“Amaña contraypi kaychejchu. Yachaychej noqa Dios kasqayta. Nacionesqa jatunchawanqanku, jallpʼantinpi jatunchasqa kasaj” (Salmo 46:10, Diospa Palabran).

 “Pachallampi kakuychej, rejsiwaychejtaj noqa Diosniykichej kasqayta. Tukuy nacionespi yupaychasqa kasaj, tukuy kay pachapitaj jatunchasqa kasaj” (Salmo 46:10, Diosmanta Qhelqasqa).

 Diosqa tukuy runasman nin payta yupaychanankuta. Chantapis payqa munan tukuy yachanankuta paylla kay jallpʼata kamachinanpaj derechoyoj kasqanta. Ni pipis niyta atinmanchu mana atiyniyojchu, nitaj kamachinanpaj derechoyojchu kasqanta. Astawanpis wiñaypaj kausakuyta munajkunaqa Diosta kamachejninkuta jina qhawananku tiyan (Apocalipsis 4:11).

 “Amaña contraypi kaychejchu. Yachaychej noqa Dios kasqayta”. Wakin Bibliaspeqa kay versiculoj qallariyninmanta palabrasta “pachallampi kakuychej” chayri “¡chʼinyaychis!” nispa traducikun (Diospa Simin Qelqa, 2004). Chayrayku ashkha runasqa pantasqata kay versiculota entiendenku, ninkutaj iglesiapi yachachikusqanta jatunpaj qhawanata chayri iglesiapi chʼinlla kakunata nishasqanta. Jinapis chay versiculoqa mana chaytachu niyta munan. Astawanpis Jehová a Diosqa tukuy nacionesmanta runasman yuyaychashan: “Amaña contraypi kaychejchu. Yachaychej noqa Dios kasqayta”, nispa. Diosqa chay palabraswan runasman nishan amaña contranpi kanankuta, paylla yupaychanapaj jina kasqantataj reconocenankuta.

 Iskay kaj salmopi chayman rijchʼakoj yuyaychayllataj tiyan. Chaypi nin Diosqa paypa contranpi oqharikojkunata castigananta. Jinapis Diosta kamachejninkuta jina qhawajkunaqa, atienekunku Dios paykunata pusashasqanpi, kallpachashasqanpi, yachaytataj qoshasqanpi. Diospi tukuy pakakojkunaqa llakiy tiempopi kaspapis kusisqas kanku, nitaj manchachikunkuchu (Salmo 2:9-12).

 “Nacionesqa jatunchawanqanku, jallpʼantinpi jatunchasqa kasaj”. Jehovaqa atiyninwan llajtanta salvasqanrayku ñaupa tiempopi jatunchasqa karqa (Éxodo 15:1-3). Aswan qhepamantaj Diosqa astawan jatunchasqaraj kanqa. Imajtinchus kay jallpʼapi tukuy tiyakojkunaqa paypa kamachiyninpi kanqanku, tukuytaj payllata yupaychanqanku (Salmo 86:9, 10; Isaías 2:11).

 Uj libro nisqanman jina, Salmo 46 parlashan “Diospa atiyninmanta, atiyninwan llajtanta jarkʼasqanmanta ima”. Diospa llajtanmanta kajkunaqa 46 salmota takispa, Jehová paykunata jarkʼananpi, yanapananpitaj atienekusqankuta rikuchej kanku (Salmo 46, 1, 2). Kay salmo imatachus nisqanqa israelitasta yuyarichej Jehová paykunawanpuni kananta (Salmo 46:7, 11).

 Kay salmoqa Jehová atiyninwan tʼukuna imasta ruwasqanmanta parlan, ajinamanta Diospa kamachisnin Jehová atiyninwan paykunata jarkʼananpi astawan atienekunankupaj (Salmo 46:8). Kay salmoqa Diospa kamachisninta tʼukurichej Dios guerrasta tukuchinanpaj atiyniyoj kasqanpi (Salmo 46:9). Ñaupa tiempopeqa Jehová llajtanta enemigosninkumanta jarkʼaspa guerrasta tukucherqa. Biblia nisqanman jinataj, Diosninchejqa pisimantawan jallpʼa enteropi tukuy guerrasta tukuchenqa (Isaías 2:4).

 Kunanrí, ¿Jehová Dios sigachu kamachisninta yanapashan? Arí. Apóstol Pabloqa cristianosman yuyaycharqa Dios paykunata yanapananpi tukuy sonqo atienekunankuta (Hebreos 13:6). Salmo 46 yanapawanchej, Dios jatun atiyninwan jarkʼanawanchejpi atienekunapaj, Diosta ‘pakakunanchejta, kallpanchejta jinataj’ qhawanapaj (Salmo 46:1).

 Salmos libro imasmantachus parlashasqanta yachanaykipaj kay videota qhawariy.