1. Ke ku papes ta misti pa se fijus?

 PAPES, no sibi di kuma bo misti juda bo fijus pa e kunsi i ama Jeova. Ma, no ka pudi oja Deus. Kuma ku bo pudi juda bo fijus pa e oja di kuma Jeova izisti i pertusi del? — Tiagu 4:8

2. Kuma ku papes pudi nsina se fijus aserka di maneras di sedu di Jeova?

² Un manera importanti di juda bu fijus, i ora ku bu na studa Biblia ku elis. (2 Tim 3:14-17) Ma, Biblia fala tambi di utru manera ku jovens pudi aprindi di Jeova. Na livru di Ditus, un pape lembranta si fiju pa i ka diskisi di jubi bon maneras di sedu di Jeova ku mostradu na kusas ku Deus kumpu. (Dit 3:19-21) No na jubi diferenti maneras ku papes pudi usa kusas ku Deus kumpu, pa juda se fijus aprindi aserka di maneras di sedu di Jeova.

3. Kal ajuda ku papes dibi di da se fijus?

³ Biblia fala sin aserka di Deus: “Si koldadi ku ka ta ojadu ku uju, ku sedu si puder sin fin suma el i Deus, i un kusa klaru disna ki kumpu mundu; i ojadu pabia di kusas ki kria.” (Rom 1:20) Papes, talves bo gosta di pasa tempu ku bo fijus na ar livri. Usa es tempu pa juda bo fijus oja ligason ku ten, entri “kusas ki kria” ku maneras di  sedu di Jeova ku ta dimira. No na jubi ke ku papes pudi aprindi di kuma ku Jesus ta nsina.

4. Kuma ku Jesus usa kusas ku Deus kumpu pa nsina si disipulus? (Lukas 12:24, 27-30)

⁴ Nota kuma ku Jesus usa kusas ku Deus kumpu pa nsina. Un bias, Jesus fala si disipulus pa e jubi pa korvus ku floris. (Lei Lukas 12:24, 27-30.) Jesus pudiba fala di kualker limaria o planta, ma en ves di kila, i fala di kacus ku floris ku si disipulus kunsi diritu. Talves disipulus oja korvus na bua i floris na kirsi na matu. Bu pudi imaẑina Jesus, na mostra elis ki kusas nkuantu i na papia ku elis? Ke ki fasi dipus di fala des kusas? I nsina si disipulus lisons importanti aserka di se Pape ku sta na seu, ku sedu bon i ku ta pati: Jeova na da di bisti ku di kume pa si servus fiel, suma ki ta fasi ku korvus i ku floris di matu.

5. Kal isemplus di kusas ku Deus kumpu ku papes pudi usa pa nsina se fijus aserka di Jeova?

⁵ Papes, ora ku bo na nsina bo fiju, kuma ku bo pudi kopia isemplu di Jesus? Bo pudi konta bo fiju un kusa ku Jeova kumpu ku bo gosta del, suma pur isemplu, limaria o planta ku bo mas gosta del. Ora ku bo na konta bo fiju aserka des kusas, bo dibi di splikal ke ku es kusas ta nsinanu aserka di Jeova. Dipus bo pudi tambi punta bo fiju kal limaria o planta ki mas gosta del. Si bo papia di kusas ku na interesa bo fiju, talves i na misti sukutau utru bias ku bo na papia ku el pa nsinal aserka di Jeova.

6. Ke ku no pudi aprindi ku isemplu di mame di Christopher?

⁶ Sera ki papes pirsisa di gasta manga di tempu na buska un tipu di limaria o planta, antis di papia di ke ku es kusa ta nsina aserka di Jeova? I ka pirsis. Jesus ka da un splikason kumpridu pa splika aserka di kuma ku korvus ta kume o di kuma ku floris ta kirsi. Mesmu si bu fiju gosta di aprindi manga di kusas aserka di kusas ku Deus kumpu, utrora un simplis splikason o purgunta pudi judal ntindi ke ku bu misti fala. Nota ke ku un ermon comadu Christopher, lembra ocal pikininu: “Ña mame ta fasi un splikason simplis pa judanu gosta di kusas ku Deus kumpu, ku no kunsi. Pur isemplu, ora ku no pertu montañas i ta falanu: ‘Jubi kuma ku es montañas garandi i bonitu! Sera ki Jeova i ka di dimira?’ Ora ku no pertu osianu, i ta falanu: ‘Jubi puder des ondas di mar! Sera ke ka ta mostra kuma Deus tene puder?’” Christopher fala: “Es kumentarius simplis, ma interesanti ta fasinu pensa.”

7. Kuma ku bo pudi trena bo fijus pa e pensa fundu na kusas ku Deus kumpu?

⁷ Nkuantu bo fijus na kirsi, bo pudi trena elis pa e kumsa pensa aserka di kusas ku Deus kumpu i aprindi aserka di Jeova. Bo pudi so fala di un kusa ku Deus kumpu i punta bo fijus: “Ke ku es ta nsinau aserka di Jeova?” Bo pudi fika surprendidu i kontenti di obi ke ku bo fijus ta pensa. — Mat 21:16.

