1-2. Ke ku manga di bias ta kontisi ora ku jintis batisa, i ke ku bu dibi di pensa nel?

 BU CIGA ja di oja un grupu di kandidatus pa batismu? Bu obi sertesa ke tene na se vos oca e ruspundi dus purguntas antis de batisa. Bu oja kuma ku se familias ku se amigus ta sta kontenti dimas ku elis. Ora ku kandidatus sai di yagu, bu ta obi jintis na toka palmu i oja kontentamentu na se rostu. Kada semana, milyaris di jintis ta toma es disison, e ta dedika i batisa suma Tustumuñas di Jeova Deus.

² Abo gora? Si bu sta na pensa batisa, abo i un algin spesial dimas nes mundu mau, pabia bu “ta buska Deus.” (Sal 14:1, 2) Si bu sedu joven o algin di idadi ku ka batisa inda, es studu fasidu pa bo. Ma anos ku batisa ja, no misti tambi aumenta no disison di sirbi Jeova pa sempri. I ten manga di motivus ku pui no misti sirbi Jeova, ma no na fala di tris delis.

3. Pabia ku servus di Jeova ama bardadi ku justisa? (Salmu 119:128, 163)

³ Jeova fala si povu pa e ama “bardadi”. (Zak 8:19) Jesus fala si sigiduris pa e fasi ke ku Deus misti o buska justisa. (Mat 5:6) Es signifika di kuma no pirsisa di tene un diseẑu forti di fasi ke ku Deus fala kuma i sertu i bon. Bu ama bardadi ku justisa? No tene sertesa kuma bu ama. Bu odia mintida ku tudu ke ki i mau, tambi bu odia maldadi. (Lei Salmu 119:128, 163.) Algin ku ta konta mintida ta kopia Satanas, ku sedu ŝef des mundu. (Jon 8:44; 12:31) Un di objetivu di Satanas i di dana nomi santu di  Jeova Deus. Satanas spalia mintidas aserka di no Deus, disna di rebelion na Eden. I ta tenta pui jintis pensa di kuma Jeova i un Guvernanti ku ta pensa so na si kabesa, i ka onestu, i ta tuji pekaduris bon kusas. (Kum 3:1, 4, 5) Mintidas di Satanas kontra Jeova kontinua na leba jintis na pensa mal aserka di Jeova. Ora ku pekaduris disidi ka ama “bardadi”, Satanas ta leba elis na fasi tudu tipu di kusas ku Deus ka misti i fasi mau kusas. — Rom 1:25-31.

4. Kuma ku Jeova mostra sedu “Deus fiel” o di bardadi? (Jubi tambi diseñu.)

⁴ Jeova i “Deus fiel,” o di bardadi. Ku bondadi i ta nsina bardadi pa kilis ku amal. (Sal 31:5) Asin, i ta juda elis pa e ka nganadu pa mintidas di Satanas. Jeova tambi ta nsina si servus pa e sedu onestu i fasi ke ki i misti. Es ta juda elis pa e rispita se kabesa i tene pas dentru delis. (Dit 13:5, 6) Sera ki i fasi es ku bo, oca bu na studa Biblia? Bu aprindi di kuma kamiñu di Jeova i minjor pa tudu jinti i pa bo tambi. (Sal 77:13) Pa kila, no misti fasi ke ku Deus misti. (Mat 6:33) Bu misti pa bardadi kunsidu, i mostra di kuma ke ku Satanas fala aserka di no Deus Jeova, i mintida. Kuma ku bu pudi fasi kila?

5. Kuma ku bu pudi sta na ladu di bardadi ku justisa?

⁵ Bu pudi disidi leba un vida ku na sta suma si bu na fala: “N nega mintida di Satanas, N sta na ladu di bardadi. N misti pa Jeova sedu ña Guvernanti, N misti fasi ke ki i fala kuma i sertu.” Kuma ku bu pudi fasi kila? Bu pudi fasi kila ora ku bu konta Jeova na un orason di kuma bu na sirbil pa sempri, dipus bu ta mostral dianti di jintis atraves di batismu. Amor pa bardadi i pa ke ku Deus misti i motivu mas garandi ku na lebau disidi batisa.

6. Kal motivus ku Salmu 45:4 dau pa bu ama Jesus Kristu?

⁶ Pabia ku bu ama Jesus Kristu? I ten bon motivus. Nota alguns delis ku sta na Salmu 45:4. (Lei.) Jesus difindi bardadi, mansesa ku retidon. Si bu ama bardadi ku justisa, i normal pa bu ama tambi Jesus Kristu. Pensa kuma ku Jesus dinfindi bardadi ku ke ku Deus misti ku  koraẑen. (Jon 18:37) Ma, kuma ku Jesus difindi mansesa o umildadi?

