Nes ultimu dias, no na spera obi ‘gera ku noba di gera’. (Mateus 24:6) Ma, ora ku no ermons pasa difikuldadis pabia des geras, e ta risibi ajuda ke pirsisa del. Atualizason ku Fasidu pa Korpu Guvernanti na 2022 — N.° 3, da informasons resenti ku ta toka no korson aserka di tarbaju umanitariu ku sta na fasidu na Europa di Lesti pa kilis ku afetadu pabia di gera na Ukrania. Kuma ku no ermons juda n̈utru mesmu manera ku jintis na geria pertu delis? Kuma kes ajuda ku dadu juda no ermons ku sta na Ukrania?

 Na dia 24 di Fevereru di 2022, oca ku gera kumsa na Ukrania, Kumison di Kordenaduris aprova pa i dadu ajuda pa ermons ku sta na Ukrania. Filial di Ukrania kumsa logu-logu ku kumpra kusas ku ten la i e mandal pa 27 Kumison di Ajuda Umanitariu ku kujidu.

 Parlen di ajuda di filial di Ukrania, ermons na Sedi Mundial di Tustumuñas di Jeova kumsa ku pensa kinti-kinti na kal ajuda pratiku ke pudi da. Kumison di Kordenaduris ku Kumison Editora di Korpu Guvernanti, pidi Dipartamentu Mundial di Kompras pa e tarbaja ku representantis di filial di Ukrania ku di Polonia pa juda na ke ki pirsis i fasi planus di kuma ke na tarbaja. Ermons di Dipartamentu di Kompras, di Distribuison ku Juridiku di kada filial, un membru di Kumison di filial di Ukrania, ku membrus di Dipartamentu Mundial di Kompras ta runi kada dia pa jubi kuma di tarbaja juntu.

 Jay Swinney di Dipartamentu Mundial di Kompras fala sin: “Purmeru no pirsisa di sibi ke ku pirsisadu del. No misti da kumida ku kusas di iẑeni ku ermons lokal kustuma usa. Ma, sibi ke ku pirsisadu del i so un parti di purblema.Tambi no pirsisa di sibi kuma di jiganta kil kusas diritu na Ukrania duranti kil mumentu di gera di manera rapidu i suguru.”

 Na dia 9 di Marsu di 2022, ermons sibi kal kusas ku pirsisadu del pa no ermons ku irmas na Ukrania. Kaŝotis di kusas basiku di kume suma, karni ku pis ku ta bin na lata, sereal, arus ku fijon, ku na dadu juntu ku kusas basiku di iẑeni suma sabon ku papel iẑeniku. Na kil mumentu i kalkuladu di kuma kusas ku na dadu pa un algin pa kuatru semana i kusta kuas 65 dolar amerikanu (mas o menus 42.000 FCFA). Suma i sibidu di kuma, manga di no ermons na pirsisa des kusas, Kumison di Kordenaduris aprova pa i dadu diñeru pa kumpra es kusas. Ma kuma kes kusas na lebadu sin pui suguransa di no ermons na pirigu?

 Na dia13 di Marsu, dus ermons di Polonia fasi un testi pa jubi kuma di tira kusas di filial di Polonia pa lebal te na un armazen pertu di Lviv na Ukrania. Dias antis de bai, membrus di filial di Polonia ku di Ukrania juda es vuluntarius purpara pa se bias. Filial fasi dukumentus ki pirsis ku na purmiti elis kamba forontera pa pudi da ajuda umanitariu. E sertifika pa karus des ermons ku na bai tene un kusa ku na mostra klaru di kuma i pa da ajuda, i e organisa ku ermons di Ukrania pa sibi kal ki kamiñu mas rapidu pa kamba forontera. Ku es bon purparason i ku benson di Jeova, na 24 ora ajuda lebadu pa Lviv atraves di Kumison di Ajuda Umanitariu, es ermons riba suguru pa Polonia.

