1-2. Si bu ka sta inda purparadu pa batismu, pabia ku bu ka dibi di disanima? (Jubi foto ku sta na kapa.)

 SI BU misti batisa, bu tene un bon objetivu. Sera ki gosi bu sta purparadu pa batisa? Si bu pensa kuma bu sta purparadu i ansions konkorda, ka bu tene dus sintidu, apruveita di oportunidadi ku na bin. Si bu fasil, bu na tene un vida filis na sirvisu di Jeova.

² Ma, se falau di kuma bu pirsisa di progredi inda mas antis di bu batisadu? O abo propi bu nota di kuma bu pirsisa di fasi kila? Si kila, ka bu disanima. Bu pudi fasi progresu i yangasa es objetivu importanti, nin si bu sedu joven o bu tene idadi.

3. Kal purgunta ku funsionariu di palasiu di Etiopia fasi Filipi, i kal purgunta ku kila ta lantanda? (Atus 8:36, 38)

³ Lei Atus 8:36, 38. Un funsionariu di palasiu di Etiopia fasi Ivanjelizadur Filipi es purgunta: “Ke ku na tujin pa N batisadu?” Omi di Etiopia mistiba batisa, ma sera ki i staba purparadu pa batisa?

4. Kuma ku omi di Etiopia mostra di kuma, i staba disididu pa kontinua aprindi?

⁴ Omi di Etiopia “baiba Jerusalen pa adora Deus.” (At 8:27) Pa kila, i dibi di sedu un algin ku konverti pa judaismu. Sin duvida, i aprindi aserka di Jeova atraves di Skrituras  Ebraiku. I kontinua tene diseẑu di aprindi mas. Na bardadi, oca Filipi kontra ku es altu funsionariu na kamiñu, ke ki ojal i na fasi? I staba na lei livru ku profeta Isaias skirbi. (At 8:28) I seduba bardadis fundu di Biblia. Es funsionariu di palasiu ka staba kontenti so ku bardadis prinsipal di Biblia, ma tambi i mistiba kontinua aprindi mas.

5. Ke ku omi di Etiopia fasi ku ke ki aprindi?

⁵ Es omi seduba altu funsionariu “nkargadu di tudu rikesa” di raiña Kandasi di Etiopia. (At 8:27) I dibi di sedu un omi okupadu ku manga di responsabilidadi. Ma, i ranja tempu pa adora Jeova. I ka kontentiba so di aprindi bardadi, ma i aplika ke ki aprindi. Asin, i fasi un bias kumpridu di Etiopia pa bai adora Jeova na templu na Jerusalen. Es bias dibi di iziẑiba manga di tempu ku diñeru, ma es omi ka popa sforsu pa adora Jeova.

6-7. Kuma ku amor ku omi di Etiopia tene pa Jeova torna mas forti?

⁶ Filipi juda omi di Etiopia aprindi alguns bardadis importanti ku seduba nobu pa rel. Un des bardadis i di kuma Jesus sedu Mesias. (At 8:34, 35) Es funsionariu di palasiu staba kontenti di aprindi ke ku Jesus fasi pa rel. Ke ki fasi dipus di aprindi es kusas? I pudiba kontinua sedu un algin rispitadu ku konverti pa judaismu. En ves di kila, si amor pa Jeova i pa si Fiju torna mas forti. Kila lebal pa i toma disison importanti na si vida, ku sedu, batisa suma sigidur di Jesus Kristu. Filipi notaba di kuma ki omi staba purparadu, pa kila i batisal.

⁷ Si bu kopia isemplu di omi di Etiopia, bu pudi sta purparadu pa batismu. Abo tambi bu pudi fala ku tudu konfiansa: “Ke ku na tujin pa N batisadu?” No jubi kuma ku bu pudi fasi mesmu kusa ku omi di Etiopia fasi: I kontinua aprindi, i aplika ke ki aprindi, tambi i kontinua aumenta si amor pa Deus.

