Korpu Guvernanti misti fasi kaus ku na judanu kumpri tarbaju di pregason di Renu. Pur isemplu duranti anu di sirvisu di 2023, instituisons legal ku ta usadu pa skritorius di filial di Tustumuñas di Jeova, gasta mas di 500 milyon di dolar (mas o menus 309 bilyon i 597 milyon di FCFA) pa kumpra, kumpu, renova i fasi manuntenson di Salons di Renu ku Salons di asembleia na tudu parti di mundu. a Es montanti i fora di ki kil ku kongregasons na mundu ntidu ta gasta pa kuida di se Salons di Renu.

 Alen des, ofertas ta usadu pa kumpu i kuida di filialis ku ta juda na organiza i apoia tarbaju di pregason na mundu ntidu. No simplifika tarbajus ku no ta fasi na filialis, asin no pudi usa alguns des fundu pa apoia na konstruson i minjoria Salons di Renu ku Salons di asembleia. Ma mesmu asin, i kusta inda manga di diñeru pa repara, renova, i mudanta filialis. Pabia ku es proẑetus i importanti? Kuma ku filialis ta apoia tarbaju importanti ku ta fasidu na tiritoriu? No jubi.

 Manga di skritorius di filial tene mas di 30 o 40 anu! Nicholas, ku ta sta na Dipartamentu Mundial di Proẑetu/Konstruson, fala sin: “Nin si un kau ta fasidu un bon manutenson, ku tempu i ta kumsa ku beju i dana. Ora ku no renova un kau i ta juda pa i torna mas nobu, tambi i pudi usadu pa manga di tempu.”

 Manga di Betel tambi pirsisa di adapta konformi nesesidadi ku ten na organizason. Na mundu ntidu, numeru di publikaduris aumenta ciu, disna di tempu ku manga skritorius di filial kumpudu. Pa apoia es aumentu i pirsisadu di mas voluntarius pa tarbaja nes skritorius. Pabia di kila skritorius di filial ku seduba garandi na tempu ki kumpudu torna gosi pikininu!

 Suguransa i un kusa importanti ku no dibi di pensa tambi nel. Nkuantu no na pertusi kada bias mas di fin, disastris natural ku ta pui vida di jintis na pirigu sta na aumenta. (Lukas 21:11) Si no usa nobu metudus di konstruson ora ku no na renova kaus, no ta juda na manti ki kaus mas suguru pa kilis ku na tarbaja la. Es minjorias tambi ta fasilita pa ermons usa es kaus pa organisa ajuda umanitariu, i kontinua apoia tarbaju na tiritoriu dipus di un disastri natural kontisi.

 Bas di orientason di Korpu Guvernanti, manga di konstrusons fasidu na 43 filialis na anu di sirvisu di 2023. Es signifika kuas metadi di tudu skritorius di filial staba na fasi un tipu di konstruson. Ali alguns isemplus ku ta mostra balur di tarbajus ku fasidu.

 Angola. Matt, un membru di Kumison di Filial di Angola fala sin: “No tene opurtinadadi di oja kuma ku profesia di Aẑeu 2:7 sta na kumpri di un manera spesial. So na des anu no oja publikaduris aumenta 60 pursentu! Pa kontinua apoia es publikaduris familia di Betel pirsisa di aumenta tris bias. Ma pabia di tamañu di no Betel, no ka pudi kumbida tudu jintis ku no pirsisa del pa tarbaja li. E ku manda manga di Betelitas ta tarbaja duru, e ta tarbaja alen di oras ke dibi di tarbaja.”

 Alguns ermons disignadu pa jubi kuma ku filial pudi aumentadu. Na kumsada e oja di kuma suluson mas rapidu i pratiku i pa renova filial ku ten. Dipus di fasi manga di piskisa, e nota di kuma renovason ka na sedu minjor manera di usa fundu di ofertas ku no ta risibi. En ves di kila, e suẑeri pa kumpra un prediu ku sta pertu di filial i dipus renoval. Matt fala sin: “Oca ku opson di kumpra i renova prediu ku staba pertu apresentadu pa Kumison di Filial, no ojaba di kuma i ka na sedu suma kau ku anos propi no kumpu. Ma gosi no oja di kuma rusultadu final sedu ke propi ku no pirsisa del. Jeova bensua es disison.”

 Filial di Angola pudi bin pirsisa di mas spasu na futuru. Ma, e nobu kau juntu ku kaus di mora ku sta na Betel ku mas tardi pudi bin ajustadu, ku apartamentus ku rendadu fora di Betel pirmiti skritoriu di filial tene mas spasu ki pirsis pa kontinua apoia kirsimentu garandi ku sta na ojadu na tiritoriu.

