Albertaj japʼiynin Calgary llajtapi nacekorqani, chaytaj Canadapi kashan. Juchʼuyllaraj kashajtiy tatasniy divorciakorqanku. Chayrayku mamaywan awelosniypa wasinman tiyakoj riporqayku. Paykunaqa mayta munakuwaj kayku, chaypeqa may kusisqa karqani, allintataj kausakoj kayku. Chaytaqa yuyakullanipuni.

 Jinapis kaymanta jinalla kausayniy cambiarqa. Qanchis watasniyoj kashajtiy mamayqa watejmanta tataywan casarakorqa, tukuyniykutaj San Luisman tiyakoj riporqayku, chayqa kashan Estados Unidospi, Misuri nisqa japʼiypi. Pisi tiemponmanpacha repararqani tatayqa may sajra kasqanta. Mosoj escuelayman uj diallataraj rishajtiy, compañerosniy mayta maqaykuwarqanku, nitaj kutichikorqanichu. Tataytaj chayta yacharqosqa, chayrayku payqa mayta phiñakuspa compañerosniymantapis astawanraj maqaykuwarqa. Chaymantapacha kutichikuyta yacharqani, ajinapitaj ashkhaswan maqanakoj kani.

 Tatay ajina phiña kasqanqa maytapuni mamayta rabiachej. Chayrayku sapa kuti chʼajwaj kanku, maqanakojtaj kanku. Noqataj chayta rikuspa 11 watasniymantapacha drogakuyta, machayta ima qallarerqani. Sapa kuti aswan phiña runaman tukusharqani. Chayrayku callepipis runaswan maqanakoj kani. Colegiota tukunaykamaqa manchay sajra runamanña tukorqani.

 18 watasniyoj kashaspa Estados Unidosmanta Infantería de Marina nisqa cuartelman yaykorqani. Noqaqa maqanakuyta yacharqaniña, jinapis chaypeqa runata wañuchiyta yachakorqani. Chaymanta phishqa watasninmantaj ejercitomanta llojsiporqani Psicologiata estudianaypaj, ajinamanta FBI nisqapi trabajanaypaj. Chaytaqa Estados Unidospi estudiayta qallarerqani, chaymantataj Canadapi siga estudiallarqanipuni.

 Universidadpi estudiasqayqa sonqoyta pʼakiwarqa. Repararqani runasqa imatapis paykunallapaj munasqankuta. Noqa yuyarqani runaj ima ruwasqanpis qhasilla kasqanta, kay mundopi kaj problemastaj mana allinchay atina kasqanta. Chayrayku yuyarqani runasqa mana imatapis allinchayta atinankuta.

 Kausayqa qhasilla kasqanta yuyaspa astawan drogakorqani, machayman qokorqani, qolqeyoj kayllapiña, warmiswan puñuykuyllapiñataj yuyarqani. Chayrayku fiestamanta fiesta purej kani, imaymana warmiswantaj puñuykoj kani. Militar kasqayrayku ni pi atipanawanta yuyaj kani, chayrayku piwanpis maqanakullaj kani. Uj runata kʼumuykachachisqankuta rikuspaqa, yuyasqayman jinalla justiciata ruwayta munaj kani, pichus kʼumuykachachejwantaj maqanakoj kani. Pero mana ima justiciatapis ruwasharqanichu, manachayqa maqanakuyta munasqallaywan atipachikusharqani.

 Uj pʼunchay amigoywan sinchʼi drogasqa kasharqayku. Noqaykoqa wasiypa aswan ura kaj cuartonpi kasharqayku. Chaypitaj marihuanamanta uj paqueteta wakichisharqayku pakayllamanta vendenaykupaj. Chay kutipi amigoyqa tapuriwarqa: “¿Diospi creenkichu?”, nispa. Noqataj nerqani: “Sichus kay mundopi Diospa juchanrayku mayta sufrinchej chayqa, noqa ni imata paymanta yachayta munanichu”, nispa. Qʼayantintaj trabajoman rerqani, chaypeqa chay día recién trabajayta qallarisharqani. Chay trabajoypitaj ujnin compañeroy Jehovaj testigon karqa. Paytaj tapuriwarqa: “¿Dioschu juchayoj kanman ñakʼariykuna kananpaj? ¿Ima niwajtaj?”, nispa. Ñaupaj dialla chaymanta parlasharqayku, trabajoypitaj watej chaymanta tapushallawarqankutaj. Chayrayku astawan yachayta munarqani. Ajinapi chay hermanowanqa qhepan sojta killaspi ashkha kutista parlarerqayku. Paytaj Bibliawanpuni kutichiwarqa kausaymanta imastachus tapukusqayman, chaykunamanta wakin mana kutichiyta atinapaj jina kajtinpis.

 Chaypachaqa uj sipaswan tiyakusharqani, paytaj imastachus yachakushasqaymanta ni imata willarinayta munajchu. Uj domingopi nerqani, Jehovaj testigosninta wasiman wajyarisqayta Bibliamanta yachachinawaykupaj. Qʼayantintaj trabajomanta kutinaypaj manaña wasipichu pay kasqa, tukuy imanta oqhariykukuspa ripusqa. Chantá calleman llojsiytawan waqarikorqani, Diosmantataj mañakorqani yanapanawanta. Chay kutipi ñaupaj kutirayku Diospa sutin Jehovata mañakushaspa oqharerqani (Salmo 83:18).

