“Algun tempu atras, i difisil imaẑinaba kuma aos, no na tene kumida spiritual na forma diẑital.” Bu konkorda ku es palabras? I fasi parti di palabras di un diskursu nkoraẑanti ku fasidu pa ermon Geoffrey Jackson na Atualizason ku fasidu pa Korpu Guvernanti na 2020 — N.° 6. I kontinua fala: “I talves bu na punta: Kuma ku no na fasiba duranti es duensa ku laga si no ka tene feramenta suma JW Library? Jeova staba na purparanu e anus tudu pa no sta pruntu pa un kusa des.”

 Kuma ku Jeova purparanu? Kal tarbaju ku fasidu pa pudi kumpu aplikativu JW Library, i ke ki pirsis pa mantil i minjorial?

 Na Maiu di 2013, Korpu Guvernanti pidi Dipartamentu di Programason di MEPS di sedi mundial, pa fasi un aplikativu ku na tene Tradução do Novo Mundo revisadu. Paul Willies ku ta tarbaja na Programason di MEPS fala sin: “Te na ki mumentu, no ka ciga di lansa aplikativu movel na nin un loẑa di aplikativus. Ma, no fasi runion na ekipa, no para inda alguns tarbajus. No tarbaja juntu ku utrus dipartamentus pa purpara i fasi un aplikativu ku tudu kusas ku na sta dentru del. No ora ciu, i ku ajuda di Jeova aplikativu lansadu so sinku mis dipus na runion anual!”

 Utru disafiu i di torna es aplikativu na un biblioteka di bardadi ku na tene manga di publikasons i na manga di linguas. Te Janeru di 2015, maioria di no publikasons nobu na inglis sta dispunivel na aplikativu, i seis mis dipus jintis pudi baŝa es publikasons na manga di utrus linguas.

 Disna di la, no ermons minjoria aplikativu manga di bias, i buridu videos, i juntadu tudu publikasons ku videos di runions di kongregason na un kau, i ta pirmiti pa kilis ku na usal tene asesu diretu pa referensias di Guia de Pesquisa atraves di un versikulu di Biblia.

 Kada dia 8 milyon di aparelius ta yabri JW Library, i mas di 15 milyon di aparelius ta yabril kada mis! Ke ki pirsis pa es aplikativu kontinua tarbaja diritu nes aparelius? Ermon Willies fala sin: “Tarbaju di aplikativu movel nunka i kaba. No sta sempri na buri nobu kusas pa i torna mas pratiku i mas fasil di usa. Suma sistema komersial di aparelius diẑital sta sempri na atualizadu, no pirsisa sempri di atualiza aplikativu pa i pudi kontinua tarbaja ku ultimus aparelius ku na sai. No ten tambi di manti i atualiza no programa internu, pabia numeru di publikasons dispunivel, ku videos ku audios di JW Library kontinua na aumenta.” Si kontadu tudu linguas te gosi, i ten serka di 200.000 publikasons, i mas di 600.000 audio ku video ku sta dispunivel na JW Library!

 Pa kontinua apoia es aplikativu, i pirsis mas di ki ekipamentu di komputador. I pirsis tambi paga pa pudi usa sertus programas di komputador. Na kada anu, un lisensa ta kusta 1.500 dolar amerikanu (mas o menus 820.000 FCFA). Alen di kila, Dipartamentu di Programason di MEPS ta gasta serka di 10.000 dolar amerikanu kada anu (mas o menus 5.538.000 FCFA) na aparelius di diferentis fabrikantis pa tene sertesa di kuma, aplikativu na kontiua tarbaja diritu na nobu komputadoris, tablets ku telefonis.

 Pabia di JW Library, diñeru ku ta usadu pa mprimi, nkaderna i manda publikasons rapati ciu. Pa da isemplu des, jubi broŝura Examine as Escrituras Diariamente. No mprimi kuas 12 milyon di kopia di Examine as Escrituras Diariamente — 2013. Ma, pa di 2020, i mprimidu so serka di 5 milyon di broŝura, apesar di kuma no aumenta pa serka di 700.000 publikaduris na mundu ntidu. Pabia ki ten es mudansa? Manga di no ermons ku no irmas ta lei gosi testu di dia na JW Library. a

 JW Library ta juda tambi di manga di maneras kilis ku ta usal. Geneviève, ku mora na Kanada fala di kuma, pabia des aplikativu, i ta studa gosi sempri. I fala: “Pa sedu sinseru, si N dibi di junta tudu livrus ku N pirsisa del pa studa, N pensa kuma N ka na ba ta studa kada parmaña. Ma, ku es aplikativu, N ta toma so ña tablet i N tene tudu ke ki N pirsisa del. Es studu regular ta torna ña fe forti i ta pertusin mas di Jeova.”

 Duranti es duensa di COVID-19, es aplikativu sedu di ajuda garandi. Charlyn, di Stadus Unidu, fala sin: “Pabia di COVID-19 ku toma konta di mundu, N ka risibi inda nin un publikason na papel pa mas di un anu. Ma, JW Library kontinua judanu alimenta ben na sintidu spiritual, i na gardisi Jeova pa es aranẑu amorosu.”

 Manga di jintis tene sentimentu suma Faye ku mora na Filipinas. I fala sin: “N ta usa es aplikativu puderosu pa pertusi di Jeova. I purmeru kusa ku N ta lei parmaña. I el ku N ta sukuta ora ku N na fasi ña tarbajus di kasa. I el ku N ta usa pa purpara ña runion. I el ku N ta usa pa purpara ña studu di Biblia. I N ta jubi videos ora ku N tene tempu livri. Ora ku N sta na biŝa pa pera, N ta usal pa lei publikasons ku Biblia. Na bardadi, i tene balur garandi.”

 Es aplikativu ta juda tambi ciu na pregason. Pur isemplu, oca ku un irma na Kamerun na prega, i mistiba usa un testu di Biblia ku un irma usaba alguns semanas atras. Ma, i ka lembra na kal parti kes versikulu sta. I fala: “Filismenti, N lembra di un frasi di kil testu. N yabri aplikativu, N bai pa Biblia, N buska kil frasi. N oja logu kil testu. Usa aplikativu ta judan oja manga di versikulus ku utrora N ta diskisi.”

 Ofertas ku bu ta da ku tudu bondadi, atraves di medutus ku faladu del na donate.pr418.com judanu fasi, manti i minjoria aplikativu JW Library pa no ermons ku irmas na mundu ntidu. Obrigadu pa ofertas ku bu da di fundu di korson.

1. Otubru di 2013 — Aplikativu lansadu ku Tradução do Novo Mundo revisadu.

2. Janeru di 2015 — Utrus publikasons pudu na inglis, i bin pudu na manga di utrus língua.

3. Novembru di 2015 — I pudu kusas pa ba ta subliña.

4. Maiu di 2016 — Parti di runions pudu.

5. Maiu di 2017 — I pudu parti di toma nota.

6. Dizembru di 2017 — Aplikativu ajustadu pa pudi mostra Bíblia de Estudo.

7. Marsu di 2019 — I buridu kapasidadi di baŝa audios, i jubi videos diretu si bu tene internet, i pa tene asesu pa referensias di Guia de Pesquisa.

8. Janeru di 2021 — Aplikativu minjoriadu pa pudi mostra publikason Tene un Vida Filis!