Jesus fala si disipulus: “Bo na sedu ña tustumuñas . . . te na lugar mas lunju di mundu.” (Atus 1:8) Aos, Tustumuñas di Jeova sta na kumpri es mison ku zelu. Ma, i ten lugaris na mundu ku tene partis garandi ku manga di populason ku ka risibi inda tustumuñu. Tambi i ten teras ku Tustumuñas di Jeova ka ciu nel. (Mateus 9:37, 38) Ke ku no sta na fasi pa yangasa manga di jintis ku no pudi?

 Pa juda na kumpri ordi di Jesus, Kumison di Sirvisu di Korpu Guvernanti di Tustumuñas di Jeova disigna misionarius na kampu na zonas nunde ki ten nesesidadis na mundu ntidu. Te ne mumentu, i ten 3.090 misionarius na kampu na mundu ntidu. a Maioria delis risibi trenamentu na un skola bibliku, suma Skola pa Ivanjilizaduris di Renu. Misionarius sta dispostu pa disa se kasa i muda pa utru tera. Suma e sedu kristons maduru, e risibi trenamentu i e tene spiriensia, es misionarius fiel ta juda na leba bon noba i sirbi di bon isemplu pa nobu disipulus.

 Na kada filial, Skritoriu ku ta Kuida di Servus Spesial ku Sta na Kampu di Dipartamentu di Sirvisu, ta tarbaja juntu ku Kumison di Filial pa kuida di nesesidadis di misionarius, suma un kau simplis di mora, saudi i un bokadiñu di ajuda finanseru pa se dispesas. Na anu di sirvisu di 2020, Tustumuñas di Jeova gasta kuas 27 milyon di dolar amerikanu (mas o menus 14.520.000.000 FCFA) pa kuida di misionarius. Pabia des provison, misionarius pudi da tudu se atenson ku se inerẑia pa pregason, i fortalisi kongregason nunde ke sta na sirbi.

 Kuma ku misionarius na kampu ta benefisia tarbaju di pregason? Ermon Frank Madsen, ku sta na sirbi na Kumison di Filial di Malaui, fala: “Ku se koraẑen i se abilidadis, misionarius juda kongregasons na kumsa kubri tiritorius difisil, suma na zonas nunde ki difisil oja jintis ku mora la i na zonas nunde ki ta papiadu lingua stranjeru. Tambi e ta sforsa ciu pa aprindi lingua ku kultura lokal i disa un bon isemplu pa utrus. E tene un bon influensia na jovens ku misti kumsa sirvisu di tempu kompletu. No na gardisi Jeova pa misionarius na kampu.”

 Un membru di Kumison di Filial di utru tera fala sin: “Misionarius i un isemplu ku ta mostra di kuma, povu di Jeova sta unidu na mundu ntidu. Mesmu kilis ki ka Tustumuñas di Jeova pudi oja di manera klaru kuma no ka sta divididu pa kultura, ma nsinus di Biblia judanu pa no sedu un familia unidu.”

 Kuma ku misionarius na kampu ta juda publikaduris lokal? Paulo di Timor-Lesti, apresia ciu misionarius ku disignadu pa si kongregason. I fala: “No zona kinti dimas. Mesmu asin, misionarius ku bin di zonas nunde ki ten manga di friu, nunka ka ta disa pa klima tuji elis prega. Sempri e ta sta na saidas di pregason parmaña. Manga di bias N ta oja elis na bai fasi revisita me-dia ora ku kau kinti dimas, tambi N ta oja elis di tardiñu. E juda manga di jinti kunsi bardadi nkluindu ami. Ku zelu i ku animu e ta usa tudu se vida pa sirbi Jeova, i es ta motiva tudu kongregason pa sirbi Jeova ku mas zelu.”

 Ketti, un pioneru regular na Malaui, konta kuma ku un kasal misionariu juda si familia: “Oca un kasal misionariu disignadu na ña kongregason, N seduba uniku Tustumuña di Jeova na ña familia. I es kasal apoian ciu, i e torna amigus intimu di no familia. Se bon isemplu juda ña fijus oja di kuma sirbi Jeova ta da kontentamentu i un vida minjor. Pabia di un bon influensia di misionarius, ña tris fiju femia sta na sirbi suma pionerus regular i ña omi kumsa ku mati runions.”

 Kuma ki ta konsigidu diñeru pa kuida di misionarius na kampu? Atraves di ofertas ku ta fasidu pa obra mundial, i manga delis pudi fasidu atraves di metudus ku pudi ojadu na donate.pr418.com. Es kontribuisons ku ta dadu di tudu korson ta apresiadu ciu.