Tustumuñas di Jeova ta fasi tarbaju importanti pa juda jintis na mas di 200 teras. Ma i so 35 de teras ku tene diñeru sufisienti pa kuida di se propi nesesidadis. Teras gora ku ka ta konsigi tene diñeru sufisienti, kuma ke ta kuida di se nesesidadis?

 Korpu Guvernanti ta jubi ke ku Tustumuñas di Jeova na mundu ntidu pirsisa del, pa pudi adora Jeova i prega bon noba. I ta planiadu diritu kuma ku diñeru dibi di usadu di bon manera. Si un filial tene mas diñeru di ki kil ki pirsisa del pa kuida di si atividadis lokal, i ta da ki diñeru ku sobra pa irmons ku sta na teras ku ka tene sufisienti. Es aranẑu ta sigi izemplu di kristons di purmeru sekulu, ku ta judaba n̈utru pa e pudi “justa tudu.” (2 Koríntius 8:14) Kilis ku teneba ciu, ta judaba kilis ku tene puku.

 Kuma ku no irmons sinti oca e risibi ajuda di utrus filial? Pur izemplu na Tanzania, nunde ku mas di metadi di populason ta vivi ku menus di dus dolar kada dia, (mas o menus 1.200 FCFA), es diñeru ku dadu, usadu pa renova Salon di Renu di kongregason di Mafinga. Kongregason skirbi e fala sin: “Desdi renovason, no asistensia omenta ciu! No na gardisi ciu organizason di Jeova ku no irmons ku sta na mundu ntidu, pa se oferta ku judanu benefisia des lugar di adorason bonitu.”

 Pabia di duensa di COVID-19, alguns di no irmons na Sri Lanka sufri di falta di kusas di kume. Imara Fernando ku si fiju macu Enosh, fasi parti di kilis ku sufri di falta di kusas di kume. Ma, ku ofertas ku bin di utrus filial, e risibi ajuda ke pirsisaba del. Na un kartaz e skirbi sin: “No na gardisi irmons ku mostra amor pa nos nes tempu difisil. No sta kontenti di fasi parti des familia, i no na ora Jeova pa i kontinua juda tudu no irmons duranti es tempu di fin.”

 I ka mporta nunde ku no irmons ku no irmas sta, sempri e ta aẑi pa rapati ku utrus ke ke tene. Pur izemplu, Enosh kumpu un kaŝasiñu pa ba ta pui diñeru pa juda familias ku pirsisa di ajuda. Guadalupe Alvarez, fasi tambi mesmu kusa. El i sta na vivi na un zona di Meŝiku nunde ku puku jintis ta risibi salariu minimu, o e ka ta risibil tudu mis. Ma, i fasi ke ki pudi pa organizason. I skirbi i fala sin: “N na gardisi Jeova pa si bondadi i pa si amor ku fidelidadi. N sibi di kuma ña ofertas na juntadu ku di utrus pa juda ña irmons ku pirsisa.”

 Diferentis filial ku ta manda diñeru pa irmons ku pirsisa, ta kontenti di fasi kila. Antony Carvalho ku ta sirbi na Kumison di Filial di Brazil fala sin: “Pa manga di anus, tarbaju na no tera pirsisa di apoiu finanseru di utru teras. Pabia des ajuda, no oja un kirsimentu garandi. Gosi no situason finanseru muda i no tene privileẑiu di juda utrus. Irmons di Brazil ta sta interesadu na tarbaju di pregason na mundu ntidu, e ta jubi ke ke pudi fasi pa juda.”

 Kal ki minjor manera ku Tustumuñas di Jeova pudi juda se irmons ku irmas ku sta na pasa nesesidadi? I ka pa manda diñeru diretamenti pa un filial, ma kontribui pa obra mundial. Bu pudi fasi es atraves di kaŝa di kontribuison di kongregason ku markadu “Obra Mundial” o atraves di donate.pr418.com. No apresia ciu tudu es ofertas.