Wawasqa machitu tatasninkuta cuidanankupuni tiyan. Bibliapi nin, Diosta sirvej “wawasqa yachachunkuraj wasinkupaj kʼacha kayta, tatasninkuta yanapayta, aynitataj kutichikuyta. Kayqa kʼacha, allintaj Diospa ñaupaqempi”, nispa (1 Timoteo 5:4, Qheshwa Biblia). Machitu tatasninkuta cuidaj wawasqa, Biblia nisqanman jina tatasninkuta respetashasqankuta rikuchishanku (Efesios 6:2, 3).

 Bibliapeqa mana willanchu imaynatapunichus tatasninchejta cuidanata. Jinapis willawanchej ñaupa tiempopi wawas imaynatachus machitu tatasninkuta cuidasqankuta. Chantapis Bibliapi yuyaychariwanchej imaynatachus machitu tatasninchejta cuidana kasqanta.

•  Ñaupa tiempopi imaynatataj wawas, ¿machitu tatasninkuta cuidaj kanku?

•  ¿Ima yuyaychaykunataj Bibliapi tiyan?

•  ¿Bibliapi ninchu wawasqa machitu tatasninkuta wasinkupipuni cuidananku kasqanta?

 Ñaupa tiempomanta Diospa kamachisnenqa, machitu tatasninkuta cuidanankupaj atisqankuman jina tukuy imata ruwarqanku.

•   Joseqa tatan machitu kashajtin, waj ladopi tiyakorqa. Jinapis tukuy imata ruwarqa maypichus tiyakusharqa chayman tatan ripunanpaj. Chaypitaj tukuy ima necesitasqanta qorqa (Génesis 45:9-11; 47:11, 12).

•   Rutqa suegranpaj llajtanman riporqa, payta cuidananpaj. Suegranta cuidananpajtaj mayta trabajarqa (Rut 1:16; 2:2, 17, 18, 23).

•   Jesusqa niraj wañupushaspa maman Mariata qhawaripunanpaj wajman encargakorqa. Chaypacha Mariaqa viudaña karqa (Juan 19:26, 27). a

 Machitu tatasninchejta cuidaspaqa saykʼunchej, llakikunchejtaj. Chayrayku Bibliaj yuyaychaykunasnenqa mayta yanapawasunman.

•   Machitu tatasniykita respetay, amataj sonqonkuta nanachiychu.

   Biblia nin: “Tataykita, mamaykitawan respetay”, nispa (Éxodo 20:12).

   Kayta ruwawaj: Atispaqa machitu tatasniyki, sapallankumanta imatapis ruwanankuta chayri imatapis ajllanankuta saqellay. Imaynatachus cuidanata munasqankuta uyariy, imaynachus kashasqankuta entiendey, yanapariy ima. Chaytataj respetowan ruway, ama sonqonkuta nanachispalla.

•   Machitu tatasniykita entiendenaykipaj, perdonanaykipaj ima kallpachakuy.

   Biblia nin: “Yachayniyoj runaqa mana imitamantapis phiñarparikullanchu. Phiñakunanpaj jina imatapis ruwajtinku payqa pasachillan, chaytaj kʼacha runapaj qhawachin”, nispa (Proverbios 19:11).

   Kayta ruwawaj: Ichapis machitu tatasniykeqa sonqoykita nanachisunankupaj jina imatapis nisunkuman chayri ruwankuman. Chaywantaj mana agradecekoj kashasqankuta rikuchisunkuman. Jina kajtin, kayta tapurikuy: “Paykuna jina machituña kaspa, imatapis mana ruwayta atispa, ¿imaynataj sientekuyman? ¿Manachu mayta llakikuyman?”, nispa. Paykunata entiendenaykipaj kallpachakunki, perdonankitaj chayqa, mana anchata llakikunkichu nitaj paykunatapis llakichinkichu.

•   Wajkunata tapurikuy.

   Biblia nin: “Mana allinta parlarikuspa imatapis ruwayqa mana allinchu llojsin. Ashkhaspa yuyaychayninkuwantaj imallapis allinta ruwakun”, nispa (Proverbios 15:22).

   Kayta ruwawaj: Machitu tatasniyki onqosqa kajtinkoqa, cuidanaykipaj mayta kallpachakuy. Maypichus tiyakunku chaypi, ima yanapaschus kasqantapis maskʼariwaj. Pikunachus machitu kajkunata cuidanku chaykunatapis tapuriwaj. Hermanosniyoj kanki chaytaj, imaynatachus machitu tatasniykichejta cuidanaykichejmanta parlariwajchej.

•   Atisqallaykita ruway.

   Biblia nin: “Yachaytajrí llampʼu sonqoyojkunapi kashan”, nispa (Proverbios 11:2, Diosmanta Qhelqasqa).

   Kayta ruwawaj: Imatapis atisqallaykita ruway. Machitu tatasniykita cuidanaykipaj tukuy imata ruwayta munanki chayqa, mana tiempoyoj kanki, saykʼunkitaj. Machitu tatasniykita cuidanaykipaj tukuy imata ruwana kajtenqa, familiaresniykiwan chayri enfermeraswan enfermeroswan yanaparichikuy.

•   Qanpis cuidakuy.

   Biblia nin: “Manapuni pipis kikin cuerpontaqa chejnikunchu. Astawanpis cuerponta mikhunawan kallpachan, munakuntaj”, nispa (Efesios 5:29).

   Kayta ruwawaj: Machitu tatasniykita cuidanayki kajtinpis, qanpis cuidakunayki tiyan. Casado kanki chayqa, familiaykita cuidanayki tiyan. Chantapis allinta mikhunayki, samarinayki, puñunayki ima tiyan (Eclesiastés 4:6). Chayta ruwayqa mayta yanapasonqa, ajinamanta mana anchata saykʼunkichu nitaj anchata llakikunkichu.

 Chaymanta parlaspa Bibliaqa mana imatapis ninchu. Wakin familiasqa machitu tatasninkuta paykunawan tiyakunankupaj wasinkuman pusakapunku. Chantapis wakenqa maypichus machitu kajkunata cuidanku chayman pusanku allin cuidasqa kanankuta munaspa. Jinapis chayta ruwanankupajqa, entero familia parlarikunanku tiyan (Gálatas 6:4, 5).