Sin, i pudi. Deus ta preokupa ku si servus ku sta duenti. Biblia fala asin aserka di un servu fiel di Deus: “SIÑOR na judal ora ki dita duenti”. (Salmu 41:3) Si bu sta na vivi ku un duensa ku ka tene kura, ali tris kusas ku pudi judau:

1. Ora bu pidi forsa pa aguenta. Bu pudi risibi “pas di Deus ku pasa tudu ntindimentu”. E pas na rapati bu preokupason tambi i na konsolau. — Filipensis 4:6, 7.

2. Sedu pusitivu. Biblia fala: “Korson kontenti ta da saudi, ma spiritu kebrantadu i ta bin seka os.” (Ditus 17:22) Fasi sforsu di sedu un algin alegri, es ka na rapati so bu tristesa, ma tambi i na benefisia bu saudi.

3. Fortalisi bu speransa na futuru. Un speransa firmi pudi judau tene kontentamentu apesar di un duensa ku ka tene kura. (Romanus 12:12) Biblia purmiti kuma i na ciga un tempu ku “nin un algin . . . ka na fala kuma i sta duenti”. (Isaias 33:24) Asin, Deus na kura tudu duensas ku ka tene kura, ku siensia aos ka pudi kura. Pur izemplu, Biblia mostra kuma jintis beju na bin torna nobu i e na tene bon saudi, i fala asin: “Si kurpu na bida nobu suma ocal mininu; i na bida forti suma ocal rapas.” — Jo 33:25.

Nota: Apesar di kuma Tustumuñas di Jeova rukuñisi ajuda ku Deus ta da, e ta buska tambi tratamentu pa duensas ku ka tene kura. (Markus 2:17) Ma, no ka ta rekumenda nin un tratamentu spesifiku, no pensa kuma, kada kin dibi di toma si propi disison nes asuntu.