8. Ke ku Jon 17:3 fala bu dibi di fasi?

⁸ Lei Jon 17:3. Sera ki es palabras di Jesus judau disidi studa Biblia? Es ku kontisi ku maioria di nos. Ma, sera ki es mesmu palabras misti fala tambi pa no kontinua aprindi? Sin. Nunka no ka na para ‘kunsi uniku Deus di bardadi’. (Ekl 3:11) No na kontinua aprindi pa tudu tempu. Mas no na aprindi, mas no na pertusi di Jeova. — Sal 73:28.

9. Ke ku no pirsisa di fasi dipus di no aprindi bardadis prinsipal di Biblia?

 ⁹ Ora ku no kumsa aprindi aserka di Jeova, no ta aprindi so bardadis prinsipal di Biblia. Na karta ki skirbi pa ebreus, apostolu Paulu fala des bardadis prinsipal suma “purmeru nsinamentu”. I ka staba na njuti “kumsada di nsinamentu”; i komparal ku liti ku ta alimenta un bebe. (Eb 5:12; 6:1) Tambi i nsentiva tudu kristons pa e kontinua aprindi mas di ki bardadis prinsipal, ma pa e aprindi bardadis mas fundu di Palabra di Deus. Sera ki bu tene diseẑu di aprindi nsinus mas fundu ku sta na Biblia? Sera ki bu sta dispostu pa kontinua kirsi i kontinua aprindi aserka di Jeova ku si intenson?

10. Pabia ki difisil pa alguns studa?

¹⁰ Pa manga di jintis i difisil studa. Abo gora? Sera ki bu aprindi lei i studa diritu na skola? Sera ki bu gosta di studa i sinti di kuma bu aprindi ciu? O bu pensa di kuma bu ka gosta di studa? Si i kila, i ka bo son ku sta nes situason. Ma, Jeova pudi judau. El i perfeitu tambi i minjor Nsinadur ku ten.

11. Kuma ku Jeova mostra di kuma el i “Nsinadur mas Garandi”?

¹¹ Jeova coma si kabesa di “bu Nsinadur mas Garandi”. (Isa 30:20, 21, Tradução do Novo Mundo) El i Nsinadur pasienti, bondosu i ku ta ntindi jintis. I ta oja bon kusas na si studantis. (Sal 130:3) Nunka i ka ta spera pa no fasi mas di ki kil ku no pudi fasi. Lembra kuma, i el ku kumpu bu serebru, un prenda bonitu. (Sal 139:14) No padidu ku diseẑu di aprindi. No Kriadur misti pa no kontinua aprindi pa sempri, i pa no kontenti di aprindi. Pa kila, i bon “faima pa liti” di bardadi ku sta na Biblia desdi gosi. (1 Ped 2:2) Fiksa objetivus ku bu pudi yangasa, lei Biblia i studal sempri. (Jos 1:8) Ku ajuda di Jeova, bu na kumsa ku gosta di lei i aprindi aserka di Jeova kada bias mas.

12. Pabia ku no dibi di studa vida ku ministeriu di Jesus?

¹² Pasa sempri tempu na pensa aserka di vida ku ministeriu di Jesus. Ora ku no kopia isemplu di Jesus, kila na judanu sirbi Jeova, prinsipalmenti nes tempu difisil. (1 Ped 2:21) Jesus fala di manera klaru aserka di difikuldadis ku si sigiduris na bin pasa. (Luk 14:27, 28) Ma, i teneba konfiansa di kuma, si sigiduris na sai ben suma ki kontisi ku el. (Jon 16:33) Studa manga di informason aserka di vida di Jesus, i fiksa objetivus di kopia si isemplu na bu vida di kada dia.

13. Ke ku bu dibi di kontinua pidi Jeova, i pabia di ke?

¹³ Kunsimentu so, nunka i sufisienti. Motivu ku pui bu pirsisa di kunsimentu, i pabia bu pudi aprindi mas aserka di Jeova i tene maneras di sedu suma amor ku fe pa rel. (1 Kor 8:1-3) Nkuantu bu kontinua na aprindi, kontinua pidi Jeova pa i judau tene mas fe. (Luk 17:5) Ku bondadi, i na ruspundi es orasons. Fe di bardadi ku basia na kunsimentu izatu di no Deus, na judau fasi progresu. — Tiagu 2:26.