7. Ke ku mas tokau aserka di umildadi di Jesus?

⁷ Jesus difindi umildadi atraves di si isemplu. Pur isemplu, i da tudu gloria pa si Pape, i nunka pa si kabesa. (Mar 10:17, 18; Jon 5:19) Kuma ku umildadi di Jesus ta fasiu sinti? Sera ki i ka ta lebau ama Fiju di Deus i kopia si isemplu? Ku sertesa i ta lebau. Pabia ku Jesus sedu umildi? Pabia i ama, tambi i ta kopia si Pape, ku sedu umildi. (Sal 18:35; Eb 1:3) Sera ki bu ka ta sinti atraidu pa Jesus ku kopia diritu maneras di sedu di Jeova?

8. Pabia ku no ama Jesus pa manera ki sedu no Rei?

⁸ No ama Jesus ku sedu no Rei pabia i minjor Guvernanti. Jeova propi ku trena si Fiju i kujil pa i rena. (Isa 50:4, 5) Pensa tambi na amor garandi ku Jesus mostra. (Jon 13:1) Suma Jesus i bu Rei, i mersi pa bu amal. I coma kilis ku na bardadi amal di si amigus, i e ta mostra se amor ora ke obdisi si mandamentus. (Jon 14:15; 15:14, 15) I un kusa garandi dimas, sedu amigu di Fiju di Jeova!

9. Kuma ku batismu di kristons parsi ku di Kristu?

⁹ Un di mandamentus di Jesus i pa si sigiduris batisa. (Mat 28:19, 20) I disanu un isemplu. Na un parti, batismu di Jesus i diferenti di si sigiduris. (Jubi kuadru “ Kal ki diferensa entri batismu di Jesus ku di si sigiduris.”) Ma na utru parti i parsi. Oca Jesus batisadu i pursenta si kabesa pa fasi vontadi di si Pape. (Eb 10:7) Di mesmu manera, sigiduris di Kristu ta batisadu suma sinal pa mostra dianti di jintis di kuma, e dedika se vida pa Jeova Deus. Gosi, kusa mas importanti na se vida i fasi vontadi di Deus, i ka se propi vontadi. Asin e ta sigi isemplu di se Mestri.

10. Kal motivus ku bu tene pa ama Jesus, i ke ku es amor na lebau fasi?

¹⁰ Bu fia di kuma Jesus i uniku Fiju di Jeova, tambi bu kontenti di kuma el i Rei ku Deus kuji pa rena riba di nos. Bu sibi di kuma Jesus i umildi, tambi i kopia si Pape diritu. Bu aprindi di kuma i da di kume pa kilis ku tene fomi, i konsola kilis ku sta disanimadu, te mesmu i kura duentis. (Mat 14:14-21) Bu oja kuma ki ta lidera si kongregason aos. (Mat 23:10) I bu sibi di kuma suma Rei di Renu di Deus, i na bin fasi manga di kusas pa nos na futuru. Kuma ku bu pudi mostra di kuma bu amal? Ora ku bu na kopia si isemplu. (Jon 14:21) Bu pudi kumsa fasi es, ora ku bu dedika bu vida pa Jeova i bu batisa.

11. Kal ki motivu mas importanti ku na lebau pa bu batisa, i pabia di ke?

¹¹ Kal ki motivu mas importanti ku na lebau pa bu batisa? Jesus konta kal ki mandamentu di Deus ku mas garandi, oca ki i fala sin: “Ama Siñor bu Deus ku tudu bu korson, ku tudu bu alma, ku tudu bu ntindimentu, ku tudu bu forsa.” (Mar 12:30) Sera ki es palabras ta mostra amor ku bu tene pa Deus?

12. Pabia ku bu ama Jeova? (Jubi tambi fotos ku diseñu.)

¹² I ten manga di motivus pa ama Jeova. Pur isemplu, bu ntindi di kuma el i “fonti di vida” tambi, i ta da “tudu bon pursenti ku tudu kusa diritu”. (Sal 36:9; Tiagu 1:17) Tudu bon kusas ku bu tene, bin di no Deus bon i ku amanu.

13. Ke ku manda resgati i un prenda garandi dimas?

 ¹³ Resgati i un prenda garandi dimas ku Jeova danu. Pabia ku no pudi fala kila? Pensa na amisadi forti ku ten entri Jeova ku si Fiju. Jesus fala: “Ña Pape aman” i “N ama ña Pape”. (Jon 10:17; 14:31) Se amisadi torna mas forti oca e sta juntu pa bilyons di anus. (Dit 8:22, 23, 30) Pensa na dur garandi ku Deus sinti oca i disa si Fiju sufri i muri. Jeova ama pekaduris dimas, nkluindu abo, pa kila i sta dispostu pa da si Fiju ki ama, suma sakrifisiu pa bo ku utrus, pa bo pudi vivi pa sempri. (Jon 3:16; Gal 2:20) Es i motivu mas garandi ku no tene di ama Deus.

14. Kal ki minjor objetivu ku bu pudi tene na vida?

¹⁴ Bu amor pa Jeova kirsi, pabia bu aprindi mas aserka del. Na bardadi, bu misti pertusi mas del gosi i pa sempri. Bu pudi fasi kila. Ku bondadi, Jeova falau pa bu kontenta si korson. (Dit 23:15, 16) Bu pudi fasil i ka so ku palabras ma tambi ku asons. Manera ku bu ta leba bu vida, na mostra di kuma bu ama Jeova. (1 Jon 5:3) Es i minjor objetivu ku bu pudi tene na vida.

