Mexicoj norte ladonpi nacekorqani, Ciudad Obregón llajtapi. Jisqʼon hermanos kayku, noqataj phishqa kaj kani. Campopi tiyakorqayku, chaypi tatayqa animalesta uywaj, tarpojtaj. Chay lugarqa tiyakunapaj kʼachitu karqa, familiaykupitaj ujchasqas, kusisqas kausakorqayku. Jinallapi phishqa watitasnillayojraj kashajtiy, sinchʼi wayra chay lugarta qʼalata thuñirparqa. Chayraykutaj waj llajtaman tiyakoj riporqayku.

 Chaypi tatayqa sumajta ganasharqa, jinapis machayman qokaporqa. Chayraykutaj mamaywan niña allintachu tiyaj, noqaykutapis llakiypi rikhurichiwarqayku. Noqawan hermanosniywanqa tataymanta cigarrosninta suwaspa chayta fumaj kayku. Sojta watitasnillayojraj kashaspa ñaupaj kutirayku machaykorqani. Pisi tiemponmantaj tatasniy separakorqanku, noqataj astawanraj viciosman qokorqani.

 Mamayqa waj qhariwan riporqa, noqaykutataj paywan pusawarqayku. Chay runaqa mana qolqeta mamayman qojchu, mamaypa ganasqantaj mana alcanzawajchu kayku. Chayrayku hermanosniywanqa tukuy imapi trabajakorqayku, ganasqaykutaj ni imapaj alcanzawajchu kayku. Noqaqa trabajaj kani lustra botasmanta. Chantapis tʼantata, periodicosta, chiclesta, waj imastawan vendej kani. Chantapis qhapaj runas tiyakunku chayman rej kani qʼopaman wijchʼusqanku mikhunata maskʼakoj.

 Chunka watasniyoj kashajtiy, uj runa niwarqa llajtamanta qʼopata wijchʼunku chaypi trabajanayta. Noqataj escuelata saqepuspa wasiymanta riporqani chaypi trabajanaypaj. Payqa sapa día pisisitullata pagawaj, ni uj dolartapis, qʼopaman wijchʼumusqanku mikhunatataj qowaj. Qʼopamanta pallakusqay imaswan tiyakunaypaj uj lugarta ruwakorqani. Chay lugarpi tiyakoj runasqa millay palabrasta parlaj kanku, millay kausayniyojtaj kaj kanku. Paykunamanta ashkhasqa drogakoj kanku, machajtaj kanku. Chaypi tiyakusqaytaqa ni yuyarillaytapis munanichu. Sapa tuta manchariymanta kharkatispa waqaj kani. Maytapuni pʼenqakoj kani chay jina wajcha kasqaymanta, niñataj escuelaman rishasqaymanta. Chaypi kinsa watata jina tiyakorqani. Chaymantaqa waj llajtaman riporqani. Chaypitaj tʼika chajraspi, algodón chajraspi, caña chajraspi, papa chajraspi trabajarqani.

 Tawa watasninmantaj Ciudad Obregonman kuterqani. Chaypeqa ujnin tiay tiyakorqa. Payqa jampiri karqa, wasinpitaj uj cuartitota qowarqa. Chaypi tiyakuspaqa anchata pesadillachikoj kani, llakisqalla kaspataj wañuchikuyta ima munaj kani. Uj chʼisitaj Diosmanta mañakuspa nerqani: “Señorníy, kankipuni chayqa rejsiyta munayki, wiñaypajtaj sirviyta munayki. Sichus uj cheqan religión kan chayqa, chayta tariyta munayman”, nispa.

 Diosmanta yachakuyta munajpuni kani. Lloqallitullaraj kashaspa ashkha iglesiasman rerqani, ni mayqentaj gustawarqachu. Chaykunapeqa mana Bibliamanta yachachiwarqankuchu, nitaj Diosta rejsinaypajpis yanapawarqankuchu. Wakin iglesiaspeqa qolqellata mañaj kanku, wakinpitaj millay kausayniyoj kaj kanku.

 19 watasniyoj kashajtiy, ujnin cuñadoy niwarqa Jehovaj testigosnenqa santosta yupaychay mana allinchu kasqanta Bibliapi rikuchisqankuta. Payqa Éxodo 20:4, 5 versiculosta leeripuwarqa. Chaypeqa nishan mana santosta ruwakunata. Versículo 5 nin: “Ama chaykunaman qonqorikunkichu, nitaj chaykunata sirvinaykipaj aysachikunkichu. Noqa Jehová Diosniykeqa munani noqallata yupaychanawankuta”, nispa. Chayta leeytawan tapuriwarqa: “Dioschus santosnejta milagrosta ruwanman, paykunanejtataj yupaychananchejta munanman chay, ¿imajtintaj kaypi nishanman mana santosta ruwakunanchejtari?”, nispa. Chay niwasqanqa mayta tʼukuchiwarqa. Chay kutimantapacha ashkhata Bibliamanta parlaj kayku. Bibliamanta parlay mayta gustawasqanraykutaj, tiempoqa ima jina ripoj.

 Pisi tiemponmantaj cuñadoywan rerqani Jehovaj testigosninpa tantakuyninkuman. Chaypi imastachus ruwasqankuta rikuspa, yachachisqankuta uyarispapis mayta tʼukorqani. Chaypeqa wawaspis parlarej kasqanku, plataformamantapis sumajta parlamoj kasqanku. Maytapuni tʼukorqani imastachus runasman yachachisqankumanta. Chujchalu kajtiypis, malatrasa kashajtiypis tukuy kʼachamanta parlapayawarqanku. Uj familiataj tantakuy tukukojtin mikhoj ima pusawarqa.

 Jehovaj testigosninwan Bibliata estudiaspa, yachakorqani Jehovaqa may munakuyniyoj Tatanchej kasqanta, noqanchejmantataj llakikusqanta qhapaj kajtinchejpis wajcha kajtinchejpis, maymanta kajtinchejpis, escuelayoj mana escuelayoj kajtinchejpis. Payqa tukuyta uj rejllata qhawan (Hechos 10:34, 35). Chay kutimantapacha kusisqa kani, niñataj sientenichu kausayniypi imapis faltawasqanta.

 Kausayneyqa tʼukunapaj jina cambiarqa. Cigarrota fumayta, machaykuyta qonqarqani, niñataj millay imasta parlarqanichu. Manaña phiñasqallachu kani, niñataj pesadillachikunichu. Uñitamantapacha sufrisqayrayku, nitaj escuelata tukuchisqayrayku pisipaj qhawakoj kani, chaywanpis chayta atipayta aterqani.

Kunanqa casadoña kani, warmeyqa Jehovata maytapuni munakun, maytataj yanapawan. Jehovaj testigosninpa congregacionesninta waturini, waturishaspataj hermanosniyta kallpachani, yachachini ima. Diosqa Biblianejta yanapawan niña llakisqallachu kanaypaj, may sumaj imastataj yachachiwan, chayrayku kunanqa manaña pisipajchu qhawakuni.