Aos, Tustumuñas di Jeova ta risibi alimentu spiritual na formatu diẑital mas di ki antis. Ma na manga di partis di mundu, no irmons ka tene meius pa pudi tene internet. Utrus ta vivi na zona, nunde ki ta ten sempri falias di internet o vulusidadi i lentu o i ka ten nan propi.

 Ma gosi, manga di no irmons ku irmas pudi baŝa publikason diẑital mesmu sin internet! Kuma kes i pusivel?

 JW Box i un kaŝa pikininu ku organizason ranja pa kongregasons ku sta na zonas nunde ku internet i un bokadu difisil. I tene un kusa comadu router, ku kumpradu na impresas komersial, tambi i tene un programa ku disenvolvidu pa Dipartamentu di Komputador na Betel, juntu ku publikasons diẑital ku videos ku sta dispunivel na jw.org. Kada kaŝa kusta mas o menus 75 dolar amerikanu (mas o menus 42.000 FCFA).

 Na Salon di Renu, irmons ku irmas ta konekta se aparelius eletroniku ku JW Box atraves di wi-fi dipus e ta baŝa publikasons ku videos. Te mesmu kilis ku tene aparelius beju o baratu pudi konekta. Ma si kongregason ka tene internet, kuma ku JW Box pudi atualizadu? Di un tempu pa utru, filial ta manda pen ku tene nobu publikasons ku videos di jw.org ku dipus ta pudu na JW Box. Es pen kusta mas o menus 4 dolar amerikanu (mas o menus 2.500 FCFA).

 Kuma ku JW Box juda no irmons? Nathan Adruandra, un pape ku sta na Republika Demokratiku di Kongu, fala sin: “N tenta manga di bias baŝa video ku tene tema: ‘Jeova, . . . N fiansa na bo’ ku video Bo lembra di minjer di Lo. Ma nunka N konsigi, i kila disaniman. Ma gosi, N pudi baŝa es video na ña telefoni i es ta judanu anos pape, sina no fijus diritu.”

 Un irmon ku juda kongregasons na Niẑeria sibi kuma di usa JW Box fala sin: “Irmons ta oja JW Box suma un prenda spesial ku bin di Jeova. E staba kontenti dimas, di kuma gosi e pudi baŝa ku fasilidadi publikasons ku videos ku fasi parti di no kaŝa di feramenta.”

 I mandadu mas di 1.700 JW Box pa no irmons na Afrika, Osiania, ku Amerika di Sul. Planu sta na fasidu pa manda mas utrus pa mas kongregasons. Nunde ku diñeru pa es tudu sai? I sai di ofertas ku fasidu pa obra mundial, i manga des ofertas fasidu atraves di donate.pr418.com. Obrigadu pa bo apoiu di tudu korson.