Yanapawasunmanpuni. Aswan sumaj yanapaqa Diosmanta jamun, “pichus yachan llakisqasta sonqochayta” (2 Corintios 7:6).

•   Kallpachan. ¿Imaynatataj sinchʼi llakisqa kajkunata sonqochan? Ichapis mana tukuy llakiyninkutachu chinkachenqa, jinapis ñaupajman rinallankupajpuni kallpachanqa (Filipenses 4:13). Diosqa mañakuykunasniykita uyarinpuni, chaymantaqa ama iskayrayaychu. Biblia nin: “[Jehová] Diosqa qayllallapi kashan salvanampaj juchallisqankumanta sonqonkuta nanachikojkunata, pikunachus manaña salvasqa kayta suyankuchu, chaykunata”, nispa (Salmo 34:18). Mana chayllachu, imaynapunichus kashasqaykita Diosman mana willariyta atejtiykipis, payqa uyarisonqa (Romanos 8:26, 27).

•   Kamachisninpa kausayninmanta willarispa. Salmosta qhelqajkunamanta ujnin ajinata nerqa: “Señor Diosníy, sinchi llakikuy ukhumantan waqyakamuyki”, nispa (Salmo 130:1, Diospa Simin Qelqa, 2004). Payqa sinchʼi llakisqa kashaspa, pantasqasninchejta Dios qonqayman churasqanta yuyarikorqa. Chayrayku pay Diosman nerqa: “Juchastachus cuentaman churawaj chayqa, pitaj ñawpaqeykipi sayayta atinmanri? Qampi perdonta tariyku, jatumpaj qhawasqa kanaykipaj”, nispa (Salmo 130:3, 4).

•   Suyakuyta qospa. Diosqa mana sonqochallawanchejchu, manaqa imaschus ñakʼarichiwanchej chayri llakichiwanchej, chaykunata chinkachinanta nin. Chay nisqan juntʼakojtenqa, tukuy llakiykuna “qonqasqa kanqa, manapunitaj yuyarisqachu kanqa” (Isaías 65:17).

 Sutʼinchaynin: Jehovaj testigosnenqa Diospa yanapanpi atienekuyku, jinapis onqoykuspa chayri sinchʼi llakisqa kaspaqa doctorman riyku (Marcos 2:17). Manataj niykuchu ima tratamientochus allin kasqanta, chaytaqa sapa uj ajllanan tiyan.