 Iskay diasninmantaj uj qhariwarmi testigoswan Bibliata estudiayta qallarerqani. Paykunaqa Usted puede vivir para siempre en el paraíso en la Tierra nisqa librota saqewarqanku. Hermanos ripusqankutawantaj chay librota siga leellarqanipuni, uj chʼisipitaj leeyta tukorqani. a Chay libropi imastachus Jehovamanta, Wawan Jesucristomantawan yachakusqayqa, sonqoykamapuni chayarqa. Chaypi entienderqani Jehovaqa khuyakoj kasqanta, noqanchejta sufrejta rikuspataj sonqonta nanachikoj kasqanta (Isaías 63:9). Astawan sonqoyman chayarqa Dios munakuwasqanta yachay, Wawantaj noqarayku wañusqanta yachay (1 Juan 4:10). Chaypi repararqani Jehová noqawan mayta pacienciakusqanta. Imaraykuchus payqa “mana munanchu ni pi chinkachisqa kananta. Astawanqa munan tukuy arrepientekunankuta” (2 Pedro 3:9). Sutʼita repararqani Jehovaqa payman qayllaykunayta munasqanta (Juan 6:44).

 Chay semanapacha tantakuykunaman riyta qallarerqani. Noqaqa jatuchaj chujchasniyoj karqani, aretesniyoj ima. Pillapis noqata rikuwaspaqa mancharikoj, jinapis Jehovaj testigosnenqa unaymanta kutinpoj familiarninkuta jina japʼikuwarqanku. Paykunaqa cheqa cristianos jinapuni ruwarqanku. Chay tantakuypeqa kusisqa kasharqani, awelosniypa wasinpi kashaspa jina. Jinapis tantakuypi kusisqa kasqayqa aswan sumajraj karqa.

 Pisi tiemponmantaj Bibliamanta yachakusqayman jina kausayniyta cambiarqani. Chujchayta kʼutuchikorqani, khuchi kausayniyta saqeporqani, manaña machayman qokorqanichu, niñataj drogakorqanichu (1 Corintios 6:9, 10; 11:14). Jehovata kusichiyta munarqani. Chayrayku imata ruwasqaypis mana allinchu kasqanta yachakuytawankama chayta saqej kani, ni ima achakita churaspalla. Mana allin imasta ruwashasqayta yachayqa sonqoyta nanachiwaj, nejtaj kani: “Manaña ujtawanpis kayta ruwasajchu”, nispa. Chantá kallpachakojpacha kani, imatachus yuyasqayta, imasta ruwaymanchus yachasqa kasqaytapis cambianaypaj. Ajinata kallpachakusqayrayku, Jehovaj munayninman jina kausakuy mayta yanapawasqanchejta repararqanipacha. Bibliata estudiayta qallarisqaymanta sojta killasninmantaj, 29 de julio de 1989 watapi bautizakorqani. Ajinamantataj Jehovaj testigonman tukorqani.

 Bibliamanta yachakusqay yanapawarqa kausayniyta cambianaypaj. Ñaupajtaqa pillapis imata niwajtin, chay rato phiñarpakoj kani. Jinapis kunanqa tukuy atisqayta ruwani ‘tukuywan allinpi kausakunaypaj’ (Romanos 12:18). Kausayniytaqa mana kallpallaywanchu cambiarqani, manachayqa Jehová yanapawasqanrayku. Imaraykuchus Jehovaj Palabran, espíritu santonpis may atiyniyoj, kausayninchejta cambianapajtaj yanapawanchej (Gálatas 5:22, 23; Hebreos 4:12).

 Drogakunaymanta, phiñakuyniywan atipachikuspa maqanakunaymanta, sajra munayniywan atipachikunaymanta nisqaqa, Jehovata kusichinaypaj kallpachakuni, paypajtaj tukuy atisqayta llankʼanaypaj. Chayraykutaj wajkunatapis Diosta rejsinankupaj yanaparinaypaj kallpachakuni. Bautizakusqaymanta pisi watasninmantaj waj suyuman willaj riporqani, maypichus pisi willajkunalla karqanku chayman, chay lugarespi Diospa Palabranmanta astawan willamunaypaj. Chaymantapachataj ashkha runasman Bibliamanta yachacherqani, rikorqanitaj imaynatachus paykunapis kausayninkuta cambiasqankuta. Chantapis mayta kusikullanitaj mamaypis kunan Jehovaj testigon kasqanmanta. Paytaqa Jehovaj testigonman tukunanpaj yanaparqa kausayniyta cambiasqay.

 1999 watapi El Salvador suyupi uj escuelamanta graduakorqani, chay escuelataqa kunan rejsikun Diospa Gobiernonmanta Willajkunapaj Escuela sutiwan. Chay escuelapi yachachiwarqanku aswan sumajta willanaypaj, congregacionpi yachachinaypaj, hermanostapis yanapanaypaj. Chay watallapitaj Eugeniaywan casarakorqani. Kunantaj iskayniyku Guatemala suyupi Diospaj astawan llankʼashayku.

 Kunanqa manaña sonqo pʼakisqachu kani, manaqa yachani imapajchus kausasqayta, may kusisqataj kani. Bibliamanta cheqa kajta yachakusqayqa phiñakuywan atipachikuspa wajkunawan maqanakusqaymanta, khuchi kausayniyoj kasqaymanta kacharichiwarqa, chayrayku sonqo juntʼasqa kausakuni, may munasqataj kani.