“Korpu Guvernanti disidi di kuma si kontra guvernu lokal ka tuji junta, e na nkoraẑa tudu kongregason pa e kumsa mati runion na Salon di Renu na semana di 1 di Abril.” Na kumsada di mis di Marsu di 2022, es anunsiu pudu na jw.org, i kontenta Tustumuñas di Jeova na mundu ntidu. a Kal mudansas ki pirsis fasi, i kal materialis ku pirsisadu del pa proteẑi kilis ku na mati runions kontra virus COVID-19? Dipus di mas di dus anu ku no para junta na salon, kuma ku no Salons di Renu na pudi sta pruntu pa usadu?

 No ermons purparaba ja manga di misis antis pa kumsa mas runions na Salons di Renu.

 Un mis dipus ku runions na Salons di Renu paradu na 2020, Dipartamentu Mundial di Projetu/Konstruson (DMPK), na Warwick, Nova York, kumsa ku analisa kuma ku COVID-19 na afeta manera ku no ta usa no Salons di Renu i kal kusas ki pirsis fasi pa manti no kaus di adorason suguru.

 Ke ku pirsisadu del na un parti di mundu i ka mesmu ku pirsisadu del na utru parti. Matthew De Sanctis, ku ta tarbaja na DMPK, fala sin: “Na alguns teras, un di purblema i falta di kaus di laba mon. Ora ku Salon di Renu ka tene bumba, i pirsis bai buska yagu na riu o na fonti. Na utrus teras, alguns guvernus fasi alguns mudansas na se lei aserka di ar-kondisionadu, troka di ar ku sinalis ku ta mostra kaus di saudi ku iẑeni.”

 Kuma ku no ermons nfrenta es difikuldadis? Suma ku Matthew fala, e oja di kuma pa manga di Salons di Renu, “sulusons simplis da bons rusultadu.” Pur isemplu, na Papua Nova Gine, e pui kabesa di bumba na bidons di 20 litru na kaus di laba mon. No ermons konsigi pui es bidons ku tene kabesa di bumba na un Salon di Renu ku sta na tabanka e gasta so 40 dolar amerikanu (mas o menus 27.000 FCFA). Mas di 6.000 kusas di laba mon kumpradu na Asia pa Salons di Renu na Afrika.

 Alguns mudansas ku fasidu inklui instalason o modifikason di ventuiñas ku ar-kondisionadu pa minjoria sirkulason di ar na Salon di Renu. Manga di kongregason kumpra pos pa pui na mikrus pa ivita pega elis ku mon. Sforsu fasidu pa raparti i manti sempri limpu kaus ku ta tokadu sempri, suma puñus di porta ku kabesas di bumba ku pudi transmiti virus. Alguns kongregason pui bumbas automatiku na se kasa di bañu, ora ku bu para mon yagu ta sai. Pa fasi es mudansas na kada Salon di Renu na Ŝili, i astadu serka di 1.400 dolar amerikanu (mas o menus 942.800 FCFA).

 Ora ku ermons na fasi pa Salons di Renu sta suguru, e ta sforsa pa popa fundu ku ta dadu. Pur isemplu, na alguns teras e ta apruveita di batimentu ku ta fasidu pa kusas di laba mon ku pos di mikru. Filialis kolobra pa popa fundu ku ta dadu, manera ke kumpra kusas mas ciu di ki kil ke kustuma kumpra. Filialis ku Dipartamentu Mundial di Kompras manga di bias fasi aranju pa kumpra kusas na mon di kilis ku ta kumpul, es pirmiti pa i popadu tempu ku diñeru.

 Aranju di manti Salons di Renu suguru, proteẑi, tambi i juda kilis ku na mati runions na Salon di Renu tene sintidu susegadu. Un irma ku sta na Peru comadu Dulcine, fala sin oca ki obi kuma no na kumsa mas mati runion na Salon di Renu: “N teneba un bokadu di medu. N paña COVID-19 puku tempu dipus ki kumsa. N staba preokupadu aserka di riba mas pa Salon di Renu, pabia N sibi di kuma N pudi bin paña virus mas. Ma oca ku N ciga na Salon di Renu, N nota di kuma ansions fasi manga di kusas pa i ten suguransa, suma kaus di disinfeta mon ku pos pa mikrus tambi i fasidu un programa pa bata disinfeta salon antis i dipus di runion. Es tudu judan pa N sinti suguru suma ku N misti.” b

 Un irma na Zambia comadu Sara pasa un situason diferenti, i fala sin: “Na alguns misis ku pasa, ña omi muri di COVID-19. N staba preokupadu aserka di kuma ku N na sinti ora ku N bai mati mas runion na Salon di Renu sin el.” Ma ke ku bin kontesi ku Sara? I fala sin: “Mati mas runions na Salon di Renu mostran klaru di kuma Jeova sta ku nos duranti fin de tempu. Gosi, N sinti di kuma N risibi mas nkoraẑamentu, interesi ku apoiu ku N pirsisa del di parti di ansions ku utrus ermons ku irmas.”

 Na mundu ntindu no kiridus ermons ku irmas na fe kontenti pa opurtunidadi ke tene di riba mas pa se Salon di Renu. Obrigadu pa ofertas ku bo ta da, i manga des ofertas fasidu atraves di donate.pr418.com. Es ofertas juda pa no kaus di adorason puru sta diritu i pa e sedu un kau suguru pa juntu nel.