Kada anu, manga di irmons ku irmas, ku sta na sirvisu di tempu kompletu spesial na mundu ntidu, ta kumbidadu pa Skola Bibliku di Jileadi, ku ta fasidu na Sentru Edukasional di Patterson, Nova York. a Nes skola, alunus ta aprindi kuma ke pudi sedu mas efikas, na se diferentis disignason na organizason di Jeova. Es trenamentu ta juda elis fortalisi i stabiliza kongregasons ku diferentis filial na mundu ntidu.

 Na bardadi Jileadi i un skola internasional. Pur izemplu, turma n.º 147 ku fasidu na 2019, teneba 56 alunus ku bin di 29 teras. Kilis ku ta fasi Skola di Jileadi, i irmons ku irmas ku sta na algun forma di sirvisu di tempu kompletu spesial, suma betelitas, superintendentis di sirkuitu, misionarius o pionerus spesial.

 Purparason pa skola, ta kumsa manga di tempu antis di purmeru dia di aula. Pur izemplu, Dipartamentu di Viaẑens na Sedi Mundial, ta kumpra bilieti di avion pa alunus ku kumbidadu pa skola. Pur izemplu, pa turma n.º 147 di Jileadi, i gastadu mas o menus 1.075 dolar amerikanu (mas o menus 582.000 FCFA) pa kada alunu bin pa skola na Patterson i riba pa si disignason. Alunus ku bin di Ilias di Salomon, tenba ku paña 4 diferentis avion pa ciga Patterson, dipus pa riba, e paña 3 diferentis avion — na tudu, e fasi mas di 35.400 kilometru di viaẑen! Es viaẑens kusta 2.300 dolar amerikanu (mas o menus 1.246.000 FCFA) pa kada alunu. Pa rapati kustu di viaẑens, Dipartamentu di Viaẑens na Sedi Mundial ta usa programa di komputador pa oja bilieti mas baratu. Ma mesmu dipus di konsigi un bilieti, programa di komputador, ta kontinua fasi piskisa duranti semanas o te mesmu misis, pa jubi si kontra pres rapati. Dipartamentu di Viaẑens na Sedi Mundial, ta usa tambi ofertas ku kompañias di avion ta da pa se klientis fiel ku ciga sertu numeru di kilometru na se viaẑens.

 Manga di studantis pirsisa di vistu pa entra Stadus Unidu. Pa kila, Dipartamentu Juridiku na Sedi Mundial ta juda elis pa konsigi vistu. Kustu di vistu ku tudu dukumentus nvolvidu i mas o menus 510 dolar amerikanu (mas o menus 276.000 FCFA) pa kada studanti.

 Kuma ku no ta benefisia di trenamentu kes alunus ta risibi? Hendra Gunawan ta sirbi suma ansion na parti Sudesti di Asia. Na si kongregason, i ten un kasal ku forma na Skola di Jileadi. I fala sin: “Antis, no kongregason ka teneba nin un pioneru regular. Ma dipus di formadus di Jileadi ciga, se zelu ku se spiritu dispostu motiva utrus kumsa sirvisu di pioneru. Mas tardi, un irma propi di no kongregason kumbidadu pa Skola di Ivanjilizaduris di Renu!”

 Sergio Panjaitan ta tarbaja na un Betel na Sudesti di asia, juntu ku un irmon ku forma na Skola di Jilieadi. I fala sin: “Trenamentu ke risibi i ka seduba so un benson pa relis, ma tambi pa nos. E aprindi manga di kusas! Ma en ves di e pensa kuma e mas importanti di ki utrus, e ta konta utrus ke ke aprindi. Es ta nkoraẑanu i ta motivanu tambi pa no nkoraẑa utrus.”

 Kuma ku kustu des skola ta finansiadu? Atraves di ofertas ku ta fasidu pa obra mundial, manga des ofertas ta fasidu atraves di un di metudus ku pudi ojadu na donate.pr418.com. Obrigadu pa bo ofertas di fundu di korson, ku ta apoia es skola internasional.