“Diosqa mañakusqanchejmantapis chayri yuyasqanchejmantapis, aswan ashkhataraj ruwayta atin. Chaytataj ruwan, noqanchejpi trabajashan chay atiyninman jina. Diosmin [...] jatunchasqa kachun” (Efesios 3:20, 21, Diospa Palabran).

 “Diosqa tukuy imata ruwayta atin, mañakusqanchejmantapis yuyasqanchejmantapis aswan ashkhataraj, noqanchejpi trabajashan, chay atiyninman jina. Paypuni jatunchasqa kachun” (Efesios 3:20, 21, Diosmanta Qhelqasqa).

 Apóstol Pabloqa mana iskayrayaspa nerqa Dios mañakuykunaman kutichiyta atisqanta, kamachisnin imatachus suyakusqankutapis juntʼayta atisqanta, imasta ruwanantachus mana yuyankuchu chay imasta ruwaspa. Arí, Diosqa suyakusqanchejmantapis aswan ashkhataraj ruwayta atin.

 “Diosqa […] ruwayta atin […] noqanchejpi trabajashan chay atiyninman jina”. Jehová a Diosqa necesitasqanchej atiyta, kallpata qoyta atiwanchej paypa munayninta ruwanapaj (Filipenses 4:13).

 Apóstol Pabloqa 20 versiculopi sutʼinchan Jehová imastachus ruwayta atisqanta kamachisninta yanapananpaj. Uj libro “ruwayta atin” nisqa palabrasmanta sutʼinchasqanman jina, kay versiculoqa mana nishallanchu Dios imatapis ruwayta atisqanta chayri pay imatapis ruwayta atinanta. Astawanpis nishan payqa chayta ruwananpaj atiyniyoj kasqanta. Amigosninchejqa yanapaytapuni munawanchej, jinapis wakin kutisqa mana yanapayta atiwanchejchu. Jehovawantajrí mana jinachu, imaraykuchus payqa tukuy ima necesitakusqanta ruwanqa kamachisninta cuidananpaj, mañakusqankumanpis kutichinanpaj. Jehovalla tukuyta kamachin, paylla tukuy atiyniyoj (Isaías 40:26).

 “Diosqa mañakusqanchejmantapis chayri yuyasqanchejmantapis, aswan ashkhataraj ruwayta atin”. Jehovaqa kamachisninman mana mañakusqallankutachu qoyta atin, manachayqa imatachus mañakusqankumantapis aswan ashkhataraj. Payqa kamachisninta mana uj kʼacha runa jinallachu yanapan, manachayqa astawanraj.

 Kay versiculopi “mañakusqanchejmantapis chayri yuyasqanchejmantapis, aswan ashkhataraj ruwayta atin” nisqanmantaqa uj imatawan yachakunchej. Apóstol Pablo nerqa noqanchej mañakusqanchejmantapis chayri yuyasqanchejmantapis, aswan ashkhataraj Dios ruwayta atisqanta. Chayta nispaqa pay munarqa tukuy cristianos entiendenankuta, Diosqa kamachisnin imata ruwanantachus suyakusqankumanta aswan ashkhataraj ruwayta atisqanta. Wakin kutisqa yuyasunman problemasninchej manchay jatuchaj kasqankuta chayri mana entiendey atina kasqankuta, nitaj allinchayta atinapaj jinachu kasqankuta. Ichapis wakin kutisqa mana yachasunmanchu imatachus Jehovamanta mañakuyta. Jinapis Jehovapajqa tukuy ima atikun, mana imapis payta jarkʼanchu kamachisnin imapichus rikukushasqankuta entiendenanpaj, paykunata yanapananpaj ima. Jehovaqa maychus tiemponpi uj problemata allinchayta atin, mana yuyasqanchejman jinataj (Job 42:2; Jeremías 32:17). Payqa uj problemata allinchashaspa, kamachisninman kallpata qon kusiywan aguantanankupaj (Santiago 1:2, 3).

 Apóstol Pabloqa Efesiosman Cartata qhelqarqa Éfeso llajtapi tiyakoj cristianospaj. Éfesoqa kashan Asia Menorpi, maypichus kunan Turquía kashan chaypi. Pabloqa chay cartapi qhelqarqa Éfeso llajtapi tiyakoj hermanosrayku Diosmanta mañakusqanmanta wakin imasta (Efesios 3:14-21). Pabloqa mañakorqa tukuy hermanos Jesús jina yuyanankuta, imata ruwaspapis munakuywan ruwanankuta ima. Ajinamanta Cristoj munakuyninta aswan sumajta rejsinankupaj. Pabloqa Diosmanta mañakuyninta tukucharqa payta jatunchaspa. Chantapis mañakuyninta tukuchashaspa nerqa Efesios 3:20, 21 versiculospa nisqanta.

 Efesiosman Carta imasmantachus parlashasqanta yachanaykipaj kay videota qhawariy.