Bibliaqa ashkha kutispi nin Jesús “Diospa Wawan” kasqanta (Juan 1:49). “Diospa Wawan” nispaqa, Diospuni Ruwajnin kasqanta, Dios kausayta qosqanta ima nishan (Salmo 36:9; Apocalipsis 4:11). Bibliaqa mana ninchu imaynatachus runas wawasniyoj kanku, ajinallatataj Diospis wawasniyoj kasqanta.

 Bibliaqa nillantaj angelespis ‘Diospa wawasnin’ kasqankuta (Job 1:6, sutʼinchaynin). Chantapis nillantaj ñaupaj runa Adanqa “Diospa wawan” kasqanta (Lucas 3:38). Jinapis Bibliaqa niwanchej Diosninchej Jesusta ñaupajta ruwasqanta, payllatataj mana pejpa yanapanwan ruwasqanta. Chayrayku Jesusqa mana waj ruwasqasnin jinachu.

•  ¿Jesús niraj kay jallpʼapi nacekushaspa cielopichu tiyakorqa?

•  ¿Imatataj Jesús cielopi ruwaj manaraj jallpʼaman jamushaspa?

 Arí. Jesusqa niraj runa jina kay jallpʼapi nacekushaspa, cielopi uj ángel karqa. Chayrayku pay nerqa: “Cielomanta uraykamuni”, nispa (Juan 6:38; 8:23).

 Diosqa Jesusta ñaupajta ruwarqa. Jesusmanta parlaspa Biblia nin:

•   Paymin ‘tukuy ima ruwasqa kajmanta ñaupaj kaj’ (Colosenses 1:15).

•   Payta “Dios ñaupajta ruwarqa” (Apocalipsis 3:14).

 Jesuspi juntʼakorqa Bibliaj kay nisqan: “Payqa unay tiempospiña rikhurerqa, ñaupa tiempospiña” (Miqueas 5:2; Mateo 2:4-6).

 Uj sumaj llankʼayniyoj karqa. Jesusqa chay llankʼayninmanta parlaspa Diosman nerqa: “Tatáy, imaynatachus manaraj kay mundo kashajtin [...] jatunchasqa karqani, ajinallatataj kunanpis ladoykipi jatunchaway”, nispa (Juan 17:5).

 Tatanta tukuy imata ruwaysispa yanaparqa. Jesusqa Dioswan khuska trabajarqa uj “sumaj maestro jina” (Proverbios 8:30). Jesusmanta parlaspa Biblia nin: “Cielopi, jinallataj kay jallpʼapi tukuy ima kajpis paynejta ruwasqa karqa”, nispa (Colosenses 1:16).

 Diosqa Jesusnejta tukuy ima kajta ruwarqa, angelesta jinallataj tukuynin estrellasta, planetasta ima (Apocalipsis 5:11). Jesuswan Dioswanqa, imaynatachus uj arquitecto albañilwan khuska llankʼan ajinata llankʼarqanku. Arquitectoqa planosta ruwan, albañiltaj chay planosman jina wasita ruwan.

 Palabra karqa. Jesús manaraj kay jallpʼaman jamusqanmanta parlaspa, Biblia nin Jesús ‘Palabra’ kasqanta (Juan 1:1). Chaywanqa nishan, Diosqa Jesuswan waj angelesman imatapis willachisqanta, kamachiykunatapis paynejta qosqanta.

 Chantapis Jesusllatajsina runasman Diospa kamachisqasninta willarqa. Diosqa ichapis Jesusnejta Edén huertapi Adanmanwan Evamanwan kamachiykunata qorqa (Génesis 2:16, 17). Israelitas chʼin lugaresninta rishajtinku ñaupaqenkuta rerqa chay angelpis, ichá Jesusllataj karqa. Israelitasqa paypa nisqanta kasukunanku karqa (Éxodo 23:20-23). a