Miguelqa Jesús. Chay sutiyoj karqa niraj kay jallpʼaman jamushaspa, kausarimuspa ripusqanmantawanpis. Wakin religionestaj “san Miguel” nisqa sutiwan rejsinku. a Diospa Palabranpi willawanchej Moisés wañupusqantawan, Miguelqa Satanaswan churakusqanta chayri siminakusqankuta. Chantá willallawanchejtaj Miguelqa, uj angelta yanapasqanta profeta Danielman uj willayta willamunanpaj (Daniel 10:13, 21; Judas 9). Milguelqa Jehová Diospa kamachiyninta jarkʼan, Diospa enemigosninwantaj maqanakun. Ajinamanta sutin nisqanman jina ruwan. Miguel suteqa niyta munan, “¿Pitaj Dios jinari?” (Daniel 12:1; Apocalipsis 12:7).

 Qhawarina imaraykuchus Jesuspuni arcángel Miguel kasqanta.

•   Miguelqa “arcángel” (Judas 9). Arcángel palabraqa niyta munan “angelespa jefenku”. Chay suteqa, Bibliaj iskay versiculosnillanpi rikhurin. Chay iskaynin versiculospitaj arcángel nin, manataj ninchu “arcángeles” nispa. Chayrayku arcangelqa ujlla kasqanta ninchej. Ujnin versiculopi Jesús kausarinpusqanmanta parlaspa nin: “Señorqa uj arcángel jina jatunmanta qhaparispa cielomanta uraykamonqa”, nispa (1 Tesalonicenses 4:​16). Kay versículo nisqanman jina, Jesusqa arcángel jina jatunmanta qhaparin. Chayrayku ninchej Jesusllataj Miguel, arcángel ima kasqanta.

•   Miguelqa angelesta kamachin. “Miguelqa angelesnintin sierpewan [Satanaswan] maqanakorqanku” (Apocalipsis 12:7). Payqa cielopi kamachinanpaj atiyta japʼin. Chayrayku Biblia nin, “atiyniyoj angelesmanta ujnin” “kuraj kaj ángel” kasqanta (Daniel 10:13, 21; 12:1). Chay sutisqa niyta munan “angelespa jefenku”. Mosoj Testamentomanta sumajta yachaj David Aune sutiyoj runa chayta nin.

   Bibliapeqa uj sutilla rikhurin angelespa jefenkumanta parlanapaj. Chayrayku nin: ‘Señor Jesús, atiyniyoj angelesninwan khuska cielomanta nina lauraypi rikhurimunanta’ (2 Tesalonicenses 1:​7, 8; Mateo 16:27). Kay 1 Pedro 3:​21, 22 Jesusmanta nin: “Payqa cieloman riporqa. Ángeles, atiyniyojkuna, kallpayojkuna imataj, paypa kamachiyninpi kashanku”, nispa. Jehová Diosqa angelespa jefenku kanankupaj mana iskay kamachejkunata churanmanchu karqa. Chayrayku ninchej Jesuswan Miguelwanqa mana waj wajchu kasqankuta, manaqa ujlla.

•   ‘Miguelpuni rikhurimonqa llakiy kanqa chaypacha’. “Chay jina llakeyqa manapuni jaykʼajpis karqachu” (Daniel 12:1). Daniel libropi “rikhurimonqa” palabraqa oqharikun, uj rey munasqanta ruwananpaj sayaykamunanmanta parlanapaj (Daniel 11:​2-4, 21). Jesucristotaqa “Diospa Palabran” nikullantaj. Payqa “Reyespa Reynin” jina, Diospa enemigosninta chinkachenqa, Diospa llajtantataj jarkʼanqa (Apocalipsis 19:11-​16). Chaytataj ruwanqa “manchay ñakʼariy kanqa” chaypacha, “mayqenchus kay mundoj qallariyninmantapacha kunankama manaraj karqachu” (Mateo 24:21, 42).