Arí. Imaraykuchus Bibliaqa Diospa Palabran. Paytaj ‘llakisqasta sonqochan’ (2 Corintios 7:6). Bibliaqa mana parlanchu, imaynatachus umankumanta onqosqata jampinamanta. Jinapis wañuchikuyta munajkunata yanapanman yuyayninkuman kutirinankupaj. Bibliaj yuyaychaykunasnenqa, qantapis yanapallasunkimantaj.

•  ¿Imastataj Biblia niwanchej?

•  ¿Biblia wañupuyta munaj runasmanta parlanchu?

•  Kay versiculosqa mana wañuchikuyta munanaykipaj yanapasonqa

•  ¿Imatá ruwasunman uj amigonchej wañupuyta munasqanta niwajtinchej?

•  Wañuchikunayarqaniña chay, ¿imatá ruwayman?

• ● Imaynachus kashasqaykita pillamanpis willariy.

   Biblia nin: “Sumaj amigoqa tukuy tiempo munakuyniyoj, llakiy kajtintaj uj hermanopis kanman jina yanapakun” (Proverbios 17:17).

   Sutʼinchaynin: Llakisqa kashajtinchej mana allin yuyaykuna jamuwanchej chayqa, yanapata necesitanchej.

   Llakiyninchejta ni piman willarikojtinchejqa, uj llasa qʼepiman tukun, nitaj aguantayta atisunmanchu. Jinapis wajkunaman willarikojtinchej, chay llakiyninchejqa pisiyanman, nitaj chayllapi anchata yuyasunchu.

   Kayta ruwawaj: Kunanpacha pillawanpis parlariy, ichá kanman uj familiarniykiwan chayri uj sumaj amigoykiwan. a Chantapis llakiyniykita chayri imaynachus kashasqaykita uj cuadernopi escribiwaj.

• ● Doctoreswan yanapachikuy.

   Biblia nin: “Sano runasqa mana doctorta necesitankuchu, onqosqaslla necesitanku” (Mateo 9:12).

   Sutʼinchaynin: Onqosqa kaspaqa doctormanpuni rina tiyan.

   Wakinkunaqa umitankumanta mana allinchu kasqankurayku wañuchikuyta munanku. Imaynatachus cuerponchejmanta imanchejpis nanawajtinchej mana pʼenqakunchejchu, ajinallatataj umanchejmanta mal kaspaqa mana pʼenqakunanchejchu tiyan. Umitankumanta mana allin kajkunapajpis tratamientos tiyan.

   Kayta ruwawaj: Usqhaysitullata umamanta yachaj doctorwan yanapachikuy.

• ● Diospajqa may munasqa kanki.

   Biblia nin: “Phishqa pʼisqetustaqa iskay pisi valorniyoj qolqellapi vendenku, ¿icharí? Diostajrí mana uj pʼisqetullamantapis qonqapunchu. [...] Ama manchachikuychejchu, qankunaqa ashkha pʼisqetusmantapis astawanraj valenkichej” (Lucas 12:6, 7).

   Sutʼinchaynin: Diospajqa may valorniyoj kanki.

   Ni pi qanmanta llakikusqanta yuyanki chaypis, mana sapaykichu kashanki. Diosqa imaynachus kashasqaykita yachan. Payqa mañana kausayta munankichu chaypis, qanmanta llakikun. Salmo 51:17 niwanchej, Diosninchejqa ‘sonqo pʼakisqasta, sonqo nanasqastapis mana wijchʼusqanta’. Arí, Diosqa maytapuni munakusunki, kausanaykitataj munan.

   Kayta ruwawaj: Dios munakususqantapuni yachanaykipaj, Jehovaman qayllaykuna libropi, 24 yachaqanata leeriy.

• ● Diosmanta mañakuy.

   Biblia nin: “Diosqa qankunamanta llakikun, chayrayku tukuy llakiyniykichejta makinman saqepuychej” (1 Pedro 5:7).

   Sutʼinchaynin: Diosqa imaynachus kashasqanchejta, imaschus llakichishawasqanchejtapis willarinanchejta munan.

   Ñaupajman rinallapajpuni Diosmanta yanapata mañakusun chayqa, payqa sonqo tiyaykuyta, kallpatawan qowasunchej (Filipenses 4:6, 7, 13; Salmo 55:22).

   Kayta ruwawaj: Kunanpacha Jehová Diospa sutinta oqharispa orakuy. Payman willakuy imaynachus kashasqaykita (Salmo 83:18). Kallpata mañakuy kausayta munanallaykipajpuni.

• ● Biblia sumaj kausay kananta nisqanpi piensariy.

   Biblia nin: “Chay suyakoyqa kausayninchejpaj barco sayachina gancho jina, mana iskayrayaspa sinchʼita sayanapaj yanapawanchej” (Hebreos 6:19).

   Sutʼinchaynin: Imaynatachus uj barcota wayra kayman jaqayman apaykachan, ajinallatataj llakiykunaqa noqanchejtapis kayman jaqayman apaykachawasunman. Jinapis Bibliaj nisqanpi piensareyqa, llakiykunawan mana atipachikunapaj yanapawasun.

   Diosqa niwanchej pisimantawan tukuy llakiykunata, ñakʼariykunatawan chinkachinanta. Chaytaj mana cuentollachu. Payqa nisqanta juntʼanqapuni (Apocalipsis 21:4).