8. Kal oportunidadi ku papes israelitas tene di nsina se fijus ora ke na yanda “na kamiñu”?

⁸ Papes israelitas faladu pa e nsina se fijus mandamentus di Jeova, ora ke na yanda “na kamiñu”. (Lei 11:19) Kamiñus ta leba pa matu di Israel. Nes kamiñus, i pudiba ojadu diferenti limarias, kacus ku floris. Ora ku familias israelitas na  yanda na kamiñu, papes ta teneba oportunidadi di papia ku se fijus di kusas ku Jeova kumpu. Abos papes bo tene tambi mesmu oportunidadi di usa kusas ku Deus kumpu pa nsina bo fijus. Jubi kuma ku alguns papes fasi kila.

9. Ke ku bu pudi aprindi di isemplu di Punitha ku Katya?

⁹ Un mame comadu di Punitha ku mora na un sidadi garandi di India, fala sin: “Ora ku no na visita familia na tabanka, no ta ojal suma un oportunidadi di juda no fijus aprindi di kusas bonitu ku Jeova kumpu. N nota di kuma ña fijus ta ntindi minjor kusas ku Deus kumpu ora ke sta lunju di ruas ku tene manga di jintis i di sidadi muvimentadu.” Papes, talves bo fijus nunka ka na diskisi di tempu ke pasa juntu ku bos na un kau bonitu. Katya, un irma di Moldavia, fala sin: “Kusas ku N mas ta lembra del na ña mininesa i tempu ku N pasa ku ña papes na tabanka. N na gardisi elis pa manera ke nsinan desdi ocan pikininu, pa para i jubi ke ku Jeova fasi, i kunsil minjor atraves di kusas ki kumpu.”

10. Ke ku papes pudi fasi si i difisil pa e sai fora di sidadi? (Jubi kuadru “ Ajuda pa papes.”)

¹⁰ Ke gora si i ka pusivel bai pa tabanka? Amol, ku mora tambi na India, fala sin: “Nunde ku N mora papes ta tarbaja manga di oras, i bai pa tabanka pudi sedu karu. Ma, bo pudi jubi kusas ku Jeova kumpu i papia di si maneras di sedu, ora ku bo sta na jardin pikininu o riba di un prediu.” Ora ku bo jubi diritu, talves bo pudi tambi diskubri manga di kusas ku Deus kumpu ku bo pudi mostra bo fijus. (Sal 104:24) Talves bo na oja kacus, bicus, plantas ku utru kusas. Karina ku mora na Almaña fala sin: “Ña  mame gosta di floris, pa kila, ocan mas puku, kada bias ku no na yanda juntu i ta mostran floris bonitu.” Papes, bo pudi tambi usa manga di videos ku publikasons ku ta fala di kusas ku Deus kumpu ku no organizason fasi, pa nsina bo fijus. I ka mporta nunde ku bo mora, bo pudi juda bo fijus pa e jubi kusas ku Deus kumpu. Gosi, no na jubi alguns maneras di sedu di Jeova ku bo pudi mostra bo fijus.

11. Kuma ku papes pudi juda se fijus nota amor di Jeova?

¹¹ Pa juda bo fijus nota amor di Jeova, bo pudi mostra elis kuma ku manga di limarias ta kuida di se fijus ku kariñu. (Mat 23:37) Bo pudi tambi fala di manga di kusas bonitu ku no gosta ciu del na kusas ku Deus kumpu. Karina ku faladu del na kumsada, fala sin: “Ora ku no na yanda na rua, ña mame ta nkoraẑan pa N para i jubi kuma ku kada flor i diferenti di n̈utru, i kuma ku si bonitasku ta mostra amor di Jeova. Anus mas tardi, N kontinua jubi floris diritu i N nota kuma ku se kor i manera ku kada un delis fasidu i diferenti di n̈utru. Floris kontinua lembrantan di kuma Jeova amanu ciu dimas.”

12. Kuma ku papes pudi juda se fijus nota jiresa di Deus? (Salmu 139:14) (Jubi tambi foto.)

¹² Juda bu fijus nota jiresa di Deus. Jeova mas nos jiru lunju. (Rom 11:33) Pur isemplu, bu pudi konta bu fiju kuma ku yagu ta forma nuvens, i dipus kuma ku es nuvens ta leba yagu di un manera fasil, di un ladu pa utru. (Jo 38:36, 37) Bu pudi falal tambi di kuma ku kurpu di pekadur kumpudu di un manera ku ta dimira. (Lei Salmu 139:14.) Jubi kuma ku un pape comadu Vladimir fasil. I fala sin: “Un dia, no fiju kai na bisikleta i molostra. Alguns dias dipus i san. Ami ku ña minjer no splika no fiju di kuma, Jeova kumpu no kurpu ku kapasidadi di kura si kabesa. No splikal di kuma, na kusas ku pekaduris kumpu, i ka ten nin un kusa ku parsi ku es. Pur isemplu, un karu ka ta kumpu si kabesa dipus di un  asidenti. Es spiriensia juda no fiju ntindi jiresa di Jeova.”

