Pa mas di des anu, mostruarius fasi parti di no atividadi di pregason ku ta coma atenson di jintis. Na mundu ntidu, jintis ta oja mostruarius i e sibi di kuma i di Tustumuñas di Jeova. Alen di kuma e bunitu, tambi e fasil usa. Talves bu na konkorda ku Asenata un irma di Polonia, ku fala sin: “Mostruarius fasidu simplis tambi e bunitu. I ka difisil usa elis i muvimenta ku elis.”

 Sera ki bu ciga di punta kuma ku mostruarius ta kumpudu?

 Na 2001, ku aprovason di Korpu Guvernanti ermons ku irmas di Fransa kumsa testa diferentis manera di tustumuñu publiku, es nklui usa mostruariu. E tenta diferentis mudelus. Pur isemplu, e toma malas ku sestus di loja ku ta tene rodas e adaptal, e pui publikasons pa coma atenson di jintis. Pa fin, filial di Fransa kuji un mudelu ku ermons ku irmas usa pa manga di anu.

 Ermons na Fransa kontenti ku rusultadu ke tene di tustumuñu publiku ke kumsa. Asin na 2011, Korpu Guvernanti aprova un programa pa testa tustumuñu publiku ku mostruarius i ku mesas na sidadi di Nova York, Stadus Unidu di Amerika. Pionerus ku partisipa nes programa nota logu di kuma mostruarius tene manga di vantaẑen, un delis i di kuma e fasil muvimenta. Pionerus da tambi ideias pratiku di kuma ku mudelu di mostruarius pudi minjoriadu. Purmerus mostruarius ku kumpudu ku madera seduba pisadu di mas, es ta pui pa i difisil subi i ria ku elis na skada. Pa kila i fasidu utru mudelu pa e torna lebi, ma i ka lebi di mas tok bentu ta batil. Es nobu mudelu fasidu ku rodas mas garandi ku ta pirmiti pa junda elis na kamiñus ku dana. Alen di kila, i pudu un parti tras ku ta pirmiti guarda utrus publikasons ku pudi bin usadu.

 Programa di testi ku fasidu da bon rusultadu! Pa kila na 2012, Korpu Guvernanti aprova pa mostruarius usadu na tudu parti di mundu. Ermons oja kilis ku na pudi kumpu mostruarius na un kuantidadi garandi ku materialis lebi ma risistenti.

 Konformi anus na pasa, mostruarius minjoriadu mas un bokadu. Pur isemplu na 2015, i buridu un kapa ku tene un parti klaru dianti pa taja cuba. Dina ku mora na Jeorjia, gosta ciu des minjoria ku fasidu. I fala sin: “Mostruariu tene si propi kapa di cuba pa proteẑi publikasons.” Na 2017, i fasidu kartazis na alguns linguas. Tomasz un ermon di Polonia fala sin: “oca ku no ta usa kartazis kolanti i ta seduba difisil ora ku no na muda elis. Ma kartazis ku ta kola suma iman seduba un bon suluson.” Na 2019, i fasidu utrus mudansas na materialis ku ta usadu pa kumpu mostruarius i pa e kumpudu di un manera ke na mas tarda.

 Mostruarius ta kumpudu na un fabrika i dipus e ta mandadu pa kongregasons na tudu parti di mundu. Atualmenti, un mostruariu kusta 43 dolar amerikanu (mas o menus 26.300 FCFA), sin konta ku transporti i ku utrus kustu. Te nes mumentu, mas di 16 milyon di dolar amerikanu (mas o menus 9 bilyon i 776 milyon di FCFA), gastadu pa kumpu mostruarius. I mas di 420 mil mostruarius mandadu pa kongregasons na mundu ntidu.

 Pa usa diritu ofertas ku ta dadu i ta fasidu nkomenda di mostruarius na un kuantidadi garandi. Alen des, kongregasons pudi fasi nkomenda di pesas pa fasi manunteson di mostruarius en ves di nkomenda nobu mostruarius.

 Publikaduris na mundu ntidu ta kontenti usa mostruariu. Martina ku sta na Gana fala sin: “Manga di bias ora ku no na prega, anos ku ta bai nunde jintis. Ma ke ku N gosta del na prega ku mostruariu i di kuma, i jintis ku ta bin nunde nos. Te mesmu kilis ku na pasa ta dadu tustumuñu.”

 Na un pais di Afrika un omi pertusi di mostruariu i dadu publikasons na si lingua. Un semana dipus i riba i fala: “N lei tudu ki publikasons. Informasons ku sta la i importanti dimas. N na leba elis pa tabanka N bai mostra ña familia.” Si tabanka teneba distansia di 500 kilometru. Dus mis mas tardi i riba i fala: “Jintis di ña tabanka lei ki publikasons tudu, i e kontenti dimas ku informasons ku sta la. E misti sedu Tustumuñas di Jeova. Ma e tene purguntas. Pur isemplu e ntindi di kuma pa batisadu e pirsisa di nburgujantadu na yagu. Ma no ka tene riu na no tabanka. Sera ki no ten ku bin pali pa no batisadu?” Publikaduris kontakta un pioneru ku ta papia si lingua pa i kontinua kombersa ku el.

 I interesanti oja kuma ku mostruarius sta na usadu pa prega jintis na “tudu mundu pa sedu tustumuñu pa tudu rasa.” (Mateus 24:14) Kuma ku no ta yanda no paga mostruarius? I atraves di ofertas ku ta fasidu na mundu ntidu, manga des ofertas ta fasidu atraves di donate.pr418.com. Obrigadu pa ofertas ku bo ta da di tudu korson.