• Kantu bias ku bu ta paña raiba?

  • Kuas nunka

  • Di ves en kuandu

  • Tudu dia

• Kal tipu di raiba ku bu ta tene?

  • Normal

  • Kinti

  • Ku na firbi

• Kin talves ku bu mas ta paña del?

  • Bu pape o bu mame

  • Bu ermon

  • Bu amigu

Si bu oja kuma bu pirsisa di kontrola bu raiba, es artigu na judau! Purmeru, jubi alguns motivus di pabia ki importanti manti kalmu ora ku bu provokadu.

I pa bu ben. Ditus 14:30 fala: “Korson kalmu ta da saudi pa kurpu”. Pa utru ladu, un livru aserka di medisina fala sin: “Raiba tene ligason diretu ku duensas di korson.” — Journal of Medicine and Life.

Pa manti amigus. Biblia fala: “Ka bu sedu sos di algin ku ta pirdi kontrolu, nin ka bu yanda ku algin ku ta lestu pa paña raiba”. (Ditus 22:24) Pa kila, si bu ta lestu di raiba, ka bu fika surprendidu si jintis kuri di bo. Un joven comadu Jasmine fala sin: “Si bu ka aprindi kontrola bu raiba, bu na pirdi bons amigus.”

Pa tene bon nomi. Un joven di 17 anu di nomi Ethan fala sin: “Si bu ta lestu di raiba, utrus na sibi kila, i e ka na fala ben di bo.” Punta bu kabesa: ‘Kuma ku N misti pa utrus kunsin? Suma un algin ku ta fasi pa i ten pas o suma un bumba ku sta kuas pa spludi?’ Biblia fala: “Omi di pasensa i ten garandi ntindimentu, ma kil ki turmentadu i ta mostra tulesa.” — Ditus 14:29.

Pensa na testus ku kumentarius ku sta bas, i fasi bu kabesa purguntas ku sta la.

• Ditus 29:22 fala: “Omi ku ta paña raiba i ta lantanda jus, i ta buri pekadus.”

  “Oca N tene 13 o 14 anus, i seduba difisil dimas pa N kontrola ña raiba. Familia di ña pape tene mesmu purblema. Na no familia no ta fala, i sta na sangi. I difisil dimas pa no kontrola no raiba!” — Kerri.

  Sera ki ña tendensia i di paña raiba? Si N seta di kuma ña bons kualidadis i rusultadu di ña sforsu, kuma ku N pudi fala ña mau kualidadi sta na sangi?

• Ditus 15:1 fala: “Bon rasposta ta kalma raiba, ma palabra duru i ta lantandal.”

  “Sigridu i aprindi kontrola bu emosons. Si bu sforsa na sedu mansu i konsentra na kusas pusitivu, i na sedu mas fasil kontrola bu raiba.” — Daryl.

  Ora ku N provokadu, ke ku manda ña purmerus palabras i importanti?

• Ditus 26:20 fala: “Sin leña, fugu ta paga”.

  “Normalmenti ora ku N ruspundi ku kalma, kila ta kalma utru algin ku N na papia kel, i anos tudu no ta pudi papia sin emosons sai fora di kontrolu.” — Jasmine.

  Kuma ku ña palabras ku asons pudi buri leña na fugu?

• Ditus 22:3 fala: “Algin ku ta pensa diritu i ta oja pirigu, i bai sukundi, ma kil ku ka ta pensa diritu i ta yentra na pirigu, i ta bai sufri.”

  “Utru ora N ta pirsisa so di bai na un kau i pensa na ke ku akontisi, asin N ta pudi lida ku situason mas tardi ora ku N sta kalmu.” — Gary.

  Kal ki minjor manera di sai na un situason di purblema sin mostra di kuma bu dispreza si dunu?

• Tiagu 3:2 fala: “Anos tudu no ta yara ciu”.

  “No dibi di ripindi di no erus, ma tambi no pirsisa di tira lison. Ora ku no yara, no dibi di kuriẑi logu-logu, i disidi fasi no minjor prosimu bias.” — Kerri.

Suẑeston: Fiksa un objetivu. Sta disididu pa manti kalmu pa un sertu tempu — talves pa un mis. Skirbi na un kau kuma ku bu sta na bai, i kontinua sigi bu progresu.