JOVENS TA PUNTA
Sera ki N dibi di fasi tatuaẑen?
Pabia ku jintis gosta di fasi tatuaẑen?
Un joven di nomi Ryan fala sin: “N pensa kuma alguns tatuaẑen i un obra di arti bonitu.
Ke ku bu ta sinti aserka di tatuaẑen pudi motivau na fasi tatuaẑen. Pur izemplu un joven comadu Jillian fala sin: “N tene un kolega di skola, ocal pikininu, si mame muri. Oca i bin garandi i fasi tatuaẑen di nomi di si mame na si garganti. N pensa kuma es tipu di tatuaẑen bonitu dimas.”
I ka importa motivu, bu dibi di pensa diritu, antis di pui un kusa na bu kurpu ku na fika pa sempri. Kal purguntas ku bu dibi di fasi bu kabesa si kontra bu na pensa na fasi tatuaẑen? I kal prinsipius di Biblia ku pudi judau toma bon disison?
Kal purguntas ku bu dibi di fasi?
Sera ki tatuaẑen pudi sedu pirigosu pa ña saudi? Site di un klinika comadu Mayo Clinic fala sin: “Tatuaẑen ta dana peli. I pudi kausa infesons na peli, tambi i pudi kausa utrus komplikasons. Utru ora i ta ojadu manca comadu granulomas na roda di parti di kurpu ku tene tatuaẑen. Tatuaẑen tambi ta provoka kiloidis, ku sedu, parti di kurpu ku ta salta ora ku bu molostra.” Site fala mas: “Si matrial ku usadu pa fasi kel tatuaẑen kontaminadu ku sangi, i pudi fasiu paña utru duensas.”
Sera ki tatuaẑen pudi dana bu nomi? Bu misti o bu ka misti, bu aparensia pudi fala algun kusa aserka di bo. I pudi mostra si abo i algin maduru o nau. Tambi i pudi mostra si abo i algin di konfiansa o algin ku ka tene responsabilidadi. Un joven di nomi Samanta fala sin: “Ora ku N oja algin ku tatuaẑen, logu-logu N ta ligal ku algin ku gosta di bibi i di bai festas.”
Melanie di 18 anus, ta oja tatuaẑen tambi di utru manera. I fala sin: “Pa mi, tatuaẑen ta sugundi bonitasku natural di algin. Kilis ku ta fasil, i ta sta suma, e ka misti pa utrus oja kin na bardadi ke sedu. E ta usa tatuaẑen pa sugundi se kabesa.”
Sera ki bu na gosta sempri di tatuaẑen ku bu fasi? Ku tempu, si bu bin gaña mas pesu o bu tene mas idadi, tatuaẑen pudi muda i torna mas fiu. Un joven di nomi Joseph fala sin: “N oja ja aparensia di tatuaẑen na kurpu di algin, dipus di manga di tempu. I ka nada bonitu.”
Un joven di 21 anus di nomi Allen fala sin: “Tatuaẑen manga di bias ta sai na moda. Aos i pudi parsi sedu importanti pa kin ku fasil, ma mas tardi, i pudi ka sedu mas importanti.”
Allen toka na un pontu importanti. Bardadi i di kuma, ora ku idadi na bai ku algin, si manera di oja kusas ta muda, ke ki gosta del ta muda, ma si tatuaẑen ka na muda. Un joven comadu Teresa fala sin: “Si N fasi tatuaẑen, kila na lembrantan so di tulesa ku N fasi. N ka misti buri es na lista di kusas ku na fasin ripindi mas tardi.”
Kal prinsipius di Biblia ku pudi judau?
Un algin maduru ta toma tempu pa pensa diritu antis di toma disison. (Ditus 21:5; Ebreus 5:14) Jubi es prinsipius di Biblia ku pudi judau nes asuntu di tatuaẑen.
Kolosensis 3:20: “Abos fijus, bo obdisi bo pape ku bo mame na tudu, pabia es ku Siñor ta kontenti ku el.”
Si bu mora juntu ku bu papes, ma bu ka ta obdisi ke ke na falau, kuma ku kila na afetau?
1 Pedru 3:3, 4: “Bo fajamentu pa ka i sedu di fora, na kumpu kabelu ku ronku, ku pindra uru, ku ropa bonitu, ma bo fajamentu i di dentru di korson, un bistimentu ku ka ta dana, ku sedu spiritu mansu, ketu”.
Ke ku bu pensa? Pabia ku Biblia mas distaka ‘fajamentu di dentru di korson’?
1 Timótiu 2:9: “Pa minjeris bisti . . . ku rispitu, na manera diritu”.
Ke ku palabra “rispitu” signifika? Pabia ku rispitu sempri i mas atraenti di ki dizeñu na kurpu?
Romanus 12:1: “Bo ntrega bo kurpu pa i sedu suma un sakrifisiu bibu, dedikadu son pa el, pa kontental. Es ki adorason ku bo dibi di fasi.”
Pabia ku Deus sta nteresadu na manera ku bu ta trata bu kurpu?
Pabia des prinsipius ku no kaba di oja, manga di jintis disidi ka fasi tatuaẑen. Na bardadi e diskubri kusa mas importanti di ki tatuaẑen. Teresa ku faladu del antis, fala sin: “Si bu gosta di un frasi, vivi di akordu ku kil frasi. Si un algin i importanti pa bo, kontal el. En ves di fasi tatuaẑen, mostra na pratika ke ki bu gosta del.”
