Kongresu reẑional di 2020 fika na storia — no purmeru kongresu ku fasidu na mundu ntidu gravadu i pudu na internet! Ma, na Malaui ku Mosambiki, maioria di no ermons ku irmas konsigi mati kongresu sin usa internet. Kuma ku kila sedu pusivel?

 Kumison di Kordenaduris ku di Nsinu di Korpu Guvernanti aprova pa kongresu apresentadu na televison ku radiu so na Malaui ku Mosambiki. Pabia ki pirsis fasil so na ki teras? Na mundu ntidu, Malaui i un di teras nunde ku internet mas karu. Pa kila, puku Tustumuñas di Jeova ku ta konsigi tene internet. William Chumbi, membru di Kumison di Filial di Malaui fala sin: “Radiu ku televison i uniku manera ku ermons ku irmas pudi jubi o obi kongresu.” Luka Sibeko, ku ta sirbi tambi na Kumison di Filial di Malaui fala sin: “Si no ka konsigi tenel atraves di televison ku radiu, i so puku ermons di tiritoriu di no filial ku na pudi apruveita des kongresu.” Tambi na Mosambiki, puku ermons ku tene apareliu eletroniku ku na pirmiti elis jubi kongresu, i nin e ka pudi tene internet.

 Pabia di duensa di COVID-19, alguns televison ku radiu ta apresentaba ja runions di kongregason. a No ermons bai oja ku jintis di radiu ku televison pa pidi pa e aumenta mas tempu pa apresenta programa di kongresu.

 Na Malaui, no ermons staba na un situason difisil. Normalmenti, radiu ku televison ta da so un ora di tempu pa se klientis. E ta preokupa di kuma, si programa kumpridu dimas, se ovintis ka na kontinua sukuta. Ma no ermons splika elis di kuma no tarbaju ta juda publiku. Mesmu nes tempu di konfinamentu, no ta konta jintis bon noba ku sta na Biblia, ku ta anima elis, ku pudi juda elis pa e sedu bon sidadons i tene un vida di familia filis. Oca ke obi es, e seta pididu di ermons di aumenta elis tempu.

 Na Malaui, kongresu apresentadu na un televison ku un radiu, i milyons di jintis pudi obil na tudu pais. Na Mosambiki, kongresu apresentadu na un televison ku 85 radius.

 Na tudu dus tera, i gastadu 28.227 dolar amerikanu (mas o menus 15.700.382 FCFA) b pa apresenta kongresu na televison i serka di 20.000 dolar amerikanu (mas o menus 11.135.000 FCFA) usadu pa apresenta programa na radiu. Kustu di radiu ta varia, i ta bai di 15 dolar amerikanu (mas o menus 8.350 FCFA) pa radiusiñu te 2.777 dolar amerikanu (mas o menus 1.500.000 FCFA) pa radiu ku na kubri tudu pais.

 No ermons tarbaja risu pa usa diritu ofertas ku dadu. Pur isemplu na Malaui, e konsigi nogosia pa e rapatidu pres, kila nklui un diskontu di 30 pursentu. Es diskontu pirmiti elis ekonomiza 1.711 dolar amerikanu (mas o menus 952.500 FCFA). Na Mosambiki, alguns radiu ku televison sta dispostu pa rapati pres, pabia no ta paga pres ku no konkorda ku el i na ora.

 No ermons gardisi ciu pa manera ke konsigi jubi o sukuta kongresu na radiu ku televison lokal. Patrick, un ansion na Malaui, fala sin: “No na gardisi ermons di Korpu Guvernanti pa tudu ke ke fasi pa nos duranti es duensa.” Tambi Isaac, di Malaui fala sin: “No ka tene utrus aparelius, pabia di kila no na gardisi ciu pa es aranẑu spesial di organisason di Jeova di judanu sukuta kongresu na radiu. Pabia des aranẑu tudu ña familia apruveita di kongresu. No oja es suma un prova di amor di Jeova pa si povu.”

 Kongresu di 2020 seduba purmeru kongresu pa un publikadur na Mosambiki. I fala: “Aranẑu ku fasidu pa jubi kongresu na televison, lembrantan di kuma Jeova i Deus ku ten tudu puder. Es duensa ka tujil danu kumida spiritual i di sirbil na ña sala. N oja prova di amor na povu di Jeova. N sta konvensidu di kuma, es i riliẑion di bardadi.”

 Un ansion comadu Wyson fala sin: “N misti gardisi servu jiru di fiansa pa manera ku e kuida di nos duranti es duensa. Es aranẑu di apresenta kongresu na radiu ku televison, juda manga di nos ku tene puku diñeru, i ku sta na vivi na tera mas koitadi di mundu di risibi programa i apruveita del.”

 Pa kongresu reẑional di 2021, Kumison di Kordenaduris ku di Nsinu fasi tambi utru aranẑu pa kongresu transmitidu na televison ku radiu so na sertus zonas. Kuma ku no konsigi kubri kustu di transmiti kongresu des manera? Atraves di ofertas ku ta fasidu pa obra mundial, i manga delis ta fasidu atraves di diferentis metudus ku sta na donate.pr418.com. Obrigadu pa ofertas ku bu da di fundu di korson.