Na anu 2020 i ten manga di disastris natural i duensa di Koronavirus kumsa na mundi ntidu. Kuma ku Tustumuñas di Jeova juda kilis ku sufri pabia des situason?

 Duranti anu di sirvisu di 2020, a Kumison di Kordenaduris di Korpu Guvernanti, aprova pa i gastadu 28 milyon di dolar b (mas o menus 15.130.000.000 FCFA) na disastris natural. Es juda kilis ku sufri di disastris natural. I ojadu mas di 200 disastri natural, entri elis i sta COVID-19, bentus forti, inundasons na Afrika, falta di kumida na Venezuela, ku sekura na Zimbabue. Fundus di oferta juda na paga kumida, yagu, kau di mora, ropas, mesiñus, suma tambi kusas simplis pa limpeza, repara i kumpu kaus ku dana. Jubi alguns isemplu di tarbaju di ajuda umanitariu.

 COVID-19. Na mundu ntidu es duensa afeta no ermons ku irmas na sintidu fisiku, emosional ku ekonomiku. Pa juda elis, mas di 800 Kumison di Ajuda Umanitariu (KAU) formadu na mundu ntidu. Es kumisons ta sta en dia ku nesesidadis di no ermons, e ta fasi logu relatoriu ku ta juda Kumison di Kordenaduris sibi minjor manera di da ajuda.

 Duranti anu di sirvisu di 2020, Kumison di Ajuda Umanitariu, juda manga di jintis tene kumida, yagu, material pa limpeza ku mesiñus. Na alguns zonas, Kumison di Ajuda Umanitariu, tarbaja juntu ku ansions lokal pa juda ermons konsigi ajuda ku guvernu ta da.

 Kilis ki ka Tustumuñas di Jeova nota di ajudas ku no ta da. Pur isemplu, Field Simwinga, otridadi di reẑion di Nakonde, Zambia, fala no ermons: “No tene dibida ku bos pabia di ajuda ku bo da na mumentu sertu, pa familias ku pirsisa ciu di ajuda.”

 Falta di kumida na Angola. Duensa di Koronavirus pui pa i ten falta di kusas di kume na Angola i pres di kusas di kume omenta ciu. Manga di no ermons ku no irmas tene difikuldadi di kumpra kusas di kume.

 Filial di Brazil pididu pa juda na manda kusas di kume pa no ermons na Angola. Pa pudi usa ben fundu di ajuda umanitariu, ermons fasi piskisa pa sibi kal ki minjor manera di kumpra i manda kumida. I kumpradu manga di kusas di kume. Pa kumpra i manda kada kaŝa i kusta mas o menus 22 dolar (mas o menus 12.000 FCFA). Kada un delis tene mas o menus 20 kilu di kusas di kume, suma arus, fijon ku azeiti. Te nes mumentu, i mandadu 33.544 kaŝa, un total di 654 tonelada. Juntu ku kusas di kume ku tenba ja la, es juda na alimenta mas di 50.000 jintis!

 Kuma ku no ermons sinti kes ajuda ke risibi? Alexandre, ku mora na un zona isoladu di Angola fala: “Es judan oja di kuma Jeova aman, N ka sta ami son, i N tene balur na organizason di Jeova!” Mariza, un mame ku na kria si fijus el son fala sin: “Jeova obi ña orason N na gardisil i N na gardisi si organizason!”

 Ajuda ku dadu pa Zimbabue pabia di sekura. Na anu di sirvisu di 2020, Zimbabue pasa sekura garandi, i pui milyons di jintis sufri ciu di fomi. Manga di Tustumuñas di Jeova na Zimbabue, staba ku falta di kusas di kume.

 Sinku Kumison di Ajuda Umanitariu formadu pa juda ermons ku kusas di kume. Manga di publikaduris juda na mbala kumida, lambu elis pa pui na karu o utrus pista se karu. c Duranti anu di sirvisu di 2020, i usadu 691.561 dolar (mas o menus 375.000.000 FCFA) pa juda mas di 22.700 jintis!

 Na alguns kasus, ermons risibi ajuda oca ku se kumida kaba. Oca ku kumida ciga ermons ngaba Jeova. Utrus propi kumsa ku kanta kantikus di Renu.

 Na un zona, dus Tustumuñas di Jeova viuva bai mati un runion na se bairu, ku na fala di ajuda ku na bin dadu pa un organizason ki ka di guvernu (ONG). Ma duranti e runion e kumsa na papia puku-puku di asuntus pulitiku i no irmas ka seta kondison ku pudu pa risibi ajuda. Oca ke lanta pa sai di runion, jintis kumsa na goza elis i e fala: “Ka bo bin pidinu kumida!” Ma dus semana dipus, no ermons ciga na ki zona, i e da ki no irmas kumida, antis di kumida di ONG ciga.

 Ajuda Umanitariu na Zimbabue da tambi un bon tustumuñu. Pur isemplu, jubi spiriensia di Prisca ku mora na un tabankasiñu. Apesar di difikuldadi ku sekura tisi, Prisca ta sai pregason kada kuarta ku sesta, mesmu na tempu di labur. Jintis na si tabanka ta gozal, e ta falal: “Bu na mata bu familia ku fomi, pabia di konta Palabra di Deus.” Prisca ta ruspundi elis: “Jeova nunka ka ta abandona si servus.” Puku tempu dipus, i risibi ajuda di no organizason. Alguns viziñus fika adimiradu e fala Prisca: “Deus nunka abandonau, no misti sibi mas aserka del.” Gosi, seti des viziñus ta obi runions di kongregason ku ta pasadu na radiu.

 Nkuantu no na pertusi mas di fin, no na kontinua sufri di disastris natural. (Mateus 24:3, 7) No apresia ciu bu oferta di tudu korson, ku ta fasidu atraves di diferentis metudus ku pudi ojadu na donate.pr418.com. I na usadu diritu i na bon mumentu pa kilis ku sta na sufri i ku pirsisa di ajuda.