Bibliaqa nin, tatamamas wawasninkuman qhariwarmi jina puñuykuymanta yachachinanku kasqanta. Ashkha tatastataj kay yuyaychaykuna yanapan:

•   Ama pʼenqakuychu. Bibliaqa sutʼita parlan qhariwarmi jina puñuykuymanta, jispʼanasninchejmanta ima. Jehová Diosqa israelitasman nerqa, ‘wawaspis’ chay imasmanta yachananku kasqanta (Deuteronomio 31:12; Levítico 15:2, 16-19). Chayrayku wawasniykiwan jispʼanasninchejmanta parlarishaspaqa mana pʼenqakuspa parlay, sutisninkutapis willay. Ajinamanta wawayki mana yuyanqachu chay imasmanta parlay pʼenqakunapaj jina kasqanta.

•   Pisimanta pisi yachachiy. Wawasniyki jovencitusmanña tukushajtinku ujllapi qhariwarmi jina puñuykuymanta parlanaykeqa mana allinchu kanman. Chayrayku juchʼuyllaraj kashajtinku, yuyaysituyoj kasqankuman jina chay imasmanta pisimanta pisi willay (1 Corintios 13:11).

•   Llimphu kausayniyoj kanata yachachiy. Escuelaspeqa qhariwarmi jina puñuykuymanta wawasman yachachinku. Jinapis Bibliaqa tatasman yuyaychan wawasninkuman yachachinankuta imapajchus jispʼanasninchej kasqanta, qhariwarmi jina puñuykuymanta ima. Chantapis yuyaychallantaj wawasninkuman yachachinankuta imatachus Jehová Dios yuyasqanta qhariwarmi jina puñuykuymanta, imaynatachus llimphu kausayniyoj kanata ima (Proverbios 5:1-23).

•   Wawasniykita uyariy. Wawasniyki qhariwarmi jina puñuykuymanta tapusojtinku ama phiñakuychu, nitaj malta piensaychu. Biblia nisqanman jinaqa, aswan allin ‘sapa ujpis allinta uyariyta yachana, usqhayllata parlanamanta nisqaqa’ (Santiago 1:19).

¿Imatataj ruwawaj abusajkunamanta wawasniykita jarkʼanaykipaj?

•   Abusajkunamanta yachay. Wawasta abusajkuna imastachus ruwasqankuta yachay (Proverbios 18:15; Lo que los jóvenes preguntan. Respuestas prácticas, (volumen 1) nisqa libropi capítulo 32 leeriy).

•   Ama pimanpis wawasniykita saqellaychu. Wawasniykita pimanpis saqekuyta munanki chayqa, ñaupajta yachay pichus de confianza kasqanta. Chantapis ama wawasniykita saqeychu ‘munayninkuta ruwajta’ (Proverbios 29:15).

•   Wawasniykiman yachachiy mana tukuytapunichu kasukunanku kasqanta. Wawasqa tatasninkuta kasukuyta yachananku tiyan (Colosenses 3:20). Jinapis wawasniykiman yachachiy mana tukuytapunichu kasukunanku kasqanta. Ajinamanta wawasniykita jarkʼanki abusajkunamanta. Cristiano tatasqa wawasninkuman yachachinkuman ajinata: “Pillapis Diospa chejnisqan imasta ruwanaykita nisojtenqa, ama kasunkichu”, nispa (Hechos 5:29).

•   Imaynatachus jarkʼakunankuta wawasniykiman yachachiy. Wawasniykiman yachachiy imatachus ruwanankuta pillapis paykunata abusayta munajtin. Wawaykiman niy: “Pillapis tʼojpisuyta munajtenqa ninki: ‘¡Ama tʼojpiwaychu! ¡Tatasniyman willaykusaj!’, nispa, chantá usqhayllata ripunki”, nispa. Chaytaqa “sapa kuti” wawasniykiman yachachillaypuni. Ajinamanta paykunaqa yachanqanku sajra runasmanta cuidakuyta (Deuteronomio 6:7).