14. Kuma ku apostolu Pedru mostra importansia di aplika ke ku no aprindi? (Jubi tambi diseñu.)

¹⁴ Apostolu Pedru mostra pabia ki importanti pa sigiduris di Kristu kontinua aplika ke ke aprindi. I fala di ke ku Biblia fala aserka di Noe. Jeova fala Noe kuma,  atraves di diluviu i na kaba ku jintis mau di si tempu. So sibi di kuma diluviu na bin, i ka sufisienti pa Noe ku si familia salva. Nota kuma Pedru staba na fala di tempu antis di diluviu, “kontra barku na kumpudu.” (1 Ped 3:20) Noe ku si familia aplika ke ke aprindi di Deus oca ke kumpu un barku garandi. (Eb 11:7) Dipus, Pedru kompara ke ku Noe fasi ku batismu, i fala sin: “E yagu i figura di batismu ku bo ta pasa nel gosi pa salbason.” (1 Ped 3:21) Pa kila, no pudi kompara tarbaju ku bu sta na fasi gosi, pa purpara pa batismu ku tarbaju ku Noe ku si familia fasi pa manga di anus pa kumpu barku. Kal tarbaju ku bu pirsisa di fasi pa pudi sta purparadu pa batismu?

15. Kuma ku no ta mostra di kuma no ripindi di bardadi?

¹⁵ Un di purmeru kusas ku no dibi di fasi i ripindi di bardadi di no pekadus. (At 2:37, 38) Ora ku no ripindi di bardadi, no na fasi mudansas di bardadi. Sera ki bu para fasi kusas ku ka ta kontenta Jeova suma fasi kusas imoral, fuma tabaku, koba mal o usa mau palabras? (1 Kor 6:9, 10; 2 Kor 7:1; Ef 4:29) Si bu ka para inda fasi es kusas, kontinua sforsa pa fasi mudansas. Papia ku algin ku ta studa Biblia ku bo, o pidi ansions di bu kongregason pa e judau i orientau. Si bu sedu joven i bu mora inda na kasa, kontinua pidi bu pape ku bu mame ajuda pa para fasi kusas ku bu sibi kuma i mau i ku pudi tujiu batisa.

16. Ke ku no dibi di fasi si no misti adora Jeova sempri?

¹⁶ I importanti tambi pa no adora Jeova sempri. Es nklui mati runions i partisipa nelis. (Eb 10:24, 25) Ora ku bu sta purparadu pa prega, tene sertesa di kuma bu na ba ta fasil sempri. Mas bu na prega, mas bu na gosta di pregason. (2 Tim 4:5) Si bu sedu joven i bu mora inda na kasa, punta bu kabesa: ‘Sera ki ña pape ku ña mame pirsisa di lembrantan pa mati runions o bai pregason? O N ta fasil ami propi?’ Si bu fasi es kusas sin bu lembrantadu, bu ta sta na mostra di kuma bu tene fe, bu ama Jeova Deus, i  bu ta gardisi pa kusas ki dau. Fasi es kusas ta mostra kuma bu sta na vivi “son pa Deus”. Es i prendas ku bu da pa Jeova. (2 Ped 3:11; Eb 13:15) Tudu prendas ku no ta da Jeova di livri vontadi, ta kontental. (Komparal ku 2 Koríntius 9:7.) No ta fasi es pabia no ta sinti filis di da Jeova no minjor.