 Japon. Purmerus kau ku kumpudu pa filial fasi ja kuas 40 anu, i maioria des kaus ka ciga di fasidu un renovason garandi. I fasidu manga di sforsu pa manti es kaus, ma mesmu ku sforsu garandi ku fasidu, e kaus usadu ja mas di ki tempu ke kumpudu pa rel. Pabia di kila ku manda no sta na fasi un renovason garandi des kaus.

 Vida na Betel muda tambi konformi anus na pasa. Te na 2015, Betelitas ta purparaduba mata-bicu, janta ku sia. Pa kila, manga di kuartis na Betel di Japon ta tene “kusiña” pikininu. Gosi, Betelitas ku ta purpara maior parti di se kumida. Nes renovason i buridu kusiña mas pratiku na kuartis di Betel, pa pirmiti Betelitas kusiña ku mas fasilidadi. Kumiko un irma ku ta tarbaja na filial di Japon fala sin: “N ta sta avontadi na kusiña suma si N sta na ña kau, es ta judan apoia di tudu korson nobu aranẑus di Betel.”

 Tarbaju ku ta fasidu na filial di Japon i un parti importanti di no obra ku ta fasidu na mundu ntidu. (Mateus 28:19, 20) Japon i un di no dus filial ku ta mprimi Biblia kompletu. El ku manda un di kusas ku na fasidu nes proẑetu di konstruson i un makina ku na ba ta tira puera ku restu di folias siñu, es na proteẑi tudu kilis ku ta tarbaja na kau di mprimi. Pa kumpra es makina i nstalal i kusta kuas un milyion di dolar, ma i na pirmiti pa kontinua manda publikasons ku ta fortalisi no fe, prinsipalmenti Biblia.

 Ermons sertifika pa ka Biblia para mprimidu duranti konstruson. Trey, un membru di kumison di filial di Japon fala sin: “Duranti konstruson no organizason lansa Biblia na manga di linguas, i pididu di Biblias aumenta ciu na mundu ntidu. Manga di dipartamentus ku jintis kolabora pa pudi programa mumentus ki na fasidu nstalasons di nobu ekipamentu ku mumentu ki na mprimidu publikasons.” Mesmu ku es difikuldadis kuas 220.000 Biblia mprimidu na kada mis entri Marsu ku Agustu di 2023, es seduba na mumentu ku tarbaju di konstruson mas konsentraba na kau di mprimi. Tudu es fasidu sin gasta mas diñeru di ki kil ku programaduba.

 Un kusa importanti ku fasidu nes proẑetu di renovason i na asuntu di popa korenti di lus. I na bin nstaladu nobu painel solar, es na juda pa popa kuas 120.000 dolar kada anu (mas o menus 74 milyon i 303 mil FCFA). I na nstaladu tambi un tipu di janela ku tene tris parti di vidrus, es na juda pa usa menus korenti di lus, i kila na popa kuas 10.000 dolar (mas o menus 6 milyon i 191 mil FCFA) ka da anu. Es painel ku janelas ku ta juda na popa korenti di lus kusta manga di diñeru, ma i pensadu kuma duranti tempu ke na bin usadu e na popa mas di 3,5 milyon di dolar (mas o menus 2 bilyon i 167 milyon di FCFA). I na rapati tambi efeitu kes konstrusons na tene na ambienti.

 Es dus proẑetus di filial ta mostra tarbaju garandi ku ten, pa betelis pudi kontinua apoia nesesidadi ku ten na tiritoriu. Ma tarbaju ka kaba inda. Aaron un ermon di Dipartamentu Mundial di Proẑetu/Konstruson fala sin: “I fasidu ja manga di kusas, ma i ten inda manga di kusas pa fasi.” Kuma ku es tarbaju na fasidu? I kontinua fala: “Alen di ofertas ku ta juda na kustia es proẑetus, no kontenti tambi di oja spiritu vuluntariu di kilis ku binba apoia es proẑetus ku kilis ku sta na fasi planu pa bin apoia na futuru. Apoiu fisiku ku finanseru di no ermons ku irmas i prova klaru di benson di Jeova.” Salmu 110:3.

 Tudu no proẑetus di konstruson ku renovason ta apoiadu ku ofertas di livri vontadi, manga des ofertas ta fasidu atraves di donate.pr418.com. Obrigadu pa ofertas ku bo ta fasi di tudu korson.