 Apesar di kuma purmeru bias di testi ke fasi kuri diritu, ajuda kes ermons leba i menos di 1 tonelada. I kalkuladuba di kuma, kusas ku na pirsisadu del i di 200 tonelada! Kuma ku es kuantidadi garandi pudi lebadu i dividu mas rapidu posivel?

 Dipus di lei notisias na jw.org aserka di kuma ku no ermons sta na afetadu pabia di ke ku sta na kontesi na Ukrania, ermons na tudu parti di mundu misti juda. Manga delis ku sta lunju fasi oferta pa obra mundial di Tustumuñas di Jeova, pabia e sibi di kuma ki fundu na usadu di minjor manera. Kilis ku mora na teras pertu, konsigi da se tempu, se enerẑia ku kusas ke tene, pa juda. Jubi so alguns isemplus.

 Di bon vontadi, vuluntarius na Polonia junta kaŝotis di kusas ki pirsis i mininus fasi diseñus. Un membru di dipartamentu di kompras di filia di Polonia comadu Bartosz Kościelniak, fala sin: “Manga di bias N lei Salmu 110:3, ku fala di kuma povu di Jeova ‘na pursenta di bon vontadi’. Ma oja es apoiu ku dadu logu-logu, pa manga di vuluntarius ku pursenta kinti-kinti, di bon vontadi i pruntu pa tarbaja, mostran di manera klaru kumprimentu di palabras ku sta nes Salmu.”

 Un Tustumuña di Jeova ku tene un impresa internasional di loẑistika pati kusas ki teneba ja tambi i da tudu ki pirsis pa leba elis. I fala sin: “Pa mi es i un oportunidadi di mostra ña amor pa ña ermons i pa Jeova. N kontenti di mas di pudi da es ajuda.” I kalkuladu di kuma i patidu mas di 7.700 litru di kombustivel. I pa ntrega es kusas, ermons usa se tempu ku se enerẑia. E konduzi kuas 48.000 kilometru!

 Na dia 28 di Marsu, ku sedu 15 dias dipus di ki purmeru bias ku fasidu pa leba kusas pa Ukrania, ermons ku irmas tarbaja ku bon vontadi i ku amor pa leba 100 tonelada di kumida, kusas pa iẑeni ku medikamentus pa Ukrania! Pabia di kusas ku no ermons da di tudu se korson ku kusas ku utrus da, kuantidadi di diñeru ku dibi di gastaduba pa kumpra es kusas, rapati. Te nes mumentu, Tustumuñas di Jeova manda mas di 190 tonelada di kusas pa juda na Ukrania. Kuma ku no ermons sinti pabia des ajuda ke risibi?

 Ora kes kaŝotis ciga na Lviv, Kumison di Ajuda Umanitariu di Ukrania ta dividi elis pa kilis ku pirsisa. Es kaŝotis di ajuda dividu na manga di sidadis, alguns des sidadis tene distansia di mas di 1.300 kilometru di Lviv. Apesar di kuma es tarbaju fasidu di minjor manera pusivel, ma i toma tempu. a

 Markus Reinhardt un membru di Kumison di Filial di Ukrania, fala sin: “Duranti es krisi, manga di ermons oja pa purmeru bias amor di Jeova ku benefisiu di sigi di pertu orientason di si organisason mesmu antis di disastri kumsa. Pur isemplu, anos tudu no nsentivadu rakada kusas di kume ku yagu ku na ciganu pa alguns semana. Aserka des orientason, un ansion comadu Anton ku na sirbi na Kiev fala sin: ‘Organisason di Jeova purparanu pa situasons difisil, i no na gardisi ciu pa kila. No pudi fala, rakada kusas di kume, yagu ku radio, salva no vida.’ No na gardisi manera ku ermons sigi es orientason di tudu se korson, pabia kila da filial tempu di organisa ajuda ku pirsisadu del.”

