STUDU 14
“Tudu jinti ta rapara kuma abos i ña disipulus”
“Si bo ama n̈utru, tudu jinti ta rapara kuma abos i ña disipulus.” — JON 13:35.
KANTIKU 106 Amor – Uma Qualidade sem Igual
KE KU NO NA BIN FALA DEL a
Ke ku manga di jintis ku ka sedu Tustumuñas di Jeova ta pensa ora ke oja amor ku ten entri povu di Jeova? (Jubi paragrafu 1)
1. Ke ku ta dimira manga di jintis interesadu ku ta mati no runions? (Jubi tambi foto.)
IMAẐINA un kasal ku bin mati runion pa purmeru bias na Salon di Renu di Tustumuñas di Jeova. Kasal fika tokadu pa manera ke risibidu diritu, i oja amor ku ten entri ermons na kongregason. Oca ke na riba pa kasa, minjer fala si omi asin: ‘Es jintis diferenti di utrus ku no ciga ja di oja. N gosta di sta ku elis.’
2. Pabia ku alguns para sirbi Jeova?
2 Amor ku ten entri povu di Jeova ta notadu. Na bardadi, Tustumuñas di Jeova i ka jintis perfeitu. (1 Jon 1:8) Pa kila, mas no kunsi kilis ku sta na kongregason, talves no na mas oja se erus. (Rom 3:23) Infilismenti, alguns disa pa erus di utrus pui pa e para sirbi Jeova.
3. Kuma ku bu sibi ba kin ki kristons di bardadi? (Jon 13:34, 35)
3 Jubi mas testu prinsipal des studu. (Lei Jon 13:34, 35.) Kuma ku jintis pudi sibi ba kin ki kristons di bardadi? I amor, i ka perfeison. Nota tambi ke ku Jesus ka fala: ‘Bu ta rapara kuma abos i ña disipulus.’ Ma i fala: “Tudu jinti ta rapara kuma abos i ña disipulus.” Asin, Jesus mostra di kuma i ka so si sigiduris, ma tambi kilis ku sta fora di kongregason kriston na sibi ba kin ki si sigiduris di bardadi, atraves di amor di bardadi ke tene pa n̈utru.
4. Ke ku alguns jintis ta misti sibi aserka di kristons di bardadi?
4 Alguns jintis ku ka sedu Tustumuñas di Jeova pudi punta: ‘Kuma ku amor ta judanu sibi ba kin ku na bardadi sedu sigiduris di Jesus? Kuma ku Jesus mostra amor pa si apostolus? I kuma ku no pudi kopia isemplu di Jesus aos?’ I na sedu bon pa Tustumuñas di Jeova pensa na respostas des purguntas. Fasi es pudi judanu mostra inda mas amor, prinsipalmenti ora ku no na lida ku imperfeisons di n̈utru. — Ef 5:2.
PABIA KU AMOR I UN MANERA DI SIBI BA KIN KU NA BARDADI SEDU SIGIDURIS DI JESUS?
5. Splika palabras di Jesus ku sta na Jon 15:12, 13.
5 Jesus splika di kuma si sigiduris na ama n̈utru di un manera spesial. (Lei Jon 15:12, 13.) Nota di kuma Jesus da elis es mandamentu: “Bo ama n̈utru suma ku N ama bos.” (Anos ku pui letras karegadu ku italiku.) Ke ku es misti fala? Jesus splika di kuma es signifika ama utrus mas di ki no kabesa, o mostra tipu di amor ku na leba un kriston muri pa si ermon na fe si pirsis. b
6. Kuma ku Palabra di Deus mostra importansia di amor?
6 Palabra di Deus mostra di kuma amor i importanti dimas. Pur isemplu, pa manga di jintis, testus di Biblia ke mas gosta del i esis: “Deus i amor.” (1 Jon 4:8) “Ama bu kumpañer suma bo propi.” (Mat 22:39) “Amor ta kubri manga di pekadu.” (1 Ped 4:8) “Amor nunka i ka ta falia.” (1 Kor 13:8) Es versikulus ku utrus mostra di manera klaru di kuma, i importanti dimas mostra es manera di sedu bonitu.