15. Kuma ku bu pudi mostra bu amor pa Jeova?

¹⁵ Kuma ku bu pudi mostra bu amor pa  Jeova? Purmeru, bu ta fasi un orason spesial nunde ku bu ta dedika bu vida pa uniku Deus di bardadi. (Sal 40:8) Dipus bu ta fasi pa utru jintis sibi di bu dedikason, ora ku bu batisa. Suma ku no fala na kumsada des studu, bu batismu i un mumentu filis, tambi i un mumentu importanti na bu vida. Bu kumsa vivi, i ka pa bu kabesa, ma pa Jeova. (Rom 14:8; 1 Ped 4:1, 2) Es pudi sedu un disison garandi pa toma, i kila propi ki sedu. Ma, i ta yabri kamiñu pa minjor vida. Di kal manera?

16. Ke ku Salmu 41:12 mostra aserka di ke ku Jeova na bin fasi pa kilis ku ta usa se vida pa sirbil?

¹⁶ Jeova i Algin ku mas ta pati. I ka mporta ke ku bu dal, sempri kil ki i na danu mas na ciu. (Mar 10:29, 30) I na dau un vida filis, mas interesanti i ku tene sintidu, mesmu nes mundu mau. Es i so kumsada. Vida ku bu kumsa oca ku bu batisa ka pirsisa di kaba. Bu pudi kontinua sirbi bu Pape amorosu pa sempri. Amor entri abo ku bu Pape na kontinua kirsi. Na bardadi, bu na vivi pa tudu tempu suma el. — Lei Salmu 41:12.

17. Ke ku bu pudi da Jeova ki ka tene inda?

¹⁷ Ora ku bu dedika bu vida pa Deus i batisa, bu ta tene privileẑiu di da bu Pape un kusa ku na bardadi tene balur. I dau tudu bon kusas, tudu bon mumentu ku bu pasa. Di bu parti, bu pudi da Dunu di seu ku Tera ke ki ka tene inda, ku sedu, sirbil di livri vontadi i ku tudu korson. (Jo 1:8; 41:11; Dit 27:11) Sera ki i ten minjor manera di usa bu vida mas di ki es? Sin duvida, bu amor pa Jeova i motivu mas garandi ku na lebau pa batisa.

18. Kal purguntas ku bu pudi fasi?

¹⁸ Kuma ku bu na ruspundi se puntau: Sera ki bu na batisa? So abo ku pudi ruspundi. Ma, i pudi sedu di ajuda si bu punta bu kabesa: ‘Pabia ku N na pera pa batisa?’ (At 8:36) Lembra di tris motivus  ku no falaba ja del. Purmeru, bu ama bardadi ku justisa. Punta bu kabesa: ‘Sera ki N misti oja dia ku tudu jintis na konta bardadi i fasi ke ku Deus misti?’ Sugundu, bu ama Jesus Kristu. Punta bu kabesa: ‘Sera ki N misti pa Fiju di Deus sedu ña Rei i N misti sigi si isemplu?’ Terseru, mas importanti, bu ama Jeova. Punta bu kabesa: ‘Sera ki N misti kontenta korson di Jeova i sirbil?’ Si bu resposta pa es purguntas sedu sin, pabia ku bu ka na batisa? Pabia ku bu na pera? — At 16:33.

19. Pabia ku bu ka dibi di tene dus sintidu aserka di batismu? Bu pudi da un isemplu. (Jon 4:34)

¹⁹ Si bu tene dus sintidu aserka di batismu, jubi un isemplu ku Jesus usa. (Lei Jon 4:34.) Nota kuma Jesus kompara fasi vontadi di si Pape ku kumida. Pabia? Kumida bon pa nos. Jesus sibi di kuma tudu ke ku Jeova pidinu pa no fasi i bon pa nos. Jeova ka misti pa no fasi kualker kusa ku na fasinu mal. Sera ki Jeova misti pa bu batisa? Sin. (At 2:38) Pa kila, bu pudi tene konfiansa di kuma obdisi mandamentu di batisa na sedu bon pa bo. Si bu ka ta tene dus sintidu pa kume kumida ku bu mas gosta del, pabia gora ku bu na tene dus sintidu pa batisa?

20. Ke ku no na bin fala del na studu ku na bin?

²⁰ Pabia ku alguns ta pera? Manga di jintis ta fala: “N ka sta inda prontu.” Na bardadi, disison di dedika bu vida pa Jeova i batisa i disison mas importanti ku bu na ciga di toma. Pa kila, bu pirsisa di toma tempu pa pensa diritu aserka des disison, i fasi sforsu garandi pa sta prontu pa batisa. Ma, si bu tene diseẑu forti pa batisa, ke ku bu pudi fasi gosi pa purpara? No na bin oja resposta des purgunta na studu ku na bin.