Na mundu ntidu, manga di guvernus manda pa manti distansia entri jintis i e tuji pa jintis junta na kaus publiku. Tustumuñas di Jeova sta disididu pa kumpri kes leis i na mesmu tempu, kontinua riuni ku suguransa. Pa fasi kila, kongregasons usa aplikativus di videokonferensia, suma pur izemplu Zoom, pa fasi runions.

 Pa kongregasons pudi tene sempri runions, Korpu Guvernanti aprova pa kumpra lisensa di Zoom. Es juda ciu alguns kongregasons ku ka pudiba paga pa tene un konta Zoom, ku mas o menus kusta entri 15 te 20 dolar o mas (mas o menus 8.000 te 12.000 FCFA). Es kongregasons ta usaba aplikativus gratis ku tene numerus limitadu di jintis ku pudi konekta, alen di kila e ka suguru. Gosi tudu kongregasons ku ta usa Zoom ku organizason kumpra, pudi kontrola suguransa ku fasilidadi i manga di jintis pudi konekta pa kada runion. Te aos, mas di 65.000 kongregasons na mas di 170 teras, sta na usa es Zoom ku organizason kumpra.

 Kongregason Kairagi, na Manado, Norti di Sulawesi, Indonesia, muda di Zoom gratis pa Zoom ku organizason kumpra. Irmon Hadi Santoso fala sin: “Te mesmu irmons ku irmas ku ka muitu sibi usa aparelius eletroniku, gosi pudi benefisia di runions ntidu, pabia e ka pirsisa di konekta manga di bias so na un runion.”

 Lester Jijón, un ansion di kongregason Guayacanes Oeste na Guayaquil, Ekuador, fala sin: “Suma manga di irmons ku irmas i koitadis, i na sedu impusivel pa alguns kongregasons kumpra lisensa di Zoom ku na pirmiti pa tudu kongregasons asisti runions. Gosi, suma Zoom ku organizason kumpra ta pirmiti pa manga di jintis konekta, no pudi kumbida utrus pa mati runion, sin medu di kuma no na ultrapasa limiti di konekson.”

 Johnson Mwanza, un ansion di kongregason Ngwerere Norti na Lusaka, Zambia, skirbi i fala sin: “Manga di irmons ku irmas ta fala sempri ‘Zoom ku organizason kumpra ka pirmiti so pertusi mas di no irmons ku irmas, ma tambi sinti amor ku kuidadu di Jeova.’”

 Es Zoom di organizason, kumpradu ku diñeru ku guardadu pa ajuda umanitariu. Es diñeru bin di ofertas vuluntariu ku fasidu pa obra mundial. Manga des ofertas fasidu atraves di donate.pr418.com. Obrigadu pa bo ofertas di tudu korson ku tambi ta juda na utrus ajudas umanitariu ku ta fasidu na mundu ntidu. — 2 Koríntius 8:14.