7. Pabia ku Satanas ka na ciga nunka di uni jintis na amor di bardadi?
7 Manga di jintis ta punta: ‘Kuma ku N pudi sibi kal ki riliẑion di bardadi? Tudu riliẑions ta fala di kuma e ta nsina bardadi, ma kada un delis ta nsina kusas diferenti aserka di Deus.’ Satanas kria manga di riliẑions falsu, i kila pui pa i sedu difisil pa jintis sibi kal ki riliẑion di bardadi. Ma, nunka i ka na pudi kria un ermondadi na mundu ntidu ku ama n̈utru. So Jeova ku pudi fasi kila. No sibi kila pabia amor bin di Jeova. So kilis ku tene spiritu di Jeova ku si benson ku pudi tene amor di bardadi entri elis. (1 Jon 4:7) E ku manda Jesus fala di kuma, so si sigiduris ku na tene amor di bardadi pa n̈utru.
8-9. Kuma ku manga di jintis ta sinti ku amor ke oja entri Tustumuñas di Jeova?
8 Suma ku Jesus fala, manga di jintis sibi ba kin ki si sigiduris di bardadi, atraves di amor ke ta mostra entri elis. Pur isemplu, un ermon comadu Ian lembra di purmeru kongresu ki mati ku fasidu na un kampu di jugu pertu di si kasa. Ian baiba pa ki kampu puku misis antis pa bai jubi jugu. I fala sin: “Komportamentu di jintis na kongresu diferenti ciu ku jintis ku baiba jubi jugu. Tustumuñas di Jeova bistiba diritu, e sedu jintis edukadu, tambi se fijus komporta diritu.” I fala mas: “Parsi kuma e jintis tene kontentamentu ku pas. I es ku N misti na ña vida. N ka lembra nada di ke ku faladu del na ki dia, ma N kontinua lembra di komportamentu di Tustumunñas di Jeova.” c Na bardadi, es komportamentu i rusultadu di amor di bardadi ku no tene pa n̈utru. Suma no ama no ermons ku irmas, no ta trata elis ku bondadi i ku rispitu.
9 Un ermon comadu John sinti di mesmu manera oca i kumsa mati runions. I fala sin: “N fika tokadu ku amisadi di tudu jintis. I suma se sedu santus. Se amor di bardadi konvensin di kuma e sedu di riliẑion di bardadi.” d Es spiriensia ku manga di utrus mostra di kuma, povu di Jeova i kristons di bardadi.
10. Kal mumentu ku no mas pirsisa del pa mostra amor kriston? (Jubi tambi nota.)
10 Suma ki faladu na kumsada, nin un di no ermons ka sedu perfeitu. Utrora, e pudi fala o fasi un kusa ku na punu fika mal. e (Tiagu 3:2) Ora ku utrus punu fika mal, no pudi mostra di kuma no ama elis atraves di ke ku no ta fala i fasi. Aserka des, ke ku no pudi aprindi di isemplu ku Jesus disanu? — Jon 13:15.
KUMA KU JESUS MOSTRA AMOR PA SI APOSTOLUS?
Jesus mostra amor pa si apostolus mesmu manera ke fasi manga di erus. (Jubi paragrafu 11 te 13)
11. Kal mau maña ku Tiagu ku Jon mostra? (Jubi tambi diseñu.)
11 Jesus ka spera pa si sigiduris sedu perfeitu. En ves di kila, ku amor, i juda elis pa e kuriẑi se mau mañas pa e pudi kontenta Jeova. Un bias, dus di si apostolus, Tiagu ku Jon, fala se mame pa i bai pidi Jesus pa i da elis pusison garandi na si Renu. (Mat 20:20, 21) Ke ku Tiagu ku Jon fasi mostra di kuma, e seduba orgulyosu tambi e mistiba sedu mas importanti di ki utrus. — Dit 16:18.