   Kayta ruwawaj: Qhepaman sumaj kausay kananmanta yachakunaykipaj, ¡Diosmanta jamoj sumaj willaykuna! nisqa folletopi, 5 yachaqanata leeriy.

• ● Imaschus gustasusqanta ruway.

   Biblia nin: “Kusisqa sonqoqa sumaj jampi” (Proverbios 17:22).

   Sutʼinchaynin: Gustasusqan imasta ruwaspaqa, kusisqalla kanki, nitaj anchata llakikunkichu.

   Kayta ruwawaj: Imachá gustasunki chayta ruway. Ichá musicata uyariwaj, uj librota leeriwaj chayri waj imasta ruwawaj. Chantapis wajkunata yanaparispaqa, kusisqa kanki (Hechos 20:35).

• ● Mana onqonaykipaj cuidakuy.

   Biblia nin: “Ejerciciosta ruwayqa [...] yanapakun” (1 Timoteo 4:8).

   Sutʼinchaynin: Ejerciciosta ruway, sumajta puñuy, alimentoyoj mikhunasta mikhuy. Chaykunaqa mana onqonaykipaj, allillan kanaykipajtaj yanapasonqa.

   Kayta ruwawaj: Uj ratollapis puriykacharej llojsiy.

• ● Ima llakiypis mana wiñaypajchu kasqanta yuyarikuy.

   Biblia nin: Mana “yachankichejchu imachus kausayniykichejwan qʼaya kananta” (Santiago 4:14).

   Sutʼinchaynin: Ima problemapis, ima phutiypis tiempowan chinkapun. Ni jaykʼaj tukukunanta yuyarqanchej chay llakiykunapis, chinkapullankutaj.

   Kunan may jatun problemayoj kashanki chaypis, tiempowan allinchakonqa. Chayrayku ñaupajman rillaypuni (2 Corintios 4:8). Ima sinchʼi llakiypis tukukapunpuni. Chayrayku ama wañuchikuychu.

   Kayta ruwawaj: Bibliaqa willawanchej, wakin runas sinchʼi llakisqa kasqankurayku manaña kausayta munasqankuta. Paykunaj kausayninkumanta leeriy. Chayta leerispaqa, reparanki llakiykunasninkoqa tiempowan tukukapusqanta. Wakinkunamanta parlarina.

 Arí. Bibliaqa wañupuyta munaj runasmanta parlan. Diosqa mana paykunapaj phiñakorqachu. Astawanpis paykunata yanaparerqa. Diosqa qantapis yanapallasunkimantaj.

Elías

•  ● ¿Pitaj karqa? Eliasqa Diospa sumaj profetan karqa. Jinapis wakin kutis sinchʼita llakikorqa. Santiago 5:17 nin: “Eliasqa noqanchej jina runalla karqa”, nispa.

•  ● ¿Imaraykutaj wañupuyta munarqa? Uj pacha, Eliasqa sapallan kashasqanta yuyarqa, mancharisqa kasharqa, piensarqataj ni imapaj valesqanta. Chayrayku nerqa: “Kunanqa Jehová Diosníy, wañuchikapullawayña ari”, nispa (1 Reyes 19:4).

•  ● ¿Imataj yanaparqa? Eliasqa tukuy llakiyninta, sonqonpi kaj chhikata Jehová Diosman willakorqa. Paytaj Eliasta kallpacharqa, may jina atiyniyoj kasqantapis rikucherqa. Chantapis payman nerqa mayta munakusqanta, uj sumaj compañerotawan qorqa

•  ▸ Eliasmanta leeriy: 1 Reyes 19:2-18.

Job

•  ● ¿Pitaj karqa? Jobqa may qhapaj runa karqa, jatun familiayojtaj, Diostapis tukuy sonqo yupaychaj.

•  ● ¿Imaraykutaj wañupuyta munarqa? Jobpa kausaynenqa ujllata mana allinman tukorqa. Tukuy kapuyninta pierderqa, entero wawasnin wañuporqanku, uj millay onqoytaj chimpaykorqa. Amigosninpis qhasimanta juchacharqanku, nerqankutaj chay llakiykunapi rikhurinanpaj pay juchayoj kasqanta. Jobqa ancha llakisqapuni kaspa nerqa: “Amisqaña kani kausayniywan. Niña kausayta munanichu”, nispa (Job 7:16).

•  ● ¿Imataj yanaparqa? Jobqa Jehová Dioswan, waj runaswan ima parlarerqa (Job 10:1-3). Chantapis sumaj amigon Elihú payta kallpacharerqa, yanaparqataj problemasninmanta maychus kajllata yuyananpaj. Jinapis astawanqa, Jehová Diospa yanapanta japʼikorqa.

•  ▸ Jobmanta leeriy: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Pitaj karqa? Moisesqa ñaupa tiempomanta israelitasta chʼin pampaspi pusaykacharqa, Diospa profetantaj karqa.

•  ● ¿Imaraykutaj wañupuyta munarqa? Moisesqa ashkha trabajoyoj karqa, israelitastaj sapa kuti paypaj rimaj kanku, allin saykʼusqataj kasharqa. Chayrayku Diosman nerqa: “Ama jina kaspa wañuchikapullawayña ari”, nispa (Números 11:11, 15).

•  ● ¿Imataj yanaparqa? Moisesqa tukuy llakiyninta Diosman willakorqa. Paytaj Moisesta samarichinanpaj, wajkunawan wakin ruwanasninta yanapacherqa.

•  ▸ Moisesmanta leeriy: Números 11:4-6, 10-17.