Rachelqa República Dominicana nisqa suyupi tiyakun, paytaj willariwanchej: “Nacekushajteyqa tatasniy Jehovaj testigosnin karqanku. Jinapis 7 watasniyoj kashajteyqa tatay Jehovaj testigosninmanta karunchakaporqa. Chantapis Jehovaj contranpi oqharikorqa, may sajramantaj tukorqa. Payqa mana munarqachu Jehovata yupaychanayta. Chayrayku wakin kutis niwaj: ‘Sichus manaña Jehovata sirvinkichu chayqa, celularta regalasqayki, Disneyland nisqa jatun parqueman pusasqayki chayri ashkha qolqeta qosqayki’, nispa. Wakin kutistaj mayta maqawaj Jehovamanta karunchachinawanpaj, imaraykuchus pay yuyaj mana parlayta atejtiy chayri mana puriyta atejteyqa niña reunionesman rinayta. Jinapis chay tukuy ima ruwasqanqa qhasilla karqa. Imajtinchus reunionesmanqa mana faltakuspa rillajpuni kani.

 ”Tatayqa mana mamaypa rikunallanta maqawaj, qʼoyu qʼoyullata saqewaj. Niwajtaj: ‘Sichus mamaykiman willakunki chayqa, mamaykitapis maqaykullasajtaj’, nispa. Mamaymantaj nej qʼoyulla kasqayqa artes marciales nisqata yachachiwasqanmanta kasqanta. Tatayqa artes marcialesta a la fuerza yachachiwaj.

 ”Noqaqa wawallaraj karqani, tataytataj mayta manchikorqani, manataj mamayman willakuyta atillarqanichu imatachus tatay ruwashawasqanta, chayrayku Jehovallaman willakoj kani. Waseyqa Estados Unidosmanta Maryland lugarpi karqa. Wasiy wasapitaj uj monte karqa, chayman puriykachaj rejpuni kani. Chay montepeqa uj jatun roble sachʼa karqa. Chay sachʼaman wichariytawan ujnin ramanpi tiyaykukuspa Jehovamanta mañakoj kani. Payman willakoj kani imachus llakichiwasqanta. Chantapis nej kani: ‘Kay llakiymantachus kausashaj llojsinaypaj yanapawanki chayqa, jatunyaspa kayta, jaqayta ruwapusqayki’, nispa. Nillajtaj kani imatachus mosoj jallpʼapi ruwanayta, imayna familiayojchus kanayta, manaña manchachikunayta, ni ima nanayta sientenayta, ni imamanta llakikuspataj kusisqa kausakunayta.

 ”Tatay, Diosmanta karunchanawanpaj pagayta munawajtinpis maqaykuwajtinpis Jehovaqa sonqochawajpuni, kallpachawajpunitaj. Payqa yanapawarqa mana manchachikunaypaj, paytataj tukuy sonqo kasukunallaypajpuni.

 ”Chunka watasniyoj kashaspa bautizakorqani, iskay watasninmantaj precursora regular kayta qallarerqani. Qallariypeqa tatay mana chayta yacharqachu, jinapis yachaytawanqa mayta maqaykuwarqa, quijadaytapis chʼutarpachiwarqa.

 ”Wakin hermanosqa niwaj kanku: ‘Ancha wawallaraj kanki, mana precursora kawajchu, manaraj entiendenkichu imachus precursora kay kasqanta’, nispa. Tiyakorqani chaynejmanta ashkha testigo jovenesqa, mana kallpachakusharqankuchu Jehovata astawan sirvinankupaj. Paykunaqa fiestasman rispa, kusirikuspa imalla kasharqanku. Chaytaj sumaj kaspa jinarqa, noqapis paykuna jina ruwayta munarqani. Chayrayku wakin kutis nej kani: ‘¿Aswan pisillataña predicayman chayrí? Ajinamanta waj joveneswan sumajta kusirikuymanʼ, nispa. Jinapis sapa kuti chay yuyaykuna jamuwajtenqa, Jehovaman chayta willakoj kani.

 ”Quince watasniyoj jina kashajteyqa agencia de modelos nisqamanta encargados parlapayawarqanku modelomanta trabajanaypaj. Paykunaqa niwarqanku ashkhata paganawankuta Italiamanta Milán llajtapi paykunapaj trabajajtiy. Chayta niwasqankoqa mayta gustawarqa. Imajtinchus ajinamanta revistaspi llojsiyta atiyman karqa, manchay valesqa ropasta churakuspataj modelayta atiyman karqa. Chay kutipajqa kinsa watataña precursora kasharqani. Kay jinatataj piensarikorqani: ‘Modelomanta trabajasaj chayqa, gastosniypaj qolqe kapullawanqa, chantapis ashkha watasta chay qolqewan precursora kayta atisaj, mamaytapis chay qolqewan yanapayta atisaj’, nispa. Ajinata yuyarqani imajtinchus tatayqa chay kutipaj saqerpariwarqaykuña.

 ”Chaytataj Jehovaman uj oracionpi willarqani. Chantá mamaywan parlarqani, payqa ashkha watastaña precursora karqa. Uj ancianowanpis parlarerqani, paytaqa jatunpaj qhawaj kani. Chantapis yachasqa kasqayman jina, roble sachʼaman rerqani Jehovamanta mañakunallaypajpuni. Jehovaqa Eclesiastés 5:4 versiculonejta kutichiwarqa. Chaytaqa parlarqani chay anciano leeripuwarqa. Chaypi nin: ‘Diospaj imatapis ruwasaj ninki chayqa, usqhayllata juntʼay. Imatachá ruwasaj nerqanki chaytaqa juntʼay’, nispa. Noqataj Jehovaman nerqani payta tukuy sonqo sirvinayta. Repararqanitaj chay trabajoqa Jehovamanta karunchanawanta. Chayrayku mana chay trabajota japʼikorqanichu.

 ”Tukuy chay ñakʼariykunata atiparqani. Kunanqa may kusisqapuni kashani, familiayojtaj kani. Qosaypa sutenqa Jaser, wawaypatataj Connor, payqa 9 watasniyojña. Qosayqa anciano, wawaytaj publicadorña. Casi 27 watastaña precursora regular kani.

 ”Wakin kutis yuyarikunipuni roble sachʼa patapi ashkha kutispi unayta Jehovaman orakusqayta. ‘Jehová yanapariway’ nej kani. Paytaj tukuy imaymanasmanta yanapawarqa, kallpata qowarqa, sonqochawarqa, imata ruwanaypajpis yuyayta qowarqa. Tukuy kausayniypi sutʼita reparani Jehová Diosqa may kʼacha tata kasqanta. Jehovata sirviyta ajllasqayqa ni imawan kikinchakunchu. Mayta kusikuni payta tukuy sonqo sirvispa”.