17-18. Kal kusa importanti ku na judau fasi progresu pa bu pudi batisa, i kuma ki na judau? (Ditus 3:3-6)

¹⁷ Ora ku bu kontinua fasi progresu pa pudi batisa, bu na tene purblemas. Alguns jintis pudi gozau pabia di bu nobu fe; te mesmu e pudi sta kontra bo o pirsigiu. (2 Tim 3:12) Talves bu sta na sforsa pa para fasi un kusa ku bu sibi kuma i mau, ma utrora bu ta kontinua fasi ki mau kusa. O bu pudi pirdi pasensa o fika mal, pabia i ta sta suma bu ka yangasa bu objetivu. Ke ku pudi judau nguenta? Kusa importanti ku na judau i amor pa Jeova.

¹⁸ Bu amor pa Jeova, i un manera di sedu bonitu, i minjor kusa ku bu tene. (Lei Ditus 3:3-6.) Amor garandi pa Deus pudi judau sai ben, ora ku na pasa situasons difisil na vida. Si bu tene es manera di sedu, bu ka na para sirbi Jeova ora ku bu tene purblemas. Manga di bias, Biblia ta fala di amor fiel di Jeova pa si servus. Amor fiel di Jeova signifika di kuma, i ka na ciga di bandona si servus o para ama elis. (Sal 100:5) Deus fasiu pa bu parsi ku el. (Kum 1:26) Kuma ku bu pudi mostra es tipu di amor?

19. Kuma ku bu pudi aumenta bu gardisimentu pa tudu ke ku Jeova fasi pa bo? (Gálatas 2:20)

¹⁹ Kumsa ku gardisi. (1 Tes 5:18) Kada dia punta bu kabesa: ‘Kuma ku Jeova mostra si amor pa mi?’ Dipus, ka bu diskisi di gardisi Jeova na bu orasons, fala di kusas izatu ki fasi pa bo. Nota kuma Jeova fasi bon kusas pa bo pabia i amau, suma ku apostolu Paulu bin nota kuma Jeova fasi bon kusas pa rel. (Lei Gálatas 2:20.) Punta bu kabesa: ‘Sera ki N misti mostra ña amor pa Jeova?’ Amor pa Jeova na judau kontinua risisti tentasons i sai ben na nguenta purblemas. Es na lebau pa bu kontinua adora Jeova sempri, i mostra amor pa bu Pape kada dia.

20. Ke ku bu dibi di fasi pa dedika bu vida pa Jeova, i kal ki importansia des disison?

 ²⁰ Ku tempu, bu amor pa Jeova na lebau fasi un orason spesial. Bu na dedika bu vida pa Deus. Lembra di kuma, si bu dedika bu vida pa Jeova, bu ta tene un speransa garandi: Bu pudi sedu di Jeova pa sempri. Ora ku bu dedika bu vida pa Jeova, bu ta purmiti sirbil na bon suma tambi na mau mumentus. Bu ka na pirsisa nunka di fasi mas es purmesa. Na bardadi, ora ku no dedika no vida pa Jeova, no ta sta na toma un disison seriu. Ma pensa nes: Bu na bin toma manga di disisons na bu vida, alguns delis i bon dimas, ma nunka bu ka na ciga di toma un disison minjor di ki dedika bu vida pa Jeova. (Sal 50:14) Satanas na tenta rapati amor ku bu tene pa bu Pape, ku speransa di kuma bu ka na kontinua sedu fiel. Nunka ka bu disa Satanas ngaña! (Jo 27:5) Bu amor forti pa Jeova na judau kumpri bu purmesa di sirbil pa sempri, i sempri pertusi di bu Pape ku sta na seu.

21. Pabia ku no pudi fala di kuma batismu i ka fin, ma i kumsada?

²¹ Dipus di dedika bu vida pa Jeova, papia ku ansions di bu kongregason aserka des pasu importanti ku bu na toma dipus. Lembra sempri di kuma batismu i ka fin, ma i kumsada. I kumsada di un vida ku ka tene fin na sirvisu di Jeova. Pa kila, torna bu amor pa bu Pape mas forti disna di gosi. Fiksa objetivu pa bu amor pudi torna mas forti kada dia. Fasi es na motivau pa bu batisa. Es na sedu un dia garandi. Ma, es i so kumsada. Pa bu amor pa Jeova i pa si Fiju kontinua aumenta pa sempri!