 Kuma ku no ermosn sinti oca ke risibi es ajuda? Mykola ku Zinaida, ku mora na Kharkiv, konta se sintimentu des manera: “No sinti tokadu pa bo preokupason. Muitu obrigadu pa kusas di kume ku mesiñu. Ku sertesa, no pudi oja mon di Jeova nes.” Valentyna ku stan a mesmu zona, fala sin: “Na kumsada di gera, i temba un biŝa garandi pa kumpra kusas di kume. I ka tudu ora ki fasil kumpra kusas ku bu pirsisa del. Ma Jeova sibi, tambi i oja es purblema. I kuji ermons pa ntrega ajuda ku dadu na kasas, i kaŝotis tene kusas propi ku pirsisadu del! Na situasons difisil suma es, ora ki parsi kuma i ka ten speransa, no ta sinti i oja kuidadu di Jeova ku di si organisason di un manera spesial . . . Bu ta sinti tokadu di oja ajuda ku kusas ku bu pirsisa del ciga na mumentu sertu.”

 Yevhen, Iryna, ku Mykyta ku kuri di Mariupol, e fala sin: “No na gardisi ciu pa bo preokupason ku apoiu ku bo da pa no familia. Na bardadi, i ciga na mumentu sertu. Na kumsada, no pensaba kuma i so prudutus ku sta na kaŝotis, ma oca ku no yabri elis, no oja kuma e tene tambi bo amor!”

 Sin duvida, bu pudi oja kuma Jeova usa si spiritu pa da si povu orientason pa e pudi da ajuda amorosu na mumentu di ‘gera ku noba di gera’. Bo ofertas ku bo da di tudu korson pa obra mundial juda ciu, i manga des ofertas fasidu atraves di donate.pr418.com. No na gardisi bos ciu pa ofertas ku bo da di tudu korson!

Ajuda dadu kinti-kinti i di manera mas suguru pusivel

1. 24 di Fevereru di 2022: Kumison di Kordenaduris aprova pa i dadu ajuda pa Ukrania, es pirmiti pa filial kumsa da ajuda.

2. 24 di Fevereru te 8 di Marsu di 2022: Filial di Ukrania kumpra alguns kusas ku ten la i e kumsa ku ntrega elis pa Kumison di Ajuda Umanitariu. Tambi filial purpara pa pudi risibi i ntrega kusas ku na bin di Polonia.

3. 9 di Marsu di 2022: Kumison di Kordenaduris aprova ajuda umanitariu pa Ukrania.

4. 10 te 12 di Marsu di 2022: Planus fasidu pa leba kusas ki pirsis pa purmeru bias di Polonia te Lviv, na Ukrania.

5. 13 di Marsu di 2022: I fasidu purmeru bias di testi pa leba kusas ki pirsis di Polonia te Lviv, na Ukrania.

6. 14 te 16 di Marsu di 2022: Vuluntarius di Dipartamentu Lokal di Projetu/Konstruson organisa pa junta kaŝotis di kusas di kume ku di iẑeni na un Salon di asembleia pertu Poznan, na Polonia.

7. 17 di Marsu di 2022: Dipus ku purmeru bias di testi kuri diritu, kuatru dias dipus, 13 tonelada di kaŝotis di kusas ki pirsis kumsa ku kamba forontera di Ukrania.

8. 21 te 27 di Marsu di 2022: E kontinua fasi mesmu kusa ku kaŝotis ku sobra na Polonia i e manda elis pa Ukrania, i dentru di 24 ora e ntrega elis na zonas ki pirsis.

9. 28 di Marsu di 2022: Dentru di 20 dias dipus ku aprovason fasidu, 100 tonelada di kusas di kume, di iẑeni ku medikamentus lebadu pa Ukrania.

 Te nes mumentu, Tustumuñas di Jeova manda mas di 190 tonelada di kusas pa juda na Ukrania.