Jeova gosta ciu di nsina si pobu. Pabia di kila, si organizason fasi manga di skolas pa trena studantis pa e pudi kuida di responsabilidadis ke dadu na sirvisu di Jeova. Un des skolas i Skola pa Ivanjilizaduris di Renu. Na anus ku pasa nin i ka tarda, organizason di Jeova ka konsentra so na minjoria materias di skola, ma tambi kaus nunde ku skolas ta fasidu nel. Objetivu mas garandi i pa juda instrutoris nsina ku fasilidadi i pa studantis aprindi mas fasil. Kuma ku bu ofertas sta na judanu yangasa es objetivu?

 Duranti anus, skolas teokratiku ta fasidu na Salons di Renu ku Salons di asembleia. Ke ku manda gosi no sta na kumpu o renova manga di utrus kaus so pa skolas teokratiku? Ali tris rasons.

 Nesesidadis aumenta. Christopher Mavor ajudanti di kumison di sirvisu di Korpu Guvernanti fala sin: “Skritorius di filial falanu di kuma i pirsis mas ermons ku irmas pa juda na pregason. Pur isemplu na 2019, filial di Brazil kalkula di kuma, i na pirsis mas serka di 7.600 formadus di Skola pa Ivanjilizaduris di Renu pa kuida di nesesidadi ku tenba na se tiritoriu di filial.” Filial di Stadus Unidu fala di kuma, i ten nesesidadi garandi di pionerus kualifikadus ku na pudi trena utrus na tustumuñu publiku spesial metropolitanu, tustumuñu na purtu ku tustumuñu na prison. Tambi i ten nesesidadi di ermons pa sirbi na Dipartamentu Lokal di Projetu/Konstruson ku na Kumisons di ligason ku ospital. Formadus na Skola pa Ivanjilizaduris di Renu pudi juda na fasi es kusas.

 Numeru di studantis aumenta. Manga di filial risibi pitisons di studantis mas di ki kil ke pudi seta nes mumentu. Pur isemplu na Brazil, so na un anu, filial risibi serka di 2.500 pitison pa Skola pa Ivanjilizaduris di Renu. Ma suma e ka tene kaus sufisienti pa skola, filial seta so 950 studantis.

 Kaus ku tene bon kondison. Ora ku studantis mati skola na un Salon di Renu o salon di asembleia, normalmenti e ta mora na kaus di ermons ku irmas lokal. Es aranẑu ta da na teras nunde ki ka ten manga di turmas kada anu. Ma na nunde ki ten manga di turmas, i pudi ka sedu pusivel pa ermons ku irmas lokal risibi studantis pa manga di misis na anu. Pa kila, i kumpudu kaus spesialmenti pa studantis pertu di sala di aulas.

 Un kau ku tene un sala di aulas, ku kaus di mora pa instrutoris ku serka di 30 studantis, tambi ku utrus kaus ku instrutoris ku studantis pirsisa del, pudi kusta manga di milyons di dolar amerikanu, es dipindi di lokal di ki kau ku utrus kusas.

 Normalmenti skolas ta fasidu na un kau trankilu, fora di sidadi garandi, ma pertu di kaus ku tene transporti publiku. I ta pirfiridu pa i sedu na zona nunde ki ten manga di publikaduris ku na pudi juda na funsionamentu di skola ku manutenson di kaus ku ekipamentus.

 Kaus pa skola ta tene biblioteka, kaus pa studa, komputadoris, mpresoras ku utrus ekipamentu. Manga di bias i ta tene un kau nunde ku instrutoris ku studantis pudi kume juntu. Tambi i ta fasidu kau nunde ke na pudi fasi izersisiu i diskansa.

 Tambi no ta fasi un bon planu pa sala di aulas. Troy ku ta tarbaja ku Dipartamentu Mundial di Proẑetu/Konstruson na Warwick, Nova York fala sin: “No papia ku Dipartamentu di Skolas Teokratiku pa judanu fasi salas di aulas ku na fasilita studantis na aprindi. E splikanu tamañu ku salas di aulas dibi di tene, kuma ke dibi di organizadu, suma tambi tipu di lus ku ekipamentu di audio ku video ke na pirsisa di tene.” Aserka di ekipamentu di audio, Zoltán un instrutor di Skola pa Ivanjilizaduris di Renu fala sin: “Na kumsada no ka teneba nin un mikrofoni, pa kila manga di bias no ta lembranta studantis pa e papia ku forsa. Ma gosi purblema risolvidu, kada mesa tene si mikrofoni!”

 Kal rusultadu ku kaus ku minjoriadu tene na instrutoris ku studantis? Angela ku mati Skola pa Ivanjilizaduris di Renu na Palm Coast, Florida, Stadus Unidu di Amerika fala sin: “I sedu un kau trankilu dimas. Kada kusa planiadu diritu nkluindu sala di aulas ku kuartus, asin no pudi konsentra na studa ku aprindi.” Csaba, un instrutor na Hungria, kontenti di pudi kume ku studantis. I fala di kuma na mumentus suma es, “studantis manga di bias ta yabri ku nos e ta kontanu se speriensia. Des manera no ta kunsi studantis minjor. Asin no ta pudi aplika materia di minjor manera di akordu ku se nesesidadis.”

 Studantis ku instrutoris, ta oja minjorias ku fasidu na kaus ku skola ta fasidu suma benson di no “Nsinadur mas Garandi,” Jeova. (Isaias 30:20, 21, Tradução do Novo Mundo) Un irma na Filipinas ku mati Skola pa Ivanjilizaduris di Renu na un kau ku transformadu pa ba ta fasidu es skola fala sin: “Ambienti di skola fasinu sinti di kuma, anos i ka so studantis, ma kumbidadus spesial di Jeova. I misti pa no kontenti nkuantu no na studa fundu si Palabra.”

 Atraves di bo ofertas, kaus ku skolas ta fasidu pudi kumpudu, renovadu i fasidu manutenson. Manga des ofertas ta fasidu atraves di donate.pr418.com. Obrigadu pa ofertas ku bo ta fasi di tudu korson.