• Entri bu pape ku bu mame, kin ku bu mas ta tene purblema kel?

  • Bu pape

  • Bu mame

• Kantu bias ku bu ta tene purblema ku el?

  • I ta tarda

  • Di ves en kuandu

  • Sempri

• Te kal pontu kes purblema ta ciga?

  • No ta rosolvil rapidu i na pas.

  • No ta rosolvil, ma so dipus di manga di diskutison.

  • No ka ta rosolvil, mesmu dipus di manga di diskutison.

Si bu ka ta da ben ku bu mame ku bu pape, talves bu pudi pensa kuma, i elis ku dibi di fasi algun kusa, pa minjoria situason. Ma suma ku no na bin oja, i ten kusas ku bu pudi fasi, pa ka purblemas ten sempri, i kalma situason. Purmeru, pensa nes:

• Kapasidadi di rasiosina. Ora ku bu na kirsi, bu ta kumsa ku pensa mas fundu na kusas ku na pasa, di ki ocau pikininu. Tambi bu ta kumsa ku tene forti opinions, i alguns delis, pudi sedu diferenti ku kil di bu pape o di bu mame. Ma Biblia fala: “Rispita bu pape ku bu mame”. — Saida 20:12.

  Ali un bardadi: I pirsis madureza ku abilidadi pa ka konkorda ku algin, ma na mesmu tempu, mostra rispitu.

• Misti mas liberdadi. Enkuantu bu na gaña mas madureza, talves bu pape o bu mame na dau mas liberdadi. Ma purblema i ki, talves bu misti mas liberdadi di ki kil ke dau, i bu mistil mas sedu, i kila pudi tisi diskutison. Ma Biblia fala: “Abos fijus, bo obdisi bo papes”. — Efésius 6:1.

  Ali un bardadi: Manga di bias, liberdadi ku bu pape o bu mame na dau, na dipindi, di kuma ku bu ta usa liberdadi ku bu tene ja.

• Konsentra na ke ku bu dibi di fasi. En ves di kulpa bu pape o bu mame, pa purblema ku ten, konsentra na ke ku abo propi bu pudi fasi, pa i ten pas. Un joven di nomi Jeffrey fala sin: “I ka tudu ora ke ku bu pape ta fala, ku ta tisi purblema, ma i kuma ku bu ta reaẑi. Papia ku kalma ta juda pa kombersa kuri diritu.”

  Biblia fala: “Bo fasi mas ku bo pudi pa ten pas ku tudu jinti.” — Romanus 12:18.

• Sukuta bu pape ku bu mame. Un joven di 17 anu di nomi Samanta fala sin: “N diskubri kuma, es i kusa mas difisil di fasi. Tambi N diskubri kuma, ora ku bu pape o bu mame nota kuma bu ta sukuta elis, elis tambi e na sukutau.”

  Biblia fala: “Tudu algin dibi di sta pruntu pa obi, ma pa i tarda pa papia”. — Tiagu 1:19.

• Nkara bu papes suma membru di bu ekipa. Nfrenta purblema suma ku membrus di un ekipa ta fasi. Ma konsidera purblema suma kin ku bu na juga kontra el, i ka bu pape o bu mame. Un joven comadu Adam fala sin: “Na un diskutison, pape o mame sempri misti ke ki minjor pa se fiju, i fiju misti, ke ki pensa i minjor pa si kabesa. Asin, no pudi fala, pelu menus, e sta na buska mesmu objetivu.”

  Biblia fala: “No ba ta sigi kusa ku ta tisi pas”. — Romanus 14:19.

• Ntindi bu pape ku bu mame. Un joven di nomi Sara fala sin: “Kusa ku ta judan, i lembra di kuma, suma ku N na luta ku ña purblemas, asin tambi ku ña pape ku ña mame ta luta ku di selis. Utru joven di nomi Karla, fala tambi: “N ta tenta pui ña kabesa, na lugar di ña papes. Si ami ku na kriaba un fiju, i lida ku mesmu situason, ke ku N na fasiba? Ke di minjor ku ña mistiba pa ña fiju?”

  Biblia fala: “Bu ka dibi di jubi son pa bu interes, ma pa di utru tambi.” — Filipensis 2:4.

• Sedu obdienti. I es ku Biblia misti pa bu fasi. (Kolosensis 3:20) I si bu ta obdisi, kusas na sedu mas fasil pa bo. Um joven di nomi Karen fala sin: “Ña vida ta sedu menus komplikadu, ora ku N fasi ke ku ña pape o ña mame falan pa N fasi. E fasi manga di kusas pa mi, es ku N fasi i pikininu.” Minjor mesiñu pa kaba ku diskutison i obdiensia!

  Biblia fala: “Sin leña, fugu ta paga”. — Ditus 26:20.

Suẑeston. Si bu tene difikuldadi di papia ku bu pape o ku bu mame, tenta skirbi na un foja o na un mensaẑen ke ku bu misti papia ku elis. Un joven di nomi Alyssa fala sin: “N ta fasi kila, ora ku N ka sta dispostu pa papia, i ta judan spresa ña sintimentus sin grita, o papia algun kusa ku N na bin ripindi del.”