Jehovaj testigosnenqa, Bibliata estudianankupaj imaymana Bibliasta apaykachanku. Jinapis Mosoj jallpʼapi kausajkunapaj Diospa Palabran Bibliata aswan jatunpaj qhawanku. Imaraykuchus chay Bibliaqa, sutʼisitu, maychus kajtataj willashan. Chantapis Diospa sutin chaypi kashan. Chay Bibliaqa, ashkha parlaykunapiña tiyan.

•   Diospa sutin. Ashkha Bibliaspi mana Diospa sutin rikhurinchu. Ajina karqa uj Bibliawan. Chay Bibliapeqa, ni uj kutillatapis Diospa sutin Jehová rikhurinchu. Astawanqa pikunachus chay Bibliata ruwaysikorqanku, chay runaspa sutisnillanku rikhurin. Paykunataj 70 runasmanta astawan kasqanku.

   Mana chayman jinataj, Diospa Palabran Bibliapeqa maypichus Diospa sutin rikhurinan karqa, chay tukuynin lugarespi rikhurin. Chay Bibliata ruwaysikoj runaspa sutisninkutaj, ni uj kutillapis rikhurinchu.

•   Maychus kajta willawanchej. Ashkha Bibliasqa qallariypi qhelqakusqanta, mana kikisituntachu willanku, manaqa pantasqataña. Uj Bibliapi, Mateo 5:22 jinata nin: “Pipis wawqenta opa ninman chayqa, infierno nina larwayman urmaykunampaj jinaña kanqa”, nispa. Jinapis Biblia qhelqakushajtin, chay versiculopi “infierno nina larway” palabras mana rikhurerqachu, manaqa “Hinón wayqʼo” nisharqa. Chay Bibliata ruwajkunaqa, ichapis “infierno nina larway” nispa churarqanku, sajra runas infiernopi ñakʼarinankuta yuyasqankurayku. Jinapis Bibliaqa mana chayta yachachinchu. Chayrayku Diospa Palabran Bibliaqa, chay versiculopi jinata nin: “Hermanonta ‘¡millay sonso!’ nejtajrí, Hinón wayqʼo nina laurayman chayananpaj jinaña kashan”, nispa.

•   Sutʼisitu. Uj Bibliaqa mana maychus kajllatachu willanawanchej tiyan, manaqa sutʼisitu, entiendenapaj jinataj kanan tiyan. Ashkha Bibliaspi Mateo 5:3 jinata nin: “Kusikuyniyojmin kanku wajcha sonqoyoj kasqankuta reparakojkunaqa”, nispa. Jinapis ashkha runasqa, “wajcha sonqoyoj” kayta mana entiendenkuchu. Chayrayku Diospa Palabran Bibliaqa kay versiculopi jinata nin: “Kusisqa kanku Diosta necesitasqankuta reparakojkunaqa”, nispa.

 Rikunchej jina, Diospa Palabran Bibliapeqa Diospa sutin Jehová kashan. Chantapis chay Bibliaqa, qallariypi qhelqakusqanta maychus kajta willawanchej, sutʼisitutaj kashan. Astawanpis chay Bibliaqa, gratislla runasman jaywakun. Chayrayku ashkha runas, mana qolqeyoj kaspapis Bibliata parlayninkupi leeriyta atinku.