VERSICULOSMANTA SUTʼINCHAYKUNA
Romanos 10:13 | “Pillapis Señorpa sutinta wajakojqa salvasqa kanqa”
“Jehová Diospa sutinta tukuy oqharejkunaqa salvasqa kanqanku” (Romanos 10:13, Diospa Palabran).
“Pillapis Señorpa sutinta wajakojqa salvasqa kanqa” (Romanos 10:13, Qheshwa Biblia).
¿Ima niytá munan Romanos 10:13?
Diosqa tukuyta uj rejllata qhawawanchej, imayna rijchʼayniyoj kajtinchejpis, qhapaj chayri wajchas kajtinchejpis. Payqa munan tukuy salvakunanchejta, wiñaypajtaj kausakunanchejta. Chaypajtaj Tukuy Atiyniyoj Diospa sutinta oqharinanchejpuni tiyan, paypa sutintaj Jehová (Salmo 83:18). a
Bibliapi Jehovaj sutinta oqharinata nispaqa, mana chay sutita rejsinallamantachu, nitaj Diosta yupaychashaspa chay sutita oqharinallamantachu parlashan (Salmo 116:12-14). Astawanpis Diospi atienekunamanta, paymantataj yanapata mañakunamanta parlashan (Salmo 20:7; 99:6).
Jesucristoqa Diospa sutinta jatunpaj qhawarqa. Chayrayku mañakuyta yachachishaspa ajinata qallarerqa: “Cielopi kashaj Tatayku, sutiyki jatunchasqa kachun”, chayri “llimphuchasqa kachun”, nispa (Mateo 6:9). Jesusqa yachachillarqataj Jehovata rejsinanchej, kasukunanchej, munakunanchej ima kasqanta, ajinamanta wiñaypaj kausakuyta atinanchejpaj (Juan 17:3, 6, 26).
Qheshwa Bibliapeqa Romanos 10:13 versiculopi nin ‘Señor’ nispa. ¿Imaraykutaj nisunman chay versículo ‘Señor’ nispa Jehovamanta parlashasqanta? Imaraykuchus chay versiculoqa copiasqa kashan Joel 2:32 versiculomanta. Chay versiculopitaj Diospa sutin rikhurin, manataj ‘Señor’ nisqa palabrachu. b
Romanos 10:13 ñaupaqenpi, qhepanpi kaj versículos
Bibliamanta Romanos capítulo 10 yachachiwanchej, Dios allinpaj qhawanawanchejpajqa Jesucristopi creenanchej kasqanta (Romanos 10:9). Ñaupa Testamentomanta ashkha versiculospis kikillantataj ninku. Uj runaqa creeyniyoj kasqanta rikuchin, imapichus creesqanmanta ‘siminwan runasman willaspa’. Chayrayku mana creeyniyoj runasman sumaj willaykunata willan, paykunapis salvakunankupaj. Ajinamanta ashkha runas creeyniyoj kanqanku wiñaj kausayta japʼinankupaj (Romanos 10:10, 14, 15, 17).
Romanos 10 capitulota leeriy, sutʼinchaykunasnintawan, chantá waj versiculosta leenapaj referenciasnintawan.
a Diospa sutenqa Bibliamanta ñaupa qhelqasqaspi 7.000 kutista jina rikhurin. Hebreo parlaypeqa tawa letraswan qhelqakun, chay tawa letrastaj Tetragrámaton sutiwan rejsikun. Quechua parlaymantaj traducikun “Jehová” nispa, jinapis wakin yachayniyoj runasqa ninku “Yahweh” nispa traducikunanta.
b Yachakusqanman jina, Mosoj Testamentota qhelqajkunaqa, Ñaupa Testamentomanta wakin partesta copiashaspa, chay partespi Diospa sutin rikhurejtenqa, chay sutita churaporqanku. Uj diccionariopi jinata nin: “Yachakusqanman jina, Mosoj Testamentopeqa Tetragrámaton rikhurerqa, nisunman Diospa sutin Yahweh. Chay suteqa rikhurerqa mayqen parteschus Ñaupa testamentomanta copiasqa karqanku chaykunapi, tukuyninpi chayri wakillanpi”, nispa (The Anchor Bible Dictionary, volumen 6, página 392). Kaymanta astawan yachakunapaj Diospa Palabran Bibliapi Yanapa A5 tiyan, sutikuntaj “Griego Qhelqasqaspi Diospa sutin”.
Kaykunatapis qhawaykurillawajtaj
BIBLIAJ YACHACHIYKUNASNIN
Bibliata estudianapaj yanapas
Kay yanapasqa Bibliata tukuy sonqo, kusiywantaj estudianaykipaj yanasonqanku.
BIBLIAJ YACHACHIYKUNASNIN
Bibliamanta yachakuy
Jehovaj testigosnenqa Bibliamanta gratis yachachiyku.
