IMAẐINA kuma bu sta na visita un museu, ku tene manga di statuas antigu. I maioria delis kumsa ku dana o n̈apati. I alguns tene partis ku na falta. Ma pa bu surpresa un delis ka dana, tudu si partis sta kompletu. Bu punta algin ku na giau: “Sera ki es i mas nobu di ki ki utrus?” I falau: “Nau, i mas beju di ki ki utrus, nunka i ka ciga di reparadu.” Bu puntal: “Sera ki pudu algun kusa pa proteẑil?” Guia falau: “Nau, i staba bas di bentu ku cuba forti, i manga di bandidus tenta danal.” Talves bu pudi punta ku adimirason: ‘Ke ki kumpudu ku el?’

Na un sertu sintidu, Biblia i suma ki statua impresionanti. I un livru muitu antigu. I mas tarda di ki maioria di livrus. I bardadi kuma i ten manga di utrus livrus antigu, ma suma ki statuas antigu, maioria di livrus ku skirbidu, ku tempu bin dana. Pur izemplu, ke ke skirbi aserka di siensia, i kontrariu di ke ku jintis sibi aos, i di provas ku ten. Konsijus ke da aserka di saudi parsi sedu mas pirigosu di ki juda. I manga di ki livrus antigu, ka sta suma ke skirbiduba, alguns partis pirdi o utrus dana ciu.

Ma Biblia mostra sedu diferenti. I skirbidu serka di 35 sekulus atras, ma mesmu asin i sta kompletu. Apesar di atakadu manga di bias duranti sekulus, i kemadu, i proibidu, i disprezadu, mesmu asin ke ki fala ka muda. En ves di sedu un livru antigu, dianti di kuñisimentu atual, Biblia fala di manga di kusas, ku mas tardi bin ojadu di kuma i bardadi.

Talves bu pudi punta: ‘Sera ki nsinus di Biblia i pratiku pa nos aos?’ Pa ruspundi es purgunta, punta bu kabesa: ‘Kal ki purblemas mas garandi ku jintis ta pasa aos? Na ki purblemas, kal ki alguns ki mas pirigosu?’ Talves bu na pensa na gera, puluison, krimi, o kurupson. Gosi no jubi alguns nsinus basiku di Biblia, nkuantu bu na jubi elis punta bu kabesa: ‘Si jintis ta viviba di akordu ku es normas, sera ki mundu ka na seduba minjor?’

AMA PAS

“Sortiadu i kilis ku ta pui pas na metadi di jinti, pabia e na comadu fijus di Deus.” (Mateus 5:9) “Bo fasi mas ku bo pudi pa ten pas ku tudu jinti.” — Romanus 12:18.

MISERIKORDIA KU PURDON

“Sortiadu i kilis ku ta trata utrus ku miserikordia, pabia e na bin oja miserikordia tambi.” (Mateus 5:7) “Bo nguenta n̈utru, bo purda n̈utru si algin ten keŝa kontra utru; suma ku Siñor purda bos, bo fasi asin tambi.” — Kolosensis 3:13.

ARMONIA ENTRI JINTIS DI DIFERENTI RASA

Deus “kumpu un omi ku tudu rasas bin sai nel, pa e mora na tudu parti di mundu.” (Atus 17:26) “Deus ka ta fasi skuju di jinti, ma i ta seta tudu, di kalker rasa, ku rispital, ku ta fasi kil ki justu.” — Atus 10:34, 35.

KUIDA BEN DI TERA

“SIÑOR Deus toma omi, i pul na jardin di Eden pa i labral, i toma konta del.” (Kumsada 2:15) Deus na bin “dana ki jinti ku dana tera.” — Apokalipsi 11:18.

ODIA KUBISA KU PEKADU SEKSUAL

“Bo libra di tudu koldadi kubisa, pabia vida di algin i ka sta na manga di kusa ki tene.” (Lukas 12:15) “Pekadu seksual ku tudu koldadi vida susu ku kubisa, i ka bon pa i comadu na bo metadi, suma ku bo sedu pobu di Deus.” — Efésius 5:3.

FASI KE KI DIRITU, I FASI BON TARBAJU

“No misti fasi sempri kil ki diritu.” (Ebreus 13:18) “Kil ku ta furtaba, pa i para furta, i pega ku si mon, i fasi bon tarbaju”. — Efésius 4:28.

IMPORTANSIA DI JUDA KILIS KU STA NA NESESIDADI

“Bo da koraẑen pa kilis ku ta medi; bo juda kilis ku fraku; bo ten pasensa ku tudu jinti.” (1 Tesalonisensis 5:14) “Juda orfans ku viuvas na se kansera”. — Tiagu 1:27.

Biblia ka tene so lista des normas, ma di manera pratiku i ta sinanu valoriza es normas, i aplika elis na no vida di kada dia. Si manga di jintis ta puiba na pratika es nsinus ku faladu del, sera ki ka na tenba menus purblemas na mundu? Na bardadi, balur di normas di Biblia mas ta ojadu aos di ki nunka! Kuma ku nsinus di Biblia pudi judau desdi gosi?

Un bias, omi mas jiru fala sin: “Jiresa di Deus ta mostradu kuma i sertu pabia di si rusultadu.” (Mateus 11:19) Bu sta di akordu ku es? Un bon manera di testa jiresa, i oja rusultadu ki da ora ku bu pul na pratika. Talves bu pudi punta: ‘Si na bardadi Biblia i pratiku, sera ki i ka dibi di da bon rusultadu na ña vida? Kuma ki pudi judan lida ku purblemas ku N sta na pasa?’ Jubi un izemplu.

Delfina * teneba un vida okupadu i interesanti. Di repenti, i pasa manga di kasabi tras di n̈utru ku perda garandi. Si fiju femia adolesenti muri. Si kasamenti kaba. I kumsa ku tene purblemas finanseru. I fala: “N ka paña pe di ña kabesa, N fika sin fiju, sin omi, i sin kasa. N sinti suma si N ka bali nada, sin identidadi, sin forsa, i sin speransa pa futuru.”

Nunka antis Delfina sinti na peli, bardadi des palabras: “No vida ta bai te setenta anu; si no ten forsa, no pudi ciga na oitenta. Ma ki anus na tisinu son kansera ku tristesa; e ta pasa dipresa; no ta bua.” — Salmu 90:10.

Delfina oja ajuda na Biblia duranti ki mumentu difisil. Biblia judal di un manera spesial. Manga delis oja tambi kuma Biblia juda elis ciu, oca ke aplika konsijus ki da aserka di purblemas di vida. E bin oja di kuma Biblia i suma ki statua, ku no falaba ja del na kumsada. I muitu diferenti ku manga di livrus beju i ku pasa prazu. Sera ki i pabia di kuma Biblia fasidu ku algun kusa diferenti? Sera ki na bardadi i tene pensamentus di Deus, i ka so ideias di omi? — 1 Tesalonisensis 2:13.

Talves bu oja tambi kuma vida i kurtu i tene manga di purblemas. Ora ku purblemas kambau kabesa, nunde ku bu ta bai buska konsolu, apoiu ku konsijus di konfiansa?

No jubi tris manera ku Biblia pudi mostra sedu pratiku na bu vida. I pudi sinau kuma ku bu pudi

1. ivita di purblemas ora ki pusivel.

2. rosolvi purblemas ora ki ten.

3. lida diritu ku situasons ku bu ka pudi muda.