Arí. Jesusqa yachachisqasninman nerqa: “Sano runasqa mana doctorta necesitankuchu, manachayqa onqosqaslla”, nispa (Mateo 9:12, Traduccion del Nuevo Mundo [NM]). Diospa munayninta ruwayta munajkunaqa Bibliapi sumaj yuyaychaykunata tarinkuman, imaynatachus jampichikunamanta Biblia mana parlajtinpis.

Kay tapuykunapiraj piensariy

 1. ¿Yachanichu imaynachus chay tratamiento kasqanta? Bibliaqa niwanchej allintaraj imatapis yachana kasqanta, niraj “pejpa nisqantapis” japʼikushaspa (Proverbios 14:15).

 2. ¿Waj doctorestawanchu waturinay kanman? Sinchʼi onqosqa kashaspa waj doctorestawan tapureyqa may allin (Proverbios 15:22).

 3. Chay tratamiento, ¿yawarta mana churachikunata Biblia nisqanwanchu churanakun? (Hechos 15:20).

 4. ¿Chay tratamientota ruwanaykipaj jampiristachu chayri layqastachu tapukunayki kanqa? Bibliaqa layqa ruwaykunaman mana chhapukunata niwanchej (Gálatas 5:19-21). Manaraj imatapis ruwashaspaqa kaykunataraj yachana tiyan:

•   ¿Jampista qosuyta munaj runa yatirichu chayri jampinanpaj atiyta japʼisqantachu nin?

•   ¿“Sajra imas onqochisunki” chayri “layqachisqa kanki” nispachu jampista qoyta munasunki?

•   ¿Jampista wakichinankupaj chayri jampisunankupaj animalestachu wañuchinanku tiyan, chayri chʼallanankuchu tiyan, manachayri qʼowastachu wakichinanku tiyan?

 5. ¿Jampichikullaypichu astawan yuyani? Biblia yuyaychawanchej: “Tukuy runas yachachunku allin yuyayniyoj kasqaykichejta”, nispa (Filipenses 4:5, NM). Allin yuyaywan imatapis ruwaspaqa “aswan allin kajta ajllayta” atisunchej. Chaykunamanta ujnintaj Diosta sirviyta ajllay (Filipenses 1:10; Mateo 5:3).