“Jehová Diosta yupaychaspa kusikuy, paytaj sonqoykej munasqanta qosonqa” (Salmo 37:4, Diospa Palabran).

 “Tata Diosta munakuspa mayta kusikuy, paytaj sonqoykej munasqanta qosonqa” (Salmo 37:4, Diosmanta Qhelqasqa).

 Kay salmota qhelqajqa Diosta yupaychajkunata nin Diosman qayllaykuyta atisqankumanta kusikunankuta. Dioswan amigos kajkunaqa mana iskayrayanankuchu tiyan Jehová a Dios imatachus munasqankuta qonanmanta.

 “Jehová Diosta yupaychaspa kusikuy”. Kay palabrasqa traducikullanmantaj: “Jehová Diosta yupaychaspa mayta kusikuy”, “SEÑORTA sirvispa kusikuy” chayri “imatachus SEÑOR qosunanta nisusqanmanta kusikuy”, nispa. Arí, noqanchejqa cheqa Diosta yupaychaspa cheqamanta kusisqa kasun. ¿Imaraykutaj chayta ninchej?

 Jehovata yupaychajkunaqa Jehová jinallataj yuyanku, Biblia nisqanman jinataj. Paykunaqa mana Diosta rejsillankuchu, manachayqa payta kasukunku, ajinamantataj yachayniyoj kasqankuta rikuchinku. Chayraykutaj llimphu sonqoyoj kanku, may chhika llakiykunamantataj librakunku (Proverbios 3:5, 6). Paykunallapaj imatapis munajkunata chayri chʼaukiyajkunata allin rispa jinajtinpis, Diospa kamachisnenqa mana rabiawan atipachikunkuchu, nitaj paykunamanta envidiakunkuchu (Salmo 37:1, 7-9). Diospa llajtanmanta kajkunaqa kusisqas kanku, imaraykuchus paykunaqa yachanku pisimantawan Jehová tukuy sajra ruwaykunata chinkachinanta, payta kasukojkunatataj allin kausayniyoj kasqankurayku bendecinanta (Salmo 37:34). Chantapis paykunaqa mayta kusikullankutaj Jehová Dios paykunata allinpaj qhawasqanmanta (Salmo 5:12; Proverbios 27:11).

 “Paytaj sonqoykej munasqanta qosonqa”. Kay palabrasqa traducikullanmantaj: “Payqa tukuy mañakusqaykita qosonqa” chayri “payqa imatachus sonqoyki ukhupi munasqaykita juntʼanqa”, nispa. Jinapis chayqa mana niyta munanchu Jehovaqa ima mañakusqanchejtapis qonallawanchejta. Payqa uj sumaj tata jina yachan imachus wawasninpaj aswan allin kasqanta. Chantapis imatachus mañakusqanchej, kausayninchejpis paypa kamachiykunasninman jina, munayninman jinataj kanan tiyan (Proverbios 28:9; Santiago 4:3; 1 Juan 5:14). Ajina kanqa chayqa, ‘runaspa mañakusqankuta uyarej’ Diosman qayllaykusunchej, pay mañakusqanchejta uyarinawanchejta yachaspa (Salmo 65:2; Mateo 21:22).

 37 Salmotaqa Israelmanta rey David qhelqarqa. Kay salmotaqa abecedarioman jina sukʼaspa qhelqarqa. b

 Davidtaqa qhasillamanta ashkha kutispi sufricherqanku. Rey Saulpis waj runaspis payta wañuchinankupaj qhatiykacharqanku (2 Samuel 22:1). Jinapis Davidqa ni tumpitata iskayrayaspa Diospi atienekorqa. Payqa yacharqa Jehovaqa maychus tiemponpi sajra runasta castigananta (Salmo 37:10, 11). Payqa yachallarqataj sajra runasta allin rispa jinajtinpis chayri “llullu qhora” jina wiñajtinkupis, tiempowanqa chinkachisqa kanankuta (Salmo 37:2, 20, 35, 36).

 Salmo 37 willawanchej Diospa kamachiykunasninta kasukojkunata imaynachus risqanta, Diospa kamachiykunasninta mana kasukojkunataj imaspichus rikukusqankuta (Salmo 37, 16, 17, 21, 22, 27, 28). Chayrayku kay salmoqa yachayniyoj kanapaj yanapawanchej, chantá yanapallawanchejtaj imayna runastachus Dios allinpaj qhawan chay runas jina kanapaj.

 Salmos libro imasmantachus parlashasqanta yachanaykipaj kay videota qhawariy.