di nunde ke ta vivi. I bon oja di kuma alguns jintis motivadu pa sedu edukadu, pabia di se kultura o se maneras di sedu. Ma, si no motivadu so pa no kultura i pa no maneras di sedu, no pudi ka sta na kopia bondadi di Deus. — Komparal ku Atus 28:2.

Bondadi di bardadi fasi parti di frutu di spiritu santu di Deus. (Gal 5:22, 23) Es signifika, no pirsisa di spiritu santu di Deus pa judanu mostra bondadi di bardadi. Ora ku no sta na fasi kila, no ta sta na kopia Jeova ku Jesus. Suma Jesus, no tene interes di bardadi na utrus. Ke ku ta lebanu na fasi kila, i amor ku no tene pa Jeova Deus ku amor pa no kumpañer. Asin, no bondadi ta torna un manera di sedu forti, ku ta bin di korson i ku ta kontenta Deus.

I mas fasil mostra bondadi pa kilis ku mostra bondadi pa nos, o pa kilis ku no kunsi. (2 Sam 2:6) Un di maneras ku no ta fasil i gardisi elis. (Kol 3:15) Ma, ke gora si no pensa di kuma un algin ka meresi pa no tratal ku bondadi?

Pensa so nes: Jeova disa un isemplu mas garandi na mostra bondadi ku no ka meresi, tambi si Palabra nsinanu un lison importanti di kuma di mostra es manera di sedu. Palabra “fabur di Deus”, o bondadi ku no ka meresi, usadu manga di bias na Skrituras Gregu Kriston. Kuma ku Deus ta mostranu si bondadi?

Jeova mostra si bondadi pa tudu jintis ku vivi ja, i da elis kil ke pirsisa del pa e kontinua vivi. (Mat 5:45) Na bardadi, te mesmu antis di no kunsi Jeova, i mostra si bondadi pa nos. (Ef 2:4, 5, 8) Pur isemplu, i da si minjor, si uniku Fiju pa tudu jintis. Apostulu Paulu skirbi di kuma, Jeova da resgati ‘konformi rikesa di si fabur’. (Ef 1:7) Apesar di kuma no ta peka, i no ta pui Jeova fika tristi, i kontinua gianu i nsinanu. Si instrusons ku si palabras i suma “cuba ku na yeriyeri”. (Lei 32:2) No ka pudi pagal pa tudu bondadi ki ta mostra pa nos. I no sibi di kuma, si Jeova ka mostranu si fabur, no ka na tene speransa pa futuru. — Komparal ku 1 Pedru 1:13.

Sin duvida, bondadi di Jeova ta atrai, tambi i ta motiva. Pa kila, en ves di mostra bondadi so pa sertus jintis, no dibi di sforsa pa kopia Jeova na mostra bondadi sempri, pa tudu jintis, kada dia. (1 Tes 5:15) Ora ku no ta mostra bondadi sempri, no ta sedu suma fugu na un dia di friu. No ta anima no familia, no ermons ku no irmas na fe, no kolegas di tarbaju, di skola ku visiñus.

Pensa na kilis ku na bu familia, o na bu kongregason ku na benefisia di bu palabras ku asons di bondadi. I pudi ten un algin na bu kongregason ku pirsisa ciu di ajuda pa kuida di si kasa ku si jardin, o judal na fasi kusas ki kustuma fasi sempri, suma fasi kompra. Tambi, si bu kontra ku un algin na pregason ku pirsisa di ajuda, sera ki bu pudi dal ajuda di un manera pratiku?

Suma Jeova, pa ‘nsinamentu di bondadi’ gia sempri no palabras ku no asons.