Pa mas di 130 anu, Tustumuñas di Jeova ta runi kada anu pa fasi kongresu. Es programa ta tene gosi mas di 40 diskursu, suma tambi musikas, ntrivistas ku videos. Pa programa benefisia asistensia i motiva elis, i dibi di sedu un kusa ke na pudi ‘obi i oja’ diritu. (Lukas 2:20) Kuma ku bu ofertas ta usadu pa pirmiti tudu jintis benefisia des kongresus i ka mporta nunde ke sta?

 Manga di stadius ku kaus di luga na Europa ku teras ku sta na norti di Amerika ta tene ja se sistema di audio ku video. Pabia gora ku no ta nstala no propi ekipamentus ora ku no luga es kaus? David, ku ta tarbaja na Dipartamentu di Broadcasting di Sedi Mundial, fala sin: “Na kaus ku no ta luga, pukus ku tene kondison ku na pirmiti asistensia sukuta un programa pa mas di 6 ora di tempu. Pur isemplu, kaus di fasi disportu ta usa sistema di kumunika ku publiku, ma i mas pa fasi anunsius ku musikas kurtu. Se ekrans ta mostra rusultadu di jugu, publisidadis o kamara-lentu. Ma anos, no misti pa asistensia jubi videos kumpridu i pa e obi i ntindi diritu kada palabra ku na papiadu na palku.”

 Kada kau di kongresu diferenti di utru, pa kila, sistema di audio ku video dibi di adaptadu. Logu dipus ku kau di kongresu kujidu, Dipartamentu di Broadcasting di kada filial ta disidi nunde ku jintis na sinta, basiadu na numeru di asistensia ke spera tene, ku numeru di jintis ku ki kau ta leba. Dipus, ermons ta fasi kalkulu pa sibi nunde ku kulunas ku ekrans na fika i e ta disidi kuma ke na fasi ligason. Tambi, e ta fasi lista di tudu material ki pirsis pa tudu jintis pudi oja i obi programa diritu.

 Sistema di audio ku video ta sedu inda mas difisil na kongresus nunde ku programa na apresentadu na manga di linguas. Si programa na traduzidu pa utru lingua, tradutoris na pirsisa di oja i obi programa, i traduson pirsisa di transmitidu i mandadu na utru kanal di radiu pa kilis ku obi ki lingua. Atraves di un programa spesial video pudi lansadu na mesmu tempu ku audio, mesmu si audio sta na transmitidu na oitu linguas. David fala sin: “Es programa difisil dimas, kilis ku na tarbaja nel pirsisa di risibi un bon trenamentu.”

 Maioria di filial ta manda materialis di audio ku video ku ta usadu kada anu. Ora ki sedu sin, ermons ta fasi aranẑu pa ki mesmu material usadu na diferentis kongresu. So na filial di Stadus Unidu i gastadu mas di 200 mil dolar a (mais o menus 120 milyon i 650 mil FCFA) kada anu pa manda material di audio ku video di un kongresu pa utru. Es i mas baratu di ki kumpra utru material i fasi si manutenson. Steven ku juda na orienta un ekipa di audio ku video na un kongresu na Kanada, fala sin: “No ekipa di audio ku video fasi tudu ke pudi pa sertifika di kuma kada parafus, kabu o pesa kuidadu del diritu, i mbaladu pruntu pa manda na prosimu kau di kongresu.”

 Luga material di audio ku video i karu dimas, i manga di bias material ka ta sedu di kualidadi. Kila ku pui, no ta kumpra nan material ku no pirsisa del. Nes mumentu, un ekran jiganti ku un midida di 5 metru di largura i tris 3 metru di altura kusta serka di 24.000 dolar (mais o menus 14 milyon i 592 mil FCFA), i te mesmu un kabu di mikrofoni di 15 metru ta kusta serka di 20 dolar (mais o menus 12 mil 160 FCFA). Broadcasting ta kolabora ku Dipartamentu di Kompras pa “fasi konta di kil ki na gasta” antis di kumpra kualker material. (Lukas 14:28) Pur isemplu, kantu jintis ku na benefisia di ki material? Sera ki kumpra nobu material i minjor manera di kubri nesesidadi ku ten? Sera ki no tene un bon kau di guarda es material, i sera ki no tene feramentas ku vuluntarius ku trenadu pa fasi manutenson des material?

 Pa material di audio ku video tarda i asin popa diñeru, i ta fasidu sempri manutenson eletroniku ku reparasons. Ora ku no na manda material pa utru kau, no ta pul dentru di malas resistenti pa i ka dana, i no ta repara tambi es malas ora ki pirsis.

 Kilis ki ka Tustumuñas di Jeova, fika dimiradu ku kualidadi di audio ku video na no kongresus. Pur isemplu, na un kongresu, funsionariu di un di emisoras mas garandi na mundu, nota di kualidadi di kusas ku apresentadu. Jonathan ku ta juda na nstala i tarbaja na ekipamentu di audio ku video di kongresu, fala sin: “Es funsionariu fika dimiradu di sibi di kuma membrus di no ekipa seduba tudu vuluntarius, tambi e ka sedu jintis formadu nes aria. I fala kuma si impresa ta fasi sinku dia pa nstala ke ku no nstala na un dia i meiu.” Na utru kongresu, ẑerenti di un kau fala sin: “Manga di profisionalis di musika ku video pasaba li, ma nunka N oja jintis ku kunsi diritu se tarbaju suma bos!”

 Kuma ku sistema di audio ku video na kongresu ta benefisiau? Talves bu sinti suma David, ku mora na Inglatera. I fala sin: “N tene 88 anu, i N mati ja manga di kongresu. Ma gosi, i mas fasil presta atenson na ke ku na faladu di ki antis. Pabia di videos bonitu, kongresu ta kuri rapidu i mensaẑen ta sedu klaru, i ideia ta sta ligadu ku n̈utru.” Micheal ku mora na Nijeria fala sin: “Suma no ermons ka tene ja mas difikuldadi di obi orador o jubi videos, e ta konsigi konsentra i e ka ta kansa di obi kongresu.”

 Ora ku bu bin na mati Kongresu Reẑional o Spesial des anu, “Konta Bon Noba!”, toma tempu pa pensa na tudu ke ku fasidu pa judau obi i oja programa. No na gardisi bos pa bo oferta, nkluindu kilis ku fasidu na donate.pr418.com, es ofertas judanu fasi es tarbaju. Obrigadu.