Na mis di juliu ku agustu di 2020, pa purmeru bias na storia, irmons di mundu ntidu jubi mesmu programa di kongresu reẑional na mesmu tempu. Pa es sedu pusivel, programa gravadu, pirsisa di traduzidu na mas di 500 linguas. Normalmenti, es tipu di proẑetu ta leba un anu o mas pa i planiadu i kompletadu. Ma pabia des duensa di koronavirus, irmons ku irmas pirsisaba di traduzi kongresu reẑional di 2020 “Bo kontenti sempri”! na menus di kuatru mis.

 Dipartamentu di Sirvisu di Traduson ku Dipartamentu Mundial di Kompras ku sta na Sedi Mundial di Tustumuñas di Jeova, da se ajuda nes proẑetu garandi dimas. Dipartamentu di Sirvisu di Traduson nota di kuma, manga di ekipas di traduson pirsisaba di mas material pa pudi fasi es tarbaju, spesialmenti mikrofonis di altu kualidadi. Dipartamentu Mundial di Kompras fasi aranẑu pa i kumpradu 1.000 mikrofonis i fasi pa i dispaŝadu pa kuas 200 lugaris diferenti.

 Dipartamentu Mundial di Kompras kumpra manga di mikrofonis. Es mikrofonis dispaŝadu pa un lugar, dipus e mandadu pa tradutoris. Suma organizason kumpra manga di mikrofonis, kada mikrofoni kusta mas o menus 170 dolar (mas o menus 96.000 FCFA) nkluindu pres di mandal pa tradutoris — es sedu mas baratu di ki kumpralba padas-padas.

 Dipartamentu Mundial di Kompras tenba ku fasi es kompra i dispaŝal pa tradutoris duranti mis di abril ku maiu di 2020 — un tempu nunde ku manga di kaus di bindi ka staba na funsiona suma di kustumu, pabia des duensa ku laga. Mesmu asin, na fin di maiu, maioria di skritorius di traduson, diferentis filial, ku utrus kaus di traduson teneba ja material ke pirisisa del.

 Jay Swinney ku ta supervisiona Dipartamentu Mundial di Kompras, fala sin: “I tenba bon koperason entri dipartamentus di Betel ku komersiantis duranti tudu es proẑetu. So atraves di spiritu di Jeova ki pusivel fasi es di manera rapidu i fasi bon usu di ofertas ku dadu pa juda irmons ku irmas.”

 Nicholas Ahladis, ku ta tarbaja na Dipartamentu di Sirvisu di Traduson fala sin: “Tradutoris ku staba na konfinamentu kontentiba dimas di risibi es material. Apesar de sta isoladu di utrus membrus di se ekipa di traduson, e konsigi fasi un bon tarbaju pa traduzi i grava diskursus, videos ku kantikus na mas di 500 linguas.”

 Es proẑetu fasi parti di manga delis ku fasidu, pa no irmons na mundu ntidu pudi tene kongresu reẑional di 2020 “Bo kontenti sempri”! I bo ofertas di tudu korson ku bo fasi atraves di donate.pr418.com o atraves di utru meius ku torna pusivel pa kumpra tudu es kusas.