12. Sera ki i so Tiagu ku Jon ku mostra mau maña? Bu pudi splika.
12 I ka so Tiagu ku Jon ku mostra es mau maña na ki mumentu. Nota kuma ku utrus apostolus reaẑi: “Oca ku ki des obi e kombersa, e paña raiba kontra ki dus ermon.” (Mat 20:24) No pudi imaẑina Tiagu, Jon ku utrus apostolus na jusiaba ku n̈utru ku forsa. Talves utrus apostolus fala un kusa suma es: ‘Kin ki bo pensa bo sedu, pa pidi pusison mas garandi na Renu? Abos i ka uniku ku tarbaja risu ku Jesus. Anos tambi no mersi tene pusison importanti suma bos!’ I ka mporta ke ke pensa o fala na ki mumentu, e diskisi di kuma e dibi di mostra sempri amor ku bondadi pa n̈utru.
13. Kuma ku Jesus reaẑi ku erus di si apostolus? (Mateus 20:25-28)
13 Kuma ku Jesus lida ku situason? Jesus ka paña raiba. I ka fala kuma i na bai buska utrus apostolus ku tene mas umildadi, i ku sempri ta trata n̈utru ku amor. En ves di kila, Jesus papia ku elis ku pasensa, pabia i sibi di kuma e misti fasi ke ki sertu. (Lei Mateus 20:25-28.) Jesus sempri trata si apostolus ku bondadi, mesmu manera ke kontinua diskuti aserka di kin ki mas garandi. — Mar 9:34; Luk 22:24.
14. Na kal tipu di ambienti ku apostolus di Jesus kirsi nel?
14 Ku sertesa, Jesus lembraba di kuma kultura nunde ku apostolus kirsiba nel influensia elis. (Jon 2:24, 25) E kirsiba na un ambienti nunde ku lideris riliẑiosu ta nsinaba di kuma, jintis ta sedu importanti so ora ke tene pusison garandi. (Mat 23:6; komparal ku video Primeiros assentos na sinagoga, na nota di studu di Mateus 23:6.) Tambi lideris riliẑiosu judeus ta pensaba kuma e mas minjor di ki utrus. f (Luk 18:9-12) Jesus ntindiba di kuma es manera di pensa pudi afeta manera ku si apostolus ta ojaba se kabesa ku utrus. (Dit 19:11) I ka spera di kuma si disipulus ka na ciga di fasi erus, tambi i seduba pasienti ku elis ora ke yara. I sibiba di kuma e mistiba fasi ke ki bon. Pa kila, ku pasensa i nsina elis pa e sedu mas umildi i mostra amor pa n̈utru, en ves di sempri tenta sedu mas garandi.
KUMA KU NO PUDI KOPIA ISEMPLU DI JESUS?
15. Ke ku no pudi aprindi di ke ku pasa entri Tiagu, Jon i ku utrus apostolus?
15 No pudi aprindi manga di kusas di ke ku pasa entri Tiagu, Jon i ku utrus apostolus. I seduba mal pa Tiagu ku Jon pidi Jesus pusison importanti na Renu. Ma, utrus apostolus yaraba tambi. E disa pa ki situason fasi elis pa e ka kontinua unidu. Ma, Jesus seduba bon i mostra amor pa tudu 12 apostolus. Kal ki lison pa nos? Lison i es: Mesmu si no tene motivu di fika mal ku ke ku utrus fasi, no dibi di presta atenson na kuma ku no ta reaẑi dianti di se erus ku falias. No dibi di kontinua ama elis i mostra bondadi. Ke ku pudi judanu? Ora ku no fika mal ku un ermon na fe, no dibi di fasi no kabesa es purguntas: ‘Ke ku manda ke ki fasi pun fika mal dimas? Sera ki i mostra algun frakesa ku N tene i ku N pirsisa di kuriẑi? Sera ki algin ku yaran sta na pasa algun purblema? Mesmu si N tene bon motivu di fika mal, sera ki N pudi mostra amor i purdal?’ Ora ku no mostra amor pa n̈utru, no ta mostra di kuma no sedu kristons di bardadi.