13. Kuma ku papes pudi juda se fijus nota puder di Deus? (Isaias 40:26)

¹³ Jeova kumbidanu pa no yalsa no ujus pa seu, i pensa na puder garandi ki tene di pui tudu strelas na se lugar. (Lei Isaias 40:26.) Bu pudi nkoraẑa bu fijus pa e jubi pa seu i pensa na ke ke oja. Un irma di Taiwan comadu Tingting, lembra di un kusa ku kontisi oca ki seduba joven: “Un bias, ña mame leban pa kampamentu i no pudiba oja manga di strelas, pabia no ka staba na sidadi ku tene manga di lus. Ki tempu, N staba preokupadu di kuma N ka na konsigi manti fiel, pabia ña kolegas di skola ta tentaba pui pa i difisil pa N obdisi Jeova. Ña mame nkoraẑan pa N pensa na puder ku Jeova usa pa kumpu tudu es strelas, i pa N lembra di kuma Jeova pudi usa es puder pa judan nfrenta kualker purblema. Dipus di jubi kusas ku Deus kumpu na ki bias ku no fasi, kila leban na kunsi Jeova minjor, i sta mas disididu pa sirbil.”

14. Kuma ku papes pudi usa kusas ku Deus kumpu pa juda se fijus oja Jeova suma un Deus filis?

¹⁴ Kusas ku Jeova kumpu ta mostra di kuma el i filis, tambi i misti pa no sedu filis. Sientistas nota di kuma manga di limarias ta brinka, suma kacus ku pis. (Jo 40:20) Sera ki bu fijus ciga di ri oca ke oja un limaria na brinka? Talves e oja ja un gatu ku na brinka ku bilas o kacuriñus ora ke na junda junda n̈utru. Utru bias ku bu fijus na ri ora ke oja limarias na fasi un kusa ku ta pui elis ri, pabia ku bu ka na lembranta elis di kuma, no ta sirbi un Deus gloriosu o filis? — 1 Tim 1:11.

15. Ke ku pudi juda papes pa e diskubri ke ku se fijus sta na pensa? (Ditus 20:5) (Jubi tambi foto.)

¹⁵ Utrora, papes pudi oja di kuma i difisil pa pui se fijus papia di purblemas ke sta na pasa. Si bu sta nes situason, talves bu pirsisa di diskubri ke ku bu fijus sta na pensa. (Lei Ditus 20:5.) Alguns papes nota di kuma i ka difisil fasil, ora ke na  jubi kusas ku Deus kumpu juntu ku se fijus. Pabia di ke? Un motivu i di kuma, papes ku fijus tene puku kusas ku na distrai elis. Un pape na Taiwan comadu di Masahiko fala di utru motivu: “Ora ku ami ku ña minjer no pasa tempu ku no fijus fora di kasa, na subi montañas o yanda na praia, e kustuma ta sta mas avontadi. Asin i ta torna mas fasil diskubri ke ke sta na pensa.” Katya ku faladuba del na kumsada fala sin: “Manga di bias, ña mame ta leban pa un jardin bonitu dipus di aulas. Na ki ambienti kalmu, i ta sedu mas fasil kontal ke ku pasa na skola o ke ku sta na preokupan.”

16. Kuma ku familias pudi sta mas avontadi i divirti, ora ke na jubi kusas ku Jeova kumpu?

¹⁶ Ora ku familias na jubi kusas ku Jeova kumpu e pudi sta mas avontadi i divirti. Es ta juda pa e mas ama n̈utru. Biblia fala kuma ten “tempu di ri” ku “tempu di baja”. (Ekl 3:1, 4) Jeova kumpu kaus bonitu na Tera nunde ku no pudi fasi kusas ku no gosta. Manga di familias gosta di bai pa ilias, tabankas ku praia. I ten mininus ku gosta di kuri i brinka na jardin, jubi limarias o nada na rius, lagua o na mar. I ten manga di oportunidadi di jubi naturesa ku kusas ku Deus kumpu!

17. Ke ku manda papes dibi di juda se fijus gosta di kusas ku Deus kumpu?

¹⁷ Na nobu mundu di Deus, papes ku fijus na apruveita di kusas ku Jeova kumpu di un manera ke ka pudi fasi aos. Na ki tempu, no ka na tene motivu di medi limarias o pa e medi nos. (Isa 11:6-9) No na kontenti ku kusas ku Jeova kumpu pa sempri. (Sal 22:26) Ma papes, ka bo pera te ki tempu pa kumsa juda bo fijus apruveita di kusas ku Deus kumpu. Ora ku bo na usa kusas ku Deus kumpu pa nsina bo fijus aserka di Jeova, talves bo na konkorda ku rei Davi ku fala sin: “SIÑOR; nin un delis ka fasi tarbaju suma di bo.” — Sal 86:8.