Jehovaj testigosnenqa mayta kallpachakuyku familiaykuwan kusisqa, ujchasqa ima kausakunaykupaj. Vecinosniykumanpis Bibliamanta yacharichiyku familiankuwan ujchasqa kausakunankupaj. Chantapis Jehová Dios familiasta rikhurichisqanrayku, paypa kamachisqanta kasukunaykupaj kallpachakuyku (Génesis 2:​21-​24; Efesios 3:​14, 15). Diospa Palabranpeqa ashkha yuyaychaykuna tiyan mundontinmanta familias kusisqa, ujchasqataj kausakunankupaj.

 Bibliaj nisqanman jina ruwanaykupaj kallpachakuyku. Chayta ruwayqa yanapawayku sumaj qosa, sumaj warmi, sumaj tatas kanaykupaj (Proverbios 31:10-​31; Efesios 5:⁠22–​6:4; 1 Timoteo 5:8). Bibliaj yuyaychaykunasnenqa familiasta ujchasqa kanankupaj yanapallantaj, qosalla chayri warmilla testigo kajtinpis (1 Pedro 3:​1, 2). Mana testigo qosa chayri warmi, testigo qosankumanta chayri testigo warminkumanta imatachus nisqankuta qhawarina.

•   Brasilmanta Clauir sutiyoj qosa nin: “Warmiy Ivetewanqa sojta watasña casados kayku, sapa kutitaj maqanakoj kayku, chaytaj llakichiwaj kayku. Chaymanta warmeyqa Jehovaj testigonman tukuporqa. Chayrayku noqawan may kʼacha karqa, pacienciakuwajtaj. Chayta ruwasqanqa qhariwarmi kausayniykupi mayta yanapawarqayku”, nispa.

•   Zambiamanta Agness sutiyoj warmi nin: “Qosay Chansa Jehovaj testigosninwan Bibliata estudiananta mana munajchu kani, yuyarqani paykunaqa familiasta tʼaqanachisqankuta. Tiempowantaj repararqani Bibliaj yuyaychaykunasnenqa qhariwarmi kausayniykupi yanapawasqaykuta”, nispa.

 Jehovaj testigosnenqa waj runasman yacharichiyku Bibliaj nisqanqa waj imaspipis yanapawasqanchejta. Bibliaj nisqanqa yanapawanchej:

•   Uj sumaj qosata chayri warmita maskʼanapaj

•   Recienllaraj casarakojkunata

•   Suegrosninchejwan allinta apanakunapaj

•   Qolqenchejta allinta apaykachanapaj

•   Qhariwarmis mana siminakunankupaj

•   Qhariwarmis perdonanakunapaj

•   Imaynatachus wawasta kʼaminapaj

 Wakin kutisqa kanman. 1998 watapi uj willay nerqa: “20 qhariwarmismanta 1 qhariwarmilla problemaspi rikukorqa ujninku creyente kasqanrayku” (empresa de investigación Sofres).

 Jesusqa nerqañapuni paypa yachachisqasnin kayta munajkuna, familiankuwan problemaspi kanankuta (Mateo 10:32-​36). Ñaupa tiempopi Roma nación imaynachus kasqanta yachaj runa Will Durant nerqa: “Ñaupa tiempomanta cristianostaqa tumparqanku familiasta tʼaqanachisqankumanta”, nispa. a Kunan tiempopipis Jehovaj testigosninta familiasta tʼaqanachisqankumanta tumpallankutaj. ¿Jehovaj testigosninpunichu juchayoj kanku familiapi chʼajwas kananpaj?

 Jehovaj testigosninta demandanku familiasta tʼaqanachisqankumanta. Chaymanta parlaspa Tribunal Europeo de Derechos Humanos ajinata nin: “Familia ukhupi tʼaqanakus kananpaj mana Jehovaj testigosninchu juchayoj kanku. Familiasqa imaymana problemaspi rikukunku, qosankoj chayri warminkoj religionninta mana respetasqankurayku, nitaj religionninpi yachachisqankuman jina kausakojta saqesqankurayku”. Chantá chay Tribunal nillantaj: “Wakin familiaspeqa mana tukuychu kikin religionniyoj kanku, chayrayku problemas kallantaj, Jehovaj testigosnin ukhupipis problemasqa kallantaj”. b Ajina kajtinpis Jehovaj testigosnenqa Bibliaj nisqanman jina kausakunaykupaj kallpachakuyku. Bibliapi nin: “Ama pimanpis sajrata ruwasusqaykichejmanta sajrallawantaj kutichiychejchu. [...] Tukuy atisqaykichejta ruwaychej tukuywan allinpi kausakunaykichejpaj”, nispa (Romanos 12:17, 18).

 Jehovaj testigosnenqa Bibliaj kamachisqanta kasukuyku. Casarakuymanta parlaspa Biblia nin: “Señorpi iñiqwanpuni”, nispa (1 Corintios 7:39, Diospa Simin Qelqa 2004). Chayrayku testigosqa testigollawantaj casarakuyku, chayta ruwaytaj allinniykupaj. 2010 watapi familiamanta parlaj uj revista nerqa: “Kikin religionmanta kajllawantaj casarakojkunaqa, aswan kusisqa kausakunku”, nispa (Journal of Marriage and Family). c

 Jehovaj testigosnenqa mana pitapis niykuchu qosanmanta chayri warminmanta tʼaqakunanta. Biblia nin: “Sichus mayqen hermanoj warmin, Señorninchejpi mana creespapis paywan tiyakullaytapuni munan chayqa, hermanoqa ama warminta saqerpachunchu. Jinallataj sichus uj warmej qosan, Señorninchejpi mana creespapis paywan tiyakullaytapuni munan chayqa, warmeqa ama qosanta saqerpachunchu”, nispa (1 Corintios 7:12, 13). Jehovaj testigosnenqa kay kamachiyta kasukuyku.