16. Ke mas ku no pudi aprindi di isemplu di Jesus?
16 Isemplu di Jesus nsinanu tambi pa no tenta ntindi no ermons na fe. (Dit 20:5) Na bardadi, Jesus pudiba lei korson di jintis. Anos no ka pudi. Ma, no pudi sedu pasienti ku no ermons ku irmas ora ke yaranu. (Ef 4:1, 2; 1 Ped 3:8) I na sedu mas fasil pa no fasil si no kunsi elis minjor. Bu pudi jubi un isemplu.
17. Kuma ku un superintendenti di sirkuitu benefisia di kunsi un ermon mas minjor?
17 Un superintendenti di sirkuitu lembra di un ermon di un di kongregasons ki ta visitaba na Afrika di lesti. Na kumsada i pensaba kuma ermon ka sedu bondosu. Ke ku superintendenti di sirkuitu fasi? I fala sin: “En ves di ivita ermon, N disidi kunsil minjor.” Oca superintendenti di sirkuitu pasa tempu ku ermon, i diskubri kuma ku ermon kriadu i kuma ku kila afeta manera ki ta trata utrus. Superintendenti di sirkuitu kontinua fala sin: “Oca N diskubri kuma ki sedu difisil pa i fasi mudansas pa pudi da ben ku utrus jintis i kal mudansas ki fasi ja, N fika dimiradu ku el.” Na bardadi, ora ku no tenta ntindi no ermons ku irmas, i ta sedu mas fasil mostra elis amor.
18. Kal purguntas ku no pudi fasi no kabesa si no ermons na fe punu fika mal? (Ditus 26:20)
18 Utrora no pudi oja di kuma no pirsisa di papia ku un ermon na fe ku yaranu. Ma, purmeru, i na sedu bon fasi no kabesa es purguntas: ‘Sera ki N ntindi diritu ke ku kontisi?’ (Dit 18:13) ‘Sera ki i fasi ki eru sin misti?’ (Ekl 7:20) ‘Sera ki N ciga di fasi mesmu eru?’ (Ekl 7:21, 22) ‘Si N bai papia ku ki algin aserka des, sera ki i na piora situason?’ (Lei Ditus 26:20.) Ora ku no toma tempu pa pensa nes purguntas, no pudi nota di kuma amor pudi lebanu para pensa na ke ku pasa.
19. Ke ku bu dibi di sta disididu pa fasi?
19 Suma grupu, Tustumuñas di Jeova mostra di kuma na bardadi elis i sigiduris di Jesus. Kada un di nos pudi mostra di kuma na bardadi no sedu sigiduris di Jesus, ora ku no mostra amor di bardadi pa no ermons ku irmas apesar di se imperfeisons. Ora ku no mostra amor di bardadi, no pudi juda utrus diskubri kal ki riliẑion di bardadi i junta ku nos na adora Jeova, Deus di amor. Pa no sta disididu pa kontinua mostra amor ku ta judanu sibi ba kin ki kristons di bardadi.
KANTIKU 17 “Eu Quero!”
a Manga di jintis ta misti aprindi mas aserka di Jeova ku si Palabra, pabia di amor di bardadi ke ta oja entri nos. Ma, no ka sedu perfeitu, pa kila, utrora i ka ta fasil mostra amor pa n̈utru. No na jubi pabia ku amor i importanti dimas, i kuma ku no pudi kopia isemplu di Jesus, ora ku no na lida ku imperfeisons di n̈utru.
c Jubi artigu “Finalmente, a minha vida tem objetivo,” na Sintinela di 1 di Novembru di 2012, paẑina 13 ku 14.
d Jubi artigu “A minha vida parecia muito boa,” na Sintinela di 1 di Maiu di 2012, paẑina 18 ku 19.
e Es studu ka na fala di pekadus gravi ku ansions dibi di trata, suma kilis ku faladu del na 1 Koríntius 6:9, 10.
f I faladu di kuma un lider riliẑiosu ciga di fala sin: “Na mundu, i ten pelu menus trinta omis justu suma Abraon. Si i ten trinta, ami ku ña fiju i dus delis; si i ten des, ami ku ña fiju i dus delis; si i ten sinku, ami ku ña fiju i dus delis; si i ten dus, i ami ku ña fiju; ma si i bin ten